သိုၵ်းမၢၼ်ႈပိုၼ်ၽၢဝ်ႇ ၼႂ်းဝၼ်းတီႈ 03/05/2025 ၼႆႉဝႃႈ ယွၼ်ႉၽေးၽႅၼ်ႇလိၼ်ဝႆႁႅင်း ၼႂ်းဝၼ်းတီႈ 28 လိူၼ်မၢတ်ႊၶျ်ပူၼ်ႉမႃးၼၼ်ႉသေ ၵူၼ်းလူႉတၢႆမီးၵႂႃႇ 3,839 ၵေႃႉယဝ်ႉ လိူဝ်ၼၼ်ႉ ၵူၼ်းမၢတ်ႇၸဵပ်းမီး 5,105 လႄႈ ႁၢႆလၢႆဝႆႉ 101 ၵေႃႉ ဝႃႈၼႆ။

ၸွမ်းၼင်ႇသဵၼ်ႈမၢႆ ဢၼ်ပိုၼ်ၽၢဝ်ႇဝႆႉၼႂ်းဝၼ်းတီႈ 2 လိူၼ်မေႊၼႆႉသမ်ႉ ယူႇတီႈၸုမ်းၸွႆႈထႅမ် ၼွၵ်ႈမိူင်း ၊ ၸုမ်းၶႄၾႆးလႄႈ ၸုမ်းၸွႆႈထႅမ်ၼႂ်းမိူင်းမၢၼ်ႈၶဝ် ႁူမ်ႈၵၼ်သေ လႆႈ ၸွႆႈထႅမ်ဝႆႉ ၵူၼ်းၸိူဝ်းတိုၵ်ႉမီးသၢႆၸႂ် 653 ၵေႃႉ၊ ႁႃႁၼ်ၶၢပ်ႈတူဝ်ၵူၼ်းတၢႆ 786 ၵေႃႉ ဝႃႈၼႆ။

မိူဝ်ႈဝၼ်းတီႈ 3 လိူၼ်မေႊ ယၢမ်းၵၢင်ၼႂ် ႁွင်ႈၵၢၼ် ၾၢႆႇၶႄၾႆးမိူင်းမၢၼ်ႈ ႁႃႁၼ်ၶၢပ်ႈတူဝ်တၢႆ ၵူၼ်းၸၢႆး ၵေႃႉၼိုင်ႈ တႂ်ႈႁိူၼ်းတိူၵ်ႈ Sky Villa ဢၼ်ၵူၼ်ႇပင်း တီႈဝဵင်းလိူဝ်ႇ(မၼ်းတလေး) ။ ၼႂ်း ဝၼ်းတီႈ 2 လိူၼ်မေႊသမ်ႉ လႆႈၸွႆႈထႅမ် ဢဝ်ဢွၵ်ႇမႃးၶၢပ်ႈတူဝ်တၢႆၼၢင်းယိင်း 3 ၵေႃႉ ဝႃႈၼႆ။

ၸုမ်းၸွႆႈထႅမ် တူင်ႇဝူင်းၵူၼ်း ၼမ်ႉလၢတ်ႉ (နမ့်လတ်) ဢၼ်ႁဵတ်းၵၢၼ်ၸွႆႈထႅမ်ဝႆႉ တီႈဝဵင်းၸႄႈၵႅင်း လၢတ်ႈဝႃႈ – ယၢမ်းလဵဝ် ၸုမ်းၸွႆႈထႅမ်တူင်ႇဝူင်းၵူၼ်းၼႂ်းမိူင်း လႆႈဢွၼ်ၵၼ်ႁဵတ်းသၢင်ႈ ၵၢၼ်သွၵ်ႈႁႃ ၊ ၸွႆႈထႅမ် ၊ ၵူၼ်ႇပင်းၽဵဝ်ႈယႃႉပႅတ်ႈ ႁိူၼ်းယေးၸိူဝ်းမီးၽေး ဢမ်ႇထုၵ်ႇလီယူႇသဝ်း ၊ မႄးၵေႃႇသၢင်ႈၶိုၼ်း ႁိူၼ်းယေးလႄႈ ပူၵ်းပွင်ၸွႆႈထႅမ်ပၼ်ပၢႆးၸႂ်  ၸိူဝ်းၼႆႉဝႆႉယူႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။