မိူဝ်ႈဝၼ်းတီႈ 06/05/2025 ၸုမ်းၶႄၾႆး ၸိူဝ်းၶဝ်ႈၵႂႃႇၸွႆႈသွၵ်ႈႁႃ ၵူၼ်းမိူင်းၸိူဝ်းၵိုတ်းၶမ်ဝႆႉ ၼႂ်းႁိူၼ်းတိူၵ်ႈလူင် Sky Villa တီႈဝဵင်းလိူဝ်ႇ (မၼ်းတလေး) ဢၼ်ၵူၼ်ႇပၼ်းၵႂႃႇ ယွၼ်ႉၽႅၼ်ႇလိၼ်ဝႆ ႁႅင်း 7.7 မႅၵ်ႊၼီႊၵျုတ်ႉၼၼ်ႉ ထူပ်းႁၼ်ငိုၼ်းၼပ်ႉႁူဝ်ပၢၵ်ႇသႅၼ်တင်း တႅင်ႈၶမ်းလႄႈ ငိုၼ်းတေႃႊလႃႊ ၼပ်ႉႁူဝ်မိုၼ်ႇမၼ်း ၼႆယဝ်ႉ။
ၸုမ်းၶႄၾႆးၶဝ် ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်ဝႃႈ – ထူပ်းႁၼ် တူဝ်ငိုၼ်း 830 သႅၼ်ပျႃး၊ ငိုၼ်းတေႃႊ လႃႊ မၢင် 100 မီးတႃႇ 3 မိုၼ်ႇတေႃႊလႃႊ၊ ငိုၼ်းထႆး မၢင် 20 တႃႇ 7 ဝႂ်၊ တႅင်ႈၶမ်း ဢၼ်မီးၼမ်ႉၼၵ်း ၼိုင်ႈ တႅင်ႈလႂ် 1 ၶၼ်ၼၼ်ႉ 10 တႅင်ႈ၊ ၼမ်ႉၼၵ်း 1 ၵျၢပ်ႈ 4 ပႄးၼၼ်ႉ 2 တႅင်ႈ၊ ဢၼ်မီး 1 ၵျၢပ်ႈ 3 ပႄးၼၼ်ႉ 1 တႅင်ႈလႄႈ ၶိူင်ႈႁွႆႈ ၶိူင်ႈတိုဝ်း သၢႆသွႆးၶမ်း 30 သဵၼ်ႈ၊ ပီႇႁူၶမ်း 13 ၵူႈ၊ ဝႅၼ်ၶမ်းလႄႈ သၢႆၶေႃႈမိုဝ်းၶမ်း 26 သဵၼ်ႈ၊ ၵႂၢင်းသႅင်ၶမ်း 35 ဢၼ်၊ တိင်ႇတွႆႈသၢႆၶေႃး 5 ဢၼ်၊ ၶူဝ်းသႅင်ၶဵဝ် 2 ဢၼ်၊ သွႆႈသၢႆၶႆႇမုၵ်း 2 သဵၼ်ႈ၊ ၵႂၢင်းသႅင်ဢၼ်မဵတ်ႉသႅင်ၼၼ်ႉ 1 ဢၼ်လႄႈ ဢၢႆႊၾူၼ်း (Iphone) 1 လုၵ်ႈ၊ Ipad 1 လုၵ်ႈ၊ ပပ်ႉယေးငိုၼ်း (ပၢၼ်ႇ) 9 ပပ်ႉ၊ မၢႆၾၢင် 3 ဢၼ် ဢိၵ်ႇပႃး ၽိုၼ်လိၵ်ႈၽိုၼ်လၢႆးဢၼ်လွင်ႈယႂ်ႇ ၸဵမ်ၸိူဝ်းၼႆႉထႅင်ႈ ဝႃႈၼႆ။
လႆႈႁူႉဝႃႈ ၸုမ်းၶႄၾႆးၶဝ် ထူပ်းႁၼ်မိူဝ်ႈၽွင်း တိုၵ်ႉယႃႉၽဵဝ်ႈ ႁိူၼ်းတိူၵ်ႈလူင် Sky Villa တိူၵ်ႈထႅဝ် B,C,D ၼၼ်ႉသေ ၶိူင်ႈၶူဝ်းငိုၼ်းၶမ်းၸိူဝ်းၼႆႉ ႁၼ်တီႈၼႂ်းတိူၵ်ႈထႅဝ် B မၢႆႁွင်ႈ (19) ။ ၾၢႆႇၸုမ်းဢၼ်ႁပ်ႉပုၼ်ႈၽွၼ်း မွပ်ႈဢၢပ်ႈပၼ် ၶိုၼ်းၶူဝ်းၶွင်ၼၼ်ႉ လႆႈဢၢပ်ႈပၼ်ၶိုၼ်းတီႈ ပီႈၼွင်ႉၸိူဝ်းၶိူဝ်း ၸဝ်ႈၶူဝ်းၶွင်ငိုၼ်းၶမ်းၼႆႉၵႂႃႇယဝ်ႉ ဝႃႈၼႆ။
ၼႂ်းႁိူၼ်းတိူၵ်ႈ Sky Villa ဢၼ်လူႉၵွႆ ၵူၼ်ႇပင်းၵႂႃႇ မိူဝ်ႈၽႅၼ်ႇလိၼ်ဝႆ တင်းမိူင်းႁူမ်ႈတုမ်ပတ်းပိုၼ်ႉၼၼ်ႉ ၸွမ်းၼင်ႇ ၸုမ်းၶႄၾႆးၶဝ် ၵဵပ်းသဵၼ်ႈမၢႆဝႆႉ တေႃႇထိုင်ဝၼ်းတီႈ 03/05/2025 ၼႆႉ ထူပ်းႁၼ်တူဝ်တၢႆတႃႇ 139 ၵေႃႉယဝ်ႉ။ ၼႂ်းၼၼ်ႉ ပဵၼ်ၵူၼ်းၸၢႆး 44 ၵေႃႉ၊ ၼၢင်းယိင်း 73 ၵေႃႉ၊ လုၵ်ႈဢွၼ်ႇ 13 ၵေႃႉ၊ တူဝ်တၢႆ ဢၼ်ဢမ်ႇၸႅၵ်ႇလႆႈ ယိင်းၸၢႆးၼၼ်ႉ မီး 9 ၵေႃႉ။
လိူဝ်ၼၼ်ႉ ၾၢႆႇၸုမ်းၶႄၾႆးၶဝ် ၸွႆႈထႅမ်ဢဝ်ၵူၼ်းမိူင်းၸိူဝ်းၵိုတ်းၶမ်ဝႆႉ ၼႂ်းႁိူၼ်းတိူၵ်ႈလူင် Sky Villa ၵႄႈၵၢင်လွင်ႈလူႉၵွႆၼၼ်ႉ ၵူၼ်းမိူင်းၸိူဝ်းလွတ်ႈသၢႆၸႂ်မႃး မီး 52 ၵေႃႉ။ ၵွၼ်ႇပႆႇပဵၼ်လွင်ႈၽႅၼ်ႇလိၼ်ဝႆ တေႃႇထိုင်လိူၼ်မၢတ်ႊၶျ် 27 ဝၼ်းၼႆႉ ၼႂ်းႁိူၼ်းတိူၵ်ႈလူင် Sky Villa မီးၵူၼ်းယူႇသဝ်း ဝႆႉ 348 ၵေႃႉ ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ