မိူဝ်ႈၼႆႉ ဝၼ်းတီႈ 05/05/2025 ၾၢႆႇၼႃႈ ႁူင်းယႃလူင်ၵူၼ်းမိူင်း ဝဵင်းလႃႈသဵဝ်ႈ တႅမ်ႈလိၵ်ႈပိုၼ်ၽၢဝ်ႇဝႆႉဝႃႈ တႄႇႁပ်ႉၵူၼ်းပဵၼ်ၵႂႃႇ ၶၢဝ်းယၢမ်းၵၢင်ၼႂ် 8 မူင်း တေႃႇ ၵၢင်ဝၼ်း 12 မူင်း တွၼ်ႈၼိုင်ႈ၊ ၵၢင်ဝၼ်း 1 မူင်း တေႃႇ 5 မူင်း တွၼ်ႈၼိုင်ႈ ဝႃႈၼႆ။

ၵူၼ်းမိူင်းၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်တႄႉ ၶိူင်ႈမိုဝ်းၸႂ်ႉတိုဝ်း ၶဝ် ယင်းပႆႇမီး ၸေးၵုမ်ႇလႄႈ တေပႆႇၸၢင်ႈယူတ်းယႃလႆႈ တၢင်းပဵၼ်ၵူႈမဵဝ်း။ တေႃႉတႄႉယႃလႆႈ ၶႆႈဝတ်းၼၢဝ်ဝႃႇ ၸၢမ်းလိူတ်ႈၶိုၼ်ႈ လိူတ်ႈသုင်တႄႇၵႂႃႇၸိူဝ်းၼႆႉၵူၺ်းၵွၼ်ႇ”- ဝႃႈၼႆ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ဝၢႆးလင် သိုၵ်းမၢၼ်ႈၶဝ်ႈမႃးပၵ်းသဝ်းတပ်ႉၶိုၼ်း ႁွင်ႈၵၢၼ် ၾၢႆႇလူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် လၢႆလၢႆလုမ်းပိုတ်ႇပဵၼ်တၢင်းၵၢၼ်ယဝ်ႉၼႆသေတႃႉ ၵူၼ်းမိူင်းယင်း ပႆႇၸႂ်ႉလႆႈ လႅင်းၾူၼ်း၊ ဢိၼ်ႊထိူဝ်ႊၼႅတ်ႊ၊ ၾႆးၾႃႉ ၸိူဝ်းၼႆႉ တဵမ်ထူၼ်ႈလီငၢမ်းၶိုၼ်းမိူၼ်ၵဝ်ႇ။

တႅမ်ႈ – ၽူၺ်းၼုမ်ႇ