တႄႇႁူဝ်လိူၼ်မေႊၼႆႉမႃး တီႈဝၢၼ်ႈၵေႃးၶူႇ လႅၼ်လိၼ်တႆး – ယၢင်းလႅင် ၸႄႈဝဵင်းမိူင်းပၢႆးၼၼ်ႉ ပႃၼႂ်းၾၢႆၼၼ်ႉ တၢႆပဵၼ်ၵေႃႇပဵၼ်ၵွင် သမ်ႉပေႃးၽူးၵႂႃႇမူတ်း ပဵၼ်ယွၼ်ႉသင်တႄႉဢမ်ႇႁူႉ ၵမ်ႈၽွင်ႈ ၵႂႃႇဢဝ်မႃးၵိၼ် ၵမ်ႈၽွင်ႈ ဢမ်ႇႁတ်းဢဝ်ၵိၼ် ဝႃႈၼႆ။

ၽူႈၸၢႆး ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “လႆႈယိၼ်းဝႃႈပဵၼ်ၸဵမ်ႁူဝ်လိူၼ်ၼႆႉ။ ပဵၼ်တင်းၾၢႆယဝ်ႉ ပႃၸိူဝ်းၼႆႉ တၢႆၼမ်ၼႃႇ၊ ၵူၼ်းဝၢၼ်ႈဢၼ်ဢဝ်သေ ၵိၼ်ၺႃးၼၼ်ႉတႄႉ ပဵၼ်ၶေႃးၶူမ်းဝႃႇ ၸိူဝ်းၼႆႉ”- ဝႃႈၼႆ။

ပႃပဵၼ်ၵေႃႇပဵၼ်ၵွင် ဢၼ်လွင်ႈမႃးၸွမ်းၼမ်ႉၾၢႆ မိူင်းပၢႆး ၸိူဝ်းၼၼ်ႉ ၵူၼ်းဝၢၼ်ႈဢဝ်ၵိၼ် ၊ ဢဝ်ၶၢႆ ပဵၼ်ၶေႃးၶူမ်း ၸိူဝ်းၼႆႉ ယၢမ်းလဵဝ် ၵူၼ်းဝၢၼ်ႈဢွၼ်ၵၼ် ပွင်ႇလႅင်းၵၼ် ႁၢမ်ႈဢဝ်ၵိၼ် ဢဝ်ၶၢႆ ယွၼ်ႉမၼ်းပဵၼ်ၽေးတႃႇပၢႆးယူႇလီ – ၵူၼ်းပိုၼ်ႉတီႈလၢတ်ႈ။

လွင်ႈတၢင်းပႃတၢႆၼၼ်ႉ ၵူၼ်းဝၢၼ်ႈ လၢမ်းၶၢတ်ႈမီးသွင်လွင်ႈ ယွၼ်ႉၽေးသၽႃႇဝလႄႈ ပႃတၢႆ ၊ ထႅင်ႈလွင်ႈၼိုင်ႈတႄႉ ၼမ်ႉၽီလူး ဢၼ်လုၵ်ႉတီႈၾၢႆသေသိုပ်ႇၼွင်းလူင်းမႃးၼၼ်ႉ ပႃးၵွင်ႉလႄႈ ပႃတၢႆ – ဝႃႈၼႆ။

ၵူၼ်းပိုၼ်ႉတီႈလၢတ်ႈဝႃႈ တပ်ႉသိုၵ်းမၢၼ်ႈမီးႁိမ်းၾၢႆလႄႈ ယူဝ်ၶႄးသိုၵ်းမၢၼ်ႈ ပွႆႇၵွင်ႉသႂ်ႇ ၼႂ်းၼမ်ႉၵေႃႈပဵၼ်လႆႈ ဝႃႈၼႆၵေႃႈမီး။ ယွၼ်ႉပိူဝ်ႈၵူႈပွၵ်ႈၵေႃႈ သိုၵ်းမၢၼ်ႈၵႆႉႁဵတ်း ဝႃႈၼႆ။

ၾၢႆၼမ်ႉတီႈမိူင်းပၢႆးၼႆႉ ပဵၼ်ၼမ်ႉဢၼ်ၵူၼ်းဝၢၼ်ႈလႄႈ ၵူၼ်းပၢႆႈၽေးသိုၵ်း ပိုင်ႈဢိင်ၸႂ်ယႂ်ႇ တႃႇၵိၼ်တႃႇၸႂ်ႉ။ 

ၵူၼ်းၸၢႆးပၢႆႈၽေးသိုၵ်း ဢႃယု 40 ပီ လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ်ၼႆႉ ယွၼ်ႉၽေးသိုၵ်းၽေးသိူဝ်လႄႈ ၵူၼ်းမိူင်းလႆႈပၢႆႈၽေးသိုၵ်းယဝ်ႉသေတႃႉ ႁိမ်းႁွမ်းၶႅပ်ႇဝၢၼ်ႈၸိူဝ်းၼႆႉ ၵူၼ်းၸိူဝ်းလုၵ်ႉတၢင်ႇတီႈ ပၢႆႈၽေးသိုၵ်းမႃးယူႇသဝ်းဝႆႉၵေႃႈ တိုၵ်ႉမီးယူႇ။ ၸိူဝ်းၶဝ်ၵိၼ်/ ၸႂ်ႉၼမ်ႉၾၢႆၼႆႉၵူၺ်း”- ဝႃႈၼႆ။

ဝၢၼ်ႈၵေႃးၶူႇၼႆႉ ယၢၼ်ၵႆၵၼ်တင်း ဝဵင်းမိူင်းပၢႆး 1 လၵ်း။ ယွၼ်ႉပၢင်တိုၵ်းၼႂ်းၵႄႈသိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ သိုပ်ႇပဵၼ်ႁၢဝ်ႈႁႅင်းဝႆႉလႄႈ ယၢမ်းလဵဝ် ၵူၼ်းယူႇသဝ်းၵိုတ်း 4 ပုၼ်ႈ 1 ပုၼ်ႈၵူၺ်း။ ၸိူဝ်းၶဝ်ၵေႃႈ ႁဵတ်းသူၼ်ႁဵတ်းၼႃးသေ ယူႇပႂ်ႉဝၢၼ်ႈဝႆႉ ဝႃႈၼႆ။

ၼႂ်းလိူၼ်ၵျူႊလၢႆႊ ပီ 2024 ၽွင်းၼမ်ႉထူမ်ႈၼမ်ႉၼွင်း ၾၢႆမိူင်းပၢႆး ပွႆႇၼမ်ႉလႄႈ ႁဵတ်းႁႂ်ႈၼမ်ႉထူမ်ႈၼမ်ႉ ၼွင်းတိူၵ်ႇႁႆႈလွၵ်းၼႃး ၵူၼ်းမိူင်းလူႉၵွႆႇတင်းၼမ် ဝႃႈၼႆ။

ယၢမ်းလဵဝ် သိုၵ်းမၢၼ်ႈ ယိူင်းဢၢၼ်းတႃႇၵုမ်းလႆႈၶိုၼ်းဝဵင်းမိူင်းပၢႆးၼႆသေ ထႅမ်ႁႅင်းသိုၵ်း ၶဝ်ႈမႃးၶိူဝ်းယႂ်းလႄႈ သဵင်ၵွင်ႈတႅၵ်ႇ ပိုတ်းယိုဝ်းၵၼ်တင်း ၸုမ်းလုၵ်ႉၽိုၼ်ႉၵႅတ်ႇၶႄၵူၼ်းမိူင်း ပၢင်တိုၵ်းပဵၼ်ဢမ်ႇယဝ်ႉ ဢမ်ႇတူဝ်ႈထိုင်ဝၼ်းမိူဝ်ႈၼႆႉ။