ဝၢႆးသိုၵ်းမၢၼ်ႈ တႄႇၵၢၼ်ၽွင်းငမ်းၶိုၼ်း ၼႂ်းဝဵင်းလႃႈသဵဝ်ႈမႃးၼႆႉ ၽူႈလၵ်ႉၸၵ်ႇၶုတ်ႈ ယိင်ႈၶႅၼ်း လိူင်ႇၼမ်ႁႅင်း ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ။

မိူဝ်ႈဝၼ်းတီႈ 06/05/2025 ပူၼ်ႉမႃးၼႆႉ တီႈႁၢၼ်ႉၶၢႆၾူၼ်း AGM ဢၼ်မီးႁိမ်း ႁူင်းပလိၵ်ႈသိုၵ်း မၢၼ်ႈ မၢႆ(1) ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ ထုၵ်ႇၵူၼ်းႁၢႆႉၵေႃႉၼိုင်ႈ သႂ်ႇၽႃႈတူမ်းသူပ်း ပႃး ၵွင်ႈသေ ဢဝ်ၵွင်ႈငႃ ၼၢင်းယိင်း ဢၼ်ပႂ်ႉ တီႈႁၢၼ်ႉၼၼ်ႉ ၸႂ်ႉဢဝ်ပၼ် i Phone 5 လုၵ်ႈသေ လႅၼ်ႈ ပၢႆႈၵႂႃႇ ဝႃႈၼႆ။

ၵူၼ်းဝဵင်းလႃႈသဵဝ်ႈ လၢတ်ႈတီႈသိုဝ်ႇၶၢဝ်ႇ DVB ဝႃႈ -“ဢွင်ႈတီႈၼၼ်ႈသမ်ႉ ၸမ်ႁူင်းပလိၵ်ႈလူးၵွၼ်ႇ ၵူၼ်းႁၢႆႉယင်းႁတ်းမႃးၸူၼ်ယၢမ်းၵၢင်ဝၼ်းၸိူင်ႉၼႆ တႃႇလွင်ႈႁူမ်ႇလူမ်ႈၼႆႉ ပဵၼ်ဢၼ်လီမႆႈၸႂ်ႁႅင်း တႄႉတႄႉ။ တီႈႁၢၼ်ႉၶၢႆၾူၼ်း ဢၼ်ထုၵ်ႇၸူၼ်ၼၼ်ႉ ၵူၼ်းပႂ်ႉႁၢၼ်ႉသမ်ႉ ပဵၼ်ၼၢင်းယိင်းၼုမ်ႇလႄႈ လွင်ႈၼႆႉ ယိင်ႈၶႅၼ်းလႆႈမႆႈၸႂ် လွင်ႈႁူမ်ႇလူမ်ႈၵူၼ်းမိူင်းပႃးထႅင်ႈယဝ်ႉ”- ဝႃႈၼႆ။

ဝၢႆးလင် လူင်ပွင်ၸိုင်ႈမိူင်းၶႄႇ ၸွႆႈယူႇၵႄႈၵၢင်သေ ငူပ်ႉငီႉပၼ်တင်းသိုၵ်းၵဝ်ႈၵၢင်ႉ ပၼ်သုၼ်ႇလႆႈ သိုၵ်းမၢၼ်ႈ ၶဝ်ႈၵုမ်းၵမ်ၶိုၼ်းဝဵင်းလႃႈသဵဝ်ႈယဝ်ႉ ၸွမ်းပိုၼ်ႉတီႈၼႂ်းဝဵင်း ၵႆႉမီးလွင်ႈၽူႈလၵ်ႉၸၵ်ႉ ၶုတ်ႈလိူင်ႇၼမ်မႃး ၵူႈဝၼ်း။

တႄႇဢဝ် ဝၼ်းတီႈ 02/05/2025 ၼႆႉမႃး ၶႃႈႁၢပ်ႇၵၢၼ်ၶုၼ် လူင်ပွင်ၸိုင်ႈသိုၵ်းမၢၼ်ႈ ၶဝ်ႈမႃးယူႇၼႂ်း ဝဵင်းၶိုၼ်းသေ ပိုၼ်ၽၢဝ်ႇဢွၵ်ႇဝႃႈ တႄႇပိုတ်ႇၵူႈႁွင်ႈၵၢၼ် လူင်ပွင်ၸိုင်ႈ တႂ်ႈၶဝ်ၵုမ်းၵမ်ယဝ်ႉ ၼႆသေ တႃႉ ၾၢႆႇႁွင်ႈၵၢၼ်ပလိၵ်ႈတႄႉ ယင်းပႆႇႁၼ်တႄႇႁဵတ်းၵၢၼ်လႄႈ တႃႇလွင်ႈႁူမ်ႇလူမ်ႈၵူၼ်းမိူင်းတႄႉ ယင်းတိုၵ်ႉလႆႈမႆႈၸႂ်ဝႆႉယူႇ။

ယၢမ်းလဵဝ် သိုၵ်းမၢၼ်ႈ ဢၼ်ၶဝ်မႃးဝႆႉတီႈဝဵင်းလႃႈသဵဝ်ႈၼႆႉ ယူႇသဝ်းဝႆႉၸွမ်းတပ်ႉတေႃႉသူင်ႇ 626 ၊ ႁွင်ႈၵၢၼ် ပၢႆးပၺ်ႇၺႃႇ မၢႆ(8) ၊ တပ်ႉၶလယ 68 ၊ တပ်ႉၶလယ 41 ၊ တပ်ႉၶမယ 507 ၸိူဝ်းၼႆႉ။