ဝၼ်းတီႈ 07/05/2025 ယၢမ်းၵၢင်ၼႂ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇလႄႈ မေးၼၢင်းမၼ်း တေႃႇၵျူႇၵျူႇလႃႉ ၼမ်းၼႃႈသေ ဢွၼ်ႁူဝ်ဢဝ် ၽွင်းလူင် ၸုမ်းတူဝ်တႅၼ်းလူင်ပွင်ၸိုင်ႈမိူင်းမၢၼ်ႈတင်း ၽူႈ မီးၸၼ်ႉၾၢႆႇၼႂ်းတပ်ႉသိုၵ်းမၢၼ်ႈလၢႆလၢႆၵေႃႉ ၵႂႃႇၶဝ်ႈႁူမ်ႈပၢင်ဢွင်ႇပေႉပွႆးတိုၵ်း ၸိူဝ်ႉၸၢတ်ႈလူင် 80 ပီတဵမ် တီႈဝဵင်းမေႃႇသၵူဝ်ႇ မိူင်းရတ်ႉသျႃး။

ပၢင်ပွႆးဢွင်ႇပေႉပွႆးတိုၵ်းၸိူဝ်ႉၸၢတ်ႈလူင် တီႈဝဵင်းမေႃႇသၵူဝ်ႇ မိူင်းရတ်ႉသျႃးၼႆႉ တေၸတ်းႁဵတ်း ၼႂ်း ဝၼ်းတီႈ 09/05/2025 သေ ပဵၼ်ပၢင်ပွႆးဢၼ်လူင်ပွင်ၸိုင်ႈမိူင်းရတ်ႉသျႃးၸတ်းႁဵတ်း ပိူဝ်ႈတႃႇပဵၼ်မၢႆတွင်း ၸုမ်းသူဝ်ႇပီႇယႅၵ်ႉ (ဆိုဗီယက်) တိုၵ်းဢွင်ႇပေႉ ၸုမ်းၼႃႇၸီႇၵျႃႇမၼီႇ ၽွင်းပၢင်တိုၵ်းလုမ်ႈၾႃႉ ပွၵ်ႈၵမ်းသွင်လႄႈ ၾၢႆႇသိုၵ်းမၢၼ်ႈၵေႃႈ တေၵႂႃႇၶဝ်ႈႁူမ်ႈၼႄဢဵၼ်ႁႅင်းသိုၵ်းၸွမ်း ၼႆယဝ်ႉ။

တီႈပၢင်ပွႆးၼၼ်ႉ ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ႊ (ရှီကျင့်ဖျင်) ၵေႃႈ တေၶဝ်ႈႁူမ်ႈၸွမ်း ၵူၺ်းဢမ်ႇၵႃး ၽူႈၼမ်းၸိုင်ႈမိူင်းလၢႆလၢႆၵေႃႉ ဢိၵ်ႇၽူႈၼမ်းသိုၵ်းလႄႈ ၽူႈၼမ်းၵၢၼ်မိူင်းၶဝ် တေမီးပၢင်ႁူပ်ႉထူပ်း ဢုပ်ႇဢူဝ်းၵၼ်ၵႂႃႇ ႁင်းၶေႃၼႆ သိုၵ်းမၢၼ်ႈပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ် ၼႂ်းလိၵ်ႈပိုၼ်ၶၢဝ်ႇ ၼင်ႇၼႆ။

ၼႂ်းပၢင်ၵုမ်ၽူႈၼမ်းၸိုင်ႈမိူင်းၼၼ်ႉ တေဢုပ်ႇဢူဝ်းၵၼ်ၵႂႃႇ လွင်ႈမႅတ်ႇပႅင်းႁၵ်ႉသႃၵၼ် ၵႄႈၵၢင်လူင် ပွင်ၸိုင်ႈ တင်းသွင်မိူင်းလႄႈ ၵူၼ်းမိူင်း၊ ၵၢၼ်မၢၵ်ႈမီး၊ ၵၢၼ်ႁူမ်ႇလူမ်ႈ ပႃးၸဵမ်ၶၵ်ႉၵၢၼ်ၵူႈလွင်ႈလွင်ႈ ၼႆယဝ်ႉ။

မိူဝ်ႈပူၼ်ႉမႃးႁူဝ်လိူၼ်မၢတ်ႊၶျ်ၼၼ်ႉၵေႃႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇဢွၵ်ႇၶၢဝ်းတၢင်းၵႂႃႇ မိူင်းရတ်ႉသျႃးမႃးယဝ်ႉၵမ်းၼိုင်ႈ တူၵ်းလူင်းလႆႈၸႂ်ၵၼ်တင်း လူင်ပွင်ၸိုင်ႈမိူင်းရတ်ႉသျႃးမႃး ပိူဝ်ႈတႃႇႁူမ်ႈ ၵၼ်ႁဵတ်းသၢင်ႈၵၢၼ်ပၢႆးမၢၵ်ႈမီး ၼႂ်းမိူင်းမၢၼ်ႈ တႃႇ 10 မဵဝ်းပၢႆ။

ၵၢၼ်ပၢႆးမၢၵ်ႈမီး ဢၼ်ၸွမ်ၸိၵ်းသိုၵ်းမၢၼ်ႈ တူၵ်းလူင်းၽွမ်ႉၸႂ်တႃႇႁဵတ်းသၢင်ႈၸွမ်း လူင်ပွင်ၸိုင်ႈ မိူင်း ရတ်ႉသျႃး ၼႂ်းမိူင်းမၢၼ်ႈၼၼ်ႉ ပဵၼ်သုၼ်ၵၢၼ်ပၢႆးမၢၵ်ႈမီးၶိုၵ်ႉတွၼ်းတႃႈဝၢႆ (ထားဝယ်)၊ ၵၢၼ်ၵေႃႇသၢင်ႈ ႁူင်းၸၢၵ်ႈလူင် ၼိဝ်ႊၶလီႊယိူဝ်ႊ၊ ၶၵ်ႉၵၢၼ်ပၢႆးၸၢၵ်ႈ (နည်းပညာ)၊ ၾၢႆႇၵၢၼ်ၵပ်းသိုပ်ႇ တႄႇလီႊၵုၼ်ႇလႄႈ ၶေႃႈမုလ်းၶၢဝ်ႇသၢၼ်၊ ၶူင်းၵၢၼ်ၶုတ်းႁိၼ်ႁႄႈ၊ ၵၢၼ်ၽုၵ်ႇသွမ်ႈ၊ ၾၢႆႇတေႃႉသူင်ႇမၢၵ်ႇၶဝ်ႈတဝ်ႈၼမ်ႉ၊ ၾၢႆႇၸတ်းၵၢၼ်တေႃႉသူင်ႇ၊ လွင်ႈတႃႇတေသူင်ႇႁႅင်းၵၢၼ်၊ လွင်ႈၵႃႉၶၢႆ၊ ၶၵ်ႉၵၢၼ်ယေးငိုၼ်း (ပၢၼ်ႇ)၊ ၾၢႆႇပၢႆးပၺ်ႇၺႃႇလႄႈ ၶၵ်ႉၵၢၼ်တွင်ႈထဵဝ်း ၸဵမ်ၸိူဝ်းၼႆႉ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇၼႆႉ မိူဝ်ႈပီ 2022 လိူၼ်သႅပ်ႊထႅမ်ႊပိူဝ်ႊၼၼ်ႉၵေႃႈ ၵႂႃႇၶဝ်ႈႁူမ်ႈၸွမ်း ပၢင်ၵုမ်လူင်ၵၢၼ်ပၢႆးမၢၵ်ႈမီး မိူင်းရတ်ႉသျႃး ပွၵ်ႈၵမ်း 7 သေ ႁူပ်ႉထူပ်းဢုပ်ႇဢူဝ်းၵၼ်တင်း ၸွမ်ၸိုင်ႈမိူင်းရတ်ႉသျႃးလႄႈ မိူင်းပူႊတိၼ်ႊ။ မိၼ်းဢွင်ႇလၢႆႇၼႆႉ ၵႂႃႇႁူပ်ႉၵၼ်တင်း ၸွမ်ၸိုင်ႈမိူင်းရတ်ႉသျႃးၼၼ်ႉ ပွၵ်ႉၼႆႉ ပဵၼ်ပွၵ်ႈၵမ်း 3 ယဝ်ႉ။

တင်ႈတႄႇၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုတ်းဢႃႇၼႃႇၸိုင်ႈမိူင်းမႃး ၶၢဝ်းတၢင်း 4 ပီပၢႆၼႆႉ ဢွၵ်ႇၶၢဝ်းတၢင်းၵႂႃႇႁူပ်ႉၵၼ်တင်း ၸွမ်ၸိုင်ႈမိူင်းရတ်ႉသျႃး မီး 5 ပွၵ်ႈယဝ်ႉ တင်ႈတႄႇလႆႈႁပ်ႉတၼ်းႁဵင်း ၸွမ်ၸိၵ်းသိုၵ်းမႃးၼႆႉ လႆႈဝႃႈပဵၼ် 12 ပွၵ်ႈယဝ်ႉ။

တႅမ်ႈ – ၽူၺ်းၼုမ်ႇ