ဝၼ်းတီႈ 06/05/2025 မိူဝ်ႈၼႆႉ ယၢမ်းၵၢင်ၼႂ်ၸဝ်ႉမွၵ်ႈ 6 မူင်း မီးၵူၼ်းၵေႃႉၼိုင်ႈယိုဝ်းၵွင်ႈ ၵၢင်ဝဵင်းမႄႈသွတ်ႇ မိူင်းထႆး၊ ၵူၼ်းမိူင်းတူၵ်းၸႂ်၊ ၸဝ်ႈၼႃႈတီႈပလိၵ်ႈထႆး လိုပ်ႈလမ်းတီႉၺွပ်းမၼ်းၸၢႆး။

သိုဝ်ႇၶၢဝ်ႇထႆး ၶျွင်ႉ 7 တႅမ်ႈတၢင်ႇဝႆႉဝႃႈ ဢိင်ၼိူဝ်မႄႈမၼ်းၸၢႆးလၢတ်ႈသေ လႆႈႁူႉဝႃႈ မၼ်းၸၢႆးၼႆႉပဵၼ် ၵူၼ်းတၢင်းပဵၼ်ပၢႆးၸႂ်။ မၼ်းၸၢႆး တႄႇဢွၵ်ႇလူမ်းယွင်ႇၸဵမ်မိူဝ်ႈတဵင်ႈၶိုၼ်းလိုၵ်းၸၢႆႉ မွၵ်ႈၸဝ်ႉ 1 မူင်း ၼႆႉ။ ထိုင်မႃးယၢမ်းၵၢင်ၼႂ် 6 မူင်း ႁွတ်ႈထိုင်မႃး ၼႃႈလုမ်းၾၢႆႇလိူမ်ႈလႆႇ ဝဵင်းမႄႈသွတ်ႇသေ လၢမ်းလိမ်းပိုတ်းယိုဝ်းၵွင်ႈ။ ယိုဝ်းမွၵ်ႈ 10 ၵမ်းၼႆႉ ၵူၼ်းပိုၼ်ႉတီႈမႆႈၸႂ် – ဝႃႈၼႆ။

မႄႈမၼ်းၸၢႆး လၢတ်ႈတီႈသိုဝ်ႇၶၢဝ်ႇထႆးဝႃႈ – မၼ်းၸၢႆးမီးဢႃယု 43 ပီ ၸိုဝ်ႈႁွင်ႉ ဢရုၽၼ်း။ ပေႃႈမၼ်း ၸၢႆးပဵၼ်ပလိၵ်ႈ။ မၼ်းၸၢႆး တႄႇၸပ်းတၢင်းပဵၼ်ၸႂ် ၽွင်းပေႃႈမၼ်းပဵၼ်ၽေးဢုပၢတ်ႈသေတၢႆ။ ၵွင်ႈဢၼ်မၼ်းၸၢႆးယိုဝ်းၼႆႉၵေႃႈ မၼ်းၸၢႆးဢဝ်ဝႆႉၸဵမ်မိူဝ်ႈပႆႇပဵၼ်တၢင်းပဵၼ်ၸႂ် – မႄႈမၼ်းၸၢႆး လၢတ်ႈၼင်ႇၼႆ။

ၵွင်ႈဢၼ်မၼ်းၸၢႆး ဢဝ်မႃးယိုဝ်းၵၢင်ဝဵင်းမႄႈသွတ်ႇ မိူဝ်ႈၼႆႉ ပဵၼ်ၵွင်ႈသႅၼ်း CMMG BANSHEE MK4  ၸႂ်ႉမၢၵ်ႇ 9 မမ။ ပဵၼ်ၵွင်ႈဢၼ်တၢင်ႇမၢႆၾၢင်ဝႆႉ။

မၼ်းၸၢႆးၼႆႉ ပဵၼ်ၵူၼ်းထႆး။ ၼွၵ်ႈလိူဝ်ၶေႃႈမုလ်း ဢၼ်မႄႈမၼ်းၸၢႆးလၢတ်ႈတီႈပလိၵ်ႈၼၼ်ႉသေ တေမီးၶေႃႈမုလ်းၸိူင်ႉႁိုဝ်တႄႉ ဢၼ်လၢၵ်ႇလၢႆးလိူဝ်ၼၼ်ႉၼႆတႄႉ ပလိၵ်ႈထႆး ပႆႇလႆႈၵူတ်ႇထတ်းလႄႈ ပႆႇၸၢင်ႈပိုၼ်ၽၢဝ်ႇ ဝႃႈၼႆ။

မၼ်းၸၢႆးယိုဝ်းၵၢင်ဝဵင်းၼႆႉ ဢမ်ႇတုမ်ႉတိူဝ်ႉမၢတ်ႇၸဵပ်းၽႂ်သေတႃႉ ၵူၼ်းမိူင်းတိတ်းၶမ်ဝႆႉ ၸွမ်းပၢမ်ႉ ၼမ်ႉမၼ်းလႄႈ ႁိမ်းႁွမ်းၸိူဝ်းၼၼ်ႉ ဢမ်ႇႁတ်းတူင်ႉတူဝ်ၵႂႃႇမႃး။

ပလိၵ်ႈ လႆႈမႃးလိုပ်ႈလမ်းပိုတ်းယိုဝ်းတီႉၺွပ်းမၼ်းၸၢႆး မၢတ်ႇၸဵပ်းမၢၵ်ႇၵွင်ႈၵႂႃႇလႄႈ ၸင်ႇတီႉလႆႈ။ ယၢမ်းလဵဝ် လႆႈဢဝ်တၢင်ႇႁူင်းယႃဝႆႉသေ ပလိၵ်ႈပႂ်ႉၵုမ်းတႃႇၵူတ်ႇထတ်းထဵတ်ႈထၢမ်ဝႆႉယူႇ ဝႃႈၼႆ။

ဢိင်ၼိူဝ်လွင်ႈၼႆႉသေ ၵူၼ်းမိူင်းမၢၼ်ႈ ဢၼ်မႃးမီးတီႈဝဵင်းမႄႈသွတ်ႇတႄႉလၢတ်ႈဝႃႈ – တၵ်းလႆႈ ၾၢင်ႉယူႇၾၢင်ႉၵိၼ် ၵူဝ်ပလိၵ်ႈလူင်းၵူတ်ႇထတ်းႁၢဝ်ႈႁႅင်း ဝႃႈၼႆ။