မိူဝ်ႈဝၼ်းတီႈ 01/05/2025 သိုၵ်းမၢၼ်ႈ ၸီႉသင်ႇႁႂ်ႈ ၶႃႈႁၢပ်ႇၵၢၼ်ၶုၼ်တင်းသဵင်ႈ ပိုတ်ႇၶိုၼ်း ႁွင်ႈၵၢၼ်လူင်ပွင်ၸိုင်ႈ ၼႂ်းဝဵင်းလႃႈသဵဝ်ႈသေ တႄႇပၼ်ႇၵၢၼ်ၵႂႃႇၼႆသေတႃႉ ႁူင်းယႃလူင်ၵူၼ်းမိူင်းတႄႉ ယင်းပႆႇၸၢင်ႈႁပ်ႉၵူၼ်း ပဵၼ်။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ် ၾၢႆႇလိူမ်ႈလႆႇ၊ ပၢႆးပၺ်ႇၺႃႇ၊ ၾၢႆႇၵူတ်ႇထတ်းၶဝ်ႈဢွၵ်ႇ မိူင်း (လဝက)  တင်း ၾၢႆႇယူႇလီ ၸိူဝ်းၼႆႉ ႁွတ်ႈၽႅဝ်ဝႆႉၶိုၼ်း ၼႂ်းဝဵင်းၵမ်ႈၼမ်ယဝ်ႉသေ ၵမ်ႈၽွင်ႈတႄႇႁဵတ်းၵၢၼ်ယူႇ ယဝ်ႉၼႆ ၵူၼ်းမိူင်းပိုၼ်ႉတီႈ ၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼင်ႇၼႆ။

“ မိူဝ်ႈလဵဝ် ႁူင်းယႃလူင်ၵူၼ်းမိူင်းတႄႉပိုတ်ႇယူႇ။ မိူဝ်ႈဝႃးၵႂႃႇထၢမ်တူၺ်းတႄႉ ၶဝ်ဝႃႈ ၸူဝ်ႈၶၢဝ်းၼႆႉ တေပႆႇၸၢင်ႈႁပ်ႉ ၵူၼ်းပဵၼ်ၶိုၼ်းၼႆဢိူဝ်ႈ။ ၸဵမ်ၵူႇၼွၼ်း၊ ယႃႈယႃၸိူဝ်းၼႆႉ ဢမ်ႇပႆႇမီးသင်။ ၵဝ်ႈၵၢင်ႉၶဝ် တေႃႉဢဝ်ၵႂႃႇမူတ်း။ တဝ်ႈ ဢွၵ်ႊသီႊၵျိၼ်ႊၼႆႉ မိူဝ်ႈဢွၼ်တၢင်း မီးယူႇ 1000 ပၢႆ ။ ၶဝ်တေႃႉဢဝ်ၵႂႃႇမူတ်း – ဝႆႉပၼ် 100 လုၵ်ႈၵွၺ်း။ ၼၼ်ႉႁမ်ႉ ပဵၼ်ဢၼ်ဢမ်ႇၸႂ်ႉလႆႈ ဢမ်ႇလီလၢႆလၢႆ ။ ယွၼ်ႉၼၼ် မိူဝ်ႈလဵဝ် ၶဝ်တိုၵ်ႉႁဵတ်းလႆႈ လွင်ႈမူတ်းသႂ် ပတ်းပတ်းၽဵဝ်ႈၽဵဝ်ႈ ႁူင်းယႃၵွၺ်း။ ပႆႇၸၢင်ႈႁပ်ႉၵူၼ်းပဵၼ်တေႉတေႉ။ ၶဝ်တေၶိုင်ႁႂ်ႈၽုၺ်ႇလႆႈ OPT (ၵူၼ်းပဵၼ်တၢင်းၼွၵ်ႈ) ဢွၼ်တၢင်း ၵွၺ်းၼႆ။”

လႆႈႁူႉဝႃႈ လူတ်ႉၵႃးႁူင်းယႃ ဢၼ်ၸႂ်ႉတိုဝ်း တေႃႉတၢင်ႇႁပ်ႉၵူၼ်းပဵၼ် တီႈႁူင်းယႃလူင်ၵေႃႈ သိုၵ်းၵဝ်ႈၵၢင်ႉ MNDAA ဢဝ်ၵႂႃႇပႃးလႄႈ သင်မီးလွင်ႈတၢင်းလူဝ်ႇၵႂႃႇႁပ်ႉၵူၼ်းပဵၼ်ထိုင်တီႈၸိူဝ်းၼႆႉၸိုင် တေပႆႇၸၢင်ႈၸတ်းၵၢၼ် ႁဵတ်းၵၢၼ် လွင်ႈၵႂႃႇႁပ်ႉၵူၼ်းပဵၼ်ၸဵမ်ၸိူဝ်းၼႆႉ ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉၼိုင်ႈ ဢၼ်ၸမ်ၸႂ်ၵၼ်တင်း ၽူႈႁၢပ်ႇၵၢၼ် ၼႂ်းႁူင်းယႃလူင် ဝဵင်းလႃႈသဵဝ်ႈ လၢတ်ႈၼႄဝႃႈ “ၵႃး ဢၼ်ႁူင်းယႃလူင်ပႅင်ႇၵမ်းသိုဝ်ႈ ၵႃးတၢင်ႇၵူၼ်းပဵၼ်ၼၼ်ႉ တင်းမူတ်းမီးယူႇ 4 လမ်းၼႆႉ ၵဝ်ႈၵၢင်ႉၶဝ်ဢဝ်ၵႂႃႇ 3 လမ်း။ ပႃးၵႃးလမ်းဢၼ် လုၵ်ႉတၢင်းမိူင်း ၻူႊပၢႆႊ မႃး။ ၼၼ်ႉၵေႃႈၶဝ်ဢဝ်ၵႂႃႇ။ မိူဝ်ႈလဵဝ်တီႈႁူင်းယႃလူင်ၼႆႉ ၵိုတ်းဝႆႉၵႃးယွၵ်း လမ်း ၼိုင်ႈၵွၺ်း” ဝႃႈၼႆ။

လူင်ပွင်ၸိုင်ႈမိူင်းၶႄႇ မိပ်ႇငႅၼ်းႁႂ်ႈသိုၵ်းၵဝ်ႈၵၢင်ႉ MNDAA ထွႆဢွၵ်ႇပၼ် ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉလႄႈ တႄႇၵၢင်လိူၼ်ဢေႇ ပရႄႇမႃး သိုၵ်းၵဝ်ႈၵၢင်ႉ တေႃႉဢဝ် ၶူဝ်းၸႂ်ႉတိုဝ်းၼႂ်းႁူင်းယႃလူင် လႄႈ ၶိူင်ႈၾႆးၾႃႉ ဢိၵ်ႇတင်း ၶူဝ်းၶွင်ၸိူဝ်းမီးၵႃႈၶၼ် ယႂ်ႇ ဢၼ်ၶိုၵ်ႉၶႅမ်ႉတင်းသဵင်ႈ ဢွၵ်ႇဝဵင်းလႃႈသဵဝ်ႈ မုင်ႈၼႃႈၵႂႃႇတၢင်းဝဵင်းသႅၼ်ဝီ- လၢဝ်ႇၵၢႆး ၸဵမ်ၸိူဝ်းၼႆႉ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ မီးတူဝ်တႅၼ်းလူင်ပွင်ၸိုင်ႈမိူင်းၶႄႇ ၶဝ်ႈမႃးပၵ်းသဝ်းယူႇဝႆႉ ပိူဝ်ႈတႃႇ ပၵ်းတႃႇပႂ်ႉတူၺ်း လွင်ႈငမ်းယဵၼ် ႁိုဝ် ၵၢၼ်ၵိုတ်းတိုၵ်း သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ MNDAA ၼႆသေတႃႉ ၼႂ်းဝဵင်း လႃႈသဵဝ်ႈၼႆႉ လႅင်းၾူၼ်း၊ ဢိၼ်ႊထိူဝ်ႊၼႅတ်ႊ၊ ၾႆးၾႃႉ ၸိူဝ်းၼႆႉ ယင်းပႆႇ ၸႂ်ႉတိုဝ်းလႆႈလီငၢမ်း မိူၼ်ၵဝ်ႇ။ သဵၼ်ႈတၢင်း ၵႃႉၶၢႆၵေႃႈ ပႆႇပိုတ်ႇၶိုၼ်းတႄႉတႄႉလႄႈ ၶၼ်ၵုၼ်ႇၼႂ်းဝဵင်းလႃႈသဵဝ်ႈ ယင်းပႆႇလူတ်းယွမ်းၶိုၼ်းတေႉတေႉ။

တႅမ်ႈ- ၽူၺ်းၼုမ်ႇ