မိူဝ်ႈဝၼ်းတီႈ 06/05/2025 ယၢမ်းၵၢင်ၼႂ် ႁွင်ႈၵၢၼ်ၾၢႆႇၵႅတ်ႇၶႄသိုၵ်းမၢၼ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ သိုပ်ႇယိုတ်ႈၶၢဝ်းယၢမ်းထႅင်ႈ ဝၼ်းၵိုတ်းတိုၵ်း တႄႇဝၼ်းတီႈ 6 တေႃႇ 31 ဝၼ်း လိူၼ်ၼႆႉသဵင်ႈ ဝႃႈၼႆ။

ၵူၺ်းၵႃႈ မိူဝ်ႈဝၼ်းတီႈ 05/05/2025 ယၢမ်းၵၢင်ၶမ်ႈၼႆႉ ၾၢႆႇသိုၵ်းမၢၼ်ႈ ယင်းတိုၵ်ႉသိုပ်ႇဢဝ် ၶိူင်ႈမိၼ်တိုၵ်း၊ ၶိူင်ႈၵွင်ႈလူင်၊ ၶိူင်ႈတရူၼ်ႊၸိူဝ်းၼႆႉ ပွႆႇမၢၵ်ႇသႂ်ႇၵူၺ်းဢမ်ႇၵႃး တင်းသွင်ၾၢႆႇ ယင်းတိုၵ်ႉသိုပ်ႇ ပဵၼ်ပၢင်တိုၵ်းၵၼ်ဝႆႉႁၢဝ်ႈႁႅင်း ၼႂ်းပိုၼ်ႉတီႈၼႃႈလိၼ် တပ်ႉသိုၵ်းတဢၢင်း TNLA ၵုမ်းၵမ်ဝႆႉယူႇၼႆ ၽူႈၸမ်ၸႂ် ၼႂ်းတပ်ႉသိုၵ်းတဢၢင်း ၵေႃႉၼိုင်ႈ လၢတ်ႈ ၼႄၼင်ႇၼႆ။

“သိုၵ်းမၢၼ်ႈၶဝ် ယင်းတိုၵ်ႉပွႆႇမၢၵ်ႇသႂ်ႇ ၸွမ်းၼႂ်းဝဵင်းမိူင်းၵုတ်ႈ၊ ၵျွၵ်ႉမႄး ၸိူဝ်းၼႆႉယူႇ။ တီႈၼွင်ၶဵဝ် တၢင်းႁိမ်းႁွမ်း ဝၢၼ်ႈတွင်းၶမ်းၼၼ်ႉၵေႃႈ ပၢင်တိုၵ်း တိုၵ်ႉပဵၼ်ယူႇၵူႈဝၼ်း”။

မိူဝ်ႈပူၼ်ႉမႃး ၼႂ်းလိူၼ်ဢေႊပရိူဝ်ႊၼၼ်ႉၵေႃႈ သိုၵ်းမၢၼ်ႈတင်း သိုၵ်းဢူၺ်းလီၸၢဝ်းၶိူဝ်း သၢမ်ၸုမ်း (MNDAA / TNLA / AA) ၶဝ် ပိုၼ်ၽၢဝ်ႇၵိုတ်းတိုၵ်းဝႆႉ ပဵၼ်တၢင်းၵၢၼ် တင်းသွင်ၾၢႆႇသေတႃႉ သိုၵ်းမၢၼ်ႈ ယင်းတိုၵ်ႉဢဝ်ၶိူင်ႈမိၼ်တိုၵ်း ၵႂႃႇပွႆႇမၢၵ်ႇသႂ်ႇ ၼႂ်းၼႃႈတီႈ သိုၵ်းၵႅတ်ႇၶႄၵူၼ်းမိူင်းမၢၼ်ႈ PDF ၶဝ်ၵုမ်းၵမ်ဝႆႉ ၼၼ်ႉယူႇ။

ယၢမ်းလဵဝ်ၵေႃႈ ၾၢႆႇၸုမ်းဢူၺ်းလီသၢမ်ၸုမ်း ပိုၼ်ၽၢဝ်ႇသိုပ်ႇယိုတ်ႈဝၼ်းၵိုတ်းတိုၵ်း တႄႇဝၼ်းတီႈ 01-31/05/2025 တႃႇၶၢဝ်းတၢင်းၼိုင်ႈလိူၼ်လႄႈ ၾၢႆႇသိုၵ်းတဢၢင်း TNLA တႄႉ တိုၼ်းတေဢမ်ႇပဵၼ်ၾၢႆႇ ႁႅၼ်းသိုၵ်း လေႃႇတိုၵ်းသေ တေပဵၼ်ၾၢႆႇႁပ်ႉတိုၵ်းၵူၺ်းၼႆ ၾၢႆႇတပ်ႉသိုၵ်းတဢၢင်း ပိုၼ်ၽၢဝ်ႇၵႂႃႇ ၼႂ်း ဝၼ်းပၢင်သပ်းၸႅင်ႈၶၢဝ်ႇ မိူဝ်ႈဝၼ်းတီႈ 4 လိူၼ်မေႊ ပူၼ်ႉမႃးၼႆႉ။

တႅမ်ႈ – ၽူၺ်းၼုမ်ႇ