တႄႇၵၢင်လိူၼ်ဢေႊပရိူဝ်ႊမႃး သိုၵ်းမၢၼ်ႈ ၶဝ်ႈၵုမ်းၵမ် ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉသေ ႁူဝ်လိူၼ်မေႊၼႆႉ ၸီႉသင်ႇ ႁႂ်ႈၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၾၢႆႇလူင်ပွင်ၸိုင်ႈ ပိုတ်ႇၶိုၼ်းလုမ်း ပဵၼ်တၢင်းၵၢၼ်ၵႂႃႇ။

ဝၢႆးလင် သိုၵ်းမၢၼ်ႈ ၸီႉသင်ႇႁႂ်ႈၶႃႈႁၢပ်ႇၵၢၼ်ၶုၼ် ၶဝ်ႈမႃးယူႇၶိုၼ်း ၼႂ်းဝဵင်းလႃႈသဵဝ်ႈယဝ်ႉ ဢွၵ်ႇၶေႃႈပူင်ႁႂ်ႈပိုတ်ႇၶိုၼ်း ႁွင်ႈၵၢၼ်လူင်ပွင်ၸိုင်ႈတင်းသဵင်ႈယဝ်ႉဢမ်ႇႁိုင် ၸဝ်ႈတူၼ်ၶူး ၽတ်ႉတၼ်ႇတ ပုင်ႇၺၼၼ်ႇတ ၸဝ်ႈၵွၼ်းဝတ်ႉ ဝၢၼ်ႈသူႈၵေႃႈ လုၵ်ႉတၢင်းဝဵင်းပၢင်လူင် ၸိုင်ႈတႆးပွတ်းၸၢၼ်းသေ ယေႃးမုၼ်မႃးၶိုၼ်း တီႈဝတ်ႉလူင်ဝၢၼ်ႈသူႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 4 လိူၼ်ႁူၵ်းမႂ်ႇ 8 ၶမ်ႈ ယၢမ်းၵၢင်ဝၼ်း သိုၵ်းမၢၼ်ႈ ဢွၵ်ႇၶေႃႈပူင်ၸီႉသင်ႇ ႁႂ်ႈသင်ၶၸဝ်ႈ ၸိူဝ်းယူႇသဝ်းဝႆႉ ၼႂ်းတူင်ႇဝဵင်းလႃႈသဵဝ်ႈတင်းသဵင်ႈ ၶီႇရူတ်ႉၵႃးသေ လွတ်ႈ ႁေႃးလိၵ်ႈ ၵမ်ႉၽဝႃႇလႄႈ ပရိတ်ႈ လွတ်ႈၽေးလွတ်ႈလၢၼ်ႇ ပၼ်ႇလဵပ်ႈၼႂ်းဝဵင်းလူင်လႃႈသဵဝ်ႈ။

လႆႈႁူႉဝႃႈ ဢၼ်သင်ၶၸဝ်ႈၶဝ် ပၼ်ႇဝွၼ်းပရိတ်ႈ ၼႂ်းဝဵင်းလႃႈသဵဝ်ႈၼႆႉ ပဵၼ်ၸဝ်ႈၵွၼ်းဝတ်ႉလူင်ၵျွင်း ဝၢၼ်ႈသူႈ ဢွၼ်ႁူဝ်ၼမ်းၼႃႈသေ ႁဵတ်းသၢင်ႈၵႂႃႇၸွမ်း ဢွင်ႈတီႈဢၼ်မီး ႁွင်ႈၵၢၼ်လူင်ပွင်ၸိုင်ႈ သိုၵ်း မၢၼ်ႈ ပၵ်းသဝ်းဝႆႉၸိူဝ်းၼၼ်ႉ ဝႃႈၼႆ။

ၼႂ်းဝဵင်းလႃႈသဵဝ်ႈၼႆႉ တႄႇသိုၵ်းမၢၼ်ႈၶဝ်ႈၵုမ်းၵမ်ၶိုၼ်း ၵူၼ်းမိူင်းၺႃးၽူႈလၵ်ႉၵူၼ်းၸူၼ် ၼမ်မႃးလိူဝ် ၵဝ်ႇ။ ႁွင်ႈၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် ၾၢႆႇလိူမ်ႈလႆႇတႄႉ ပၼ်ႇၵၢၼ်ယဝ်ႉၼႆသတေႃႉ ႁွင်ႈၵၢၼ်တၢင်ႇၸိူဝ်းတႄႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ ယင်းပႆႇပၼ်ႇၵၢၼ်လႆႈ ဝႃႈၼႆ။

တႅမ်ႈ – ၽူၺ်းၼုမ်ႇ