ၵူၼ်းၸၢႆးၵေႃႉၼိုင်ႈ ဢႃယု 53 ပီ ယူႇဢိူင်ႇလဝ်ႇမီ ၸႄႈဝဵင်းၻွၼ်ႊတၢၼ်ႊ ၸႄႈတွၼ်ႈမုၵ်းတႃႊႁၢၼ်ႊ မိူင်းထႆး တၢႆယွၼ်ႉၵိၼ်ၼိူဝ်ႉလႅင် (ၼိူဝ်ႉဝူဝ်း) လိပ်း။
မၼ်းၸၢႆးၼႆႉ ပဵၼ်ၵူၼ်းႁဵတ်းၵၢၼ်ၵေႃႇသၢင်ႈ၊ မၼ်းၸၢႆး ၵႂႃႇၸွႆႈပွႆးလူႇတၢၼ်းၼႂ်းဝၢၼ်ႈ၊ ယဝ်ႉၵေႃႈ မၼ်းၸၢႆးပဵၼ်ၵူၼ်းထိူဝ်ၼိူဝ်ႉ၊ သႃႈၼိူဝ်ႉသေ ၵိၼ်ၼိူဝ်ႉလိပ်းမိူဝ်ႈဝၼ်းတီႈ 24/04/2025။
ဝၢႆးၼၼ်ႉ မၼ်းၸၢႆးပဵၼ်ၸဵပ်းတီႈမိုဝ်း၊ တီႈမိုဝ်းမၼ်းၸၢႆးမိူၼ်ၼိူဝ်ႉၼဝ်ႈသေ လမ်ၵႂႃႇ။ ဝၢႆးၼၼ်ႉ မၼ်းၸၢႆးပဵၼ်ၼၢဝ် ၸဵပ်းမူၺ်ႈၸွမ်းတူဝ်ၶိင်းသေ လူႉတၢႆၵႂႃႇမိူဝ်ႈဝၼ်းတီႈ 30/04/2025။
တၢင်းႁူင်းယႃ ယိုၼ်ယၼ်ဝႃႈမၼ်းၸၢႆး ပဵၼ်တၢင်းပဵၼ်ၸိူဝ်ႉမႅင်း Anthrax ဢႅၼ်ႊထရႅၵ်ႊသ် လၢမ်းၽႄႈၼႂ်းလိူတ်ႈသေၸင်ႇလူႉတၢႆ ဝႃႈၼႆ။
ၼႂ်းဝၼ်းပွႆးလူႇတၢၼ်း ၼႂ်းဝၢၼ်ႈဝၼ်းၼၼ်ႉ မီးၵူၼ်းယိပ်းလႄႈ ၵိၼ်ၼိူဝ်ႉလိပ်း 247 ၵေႃႉ။ ၵူၼ်းထိူဝ် 28 ၵေႃႉလႄႈ ၵူၼ်းၵိၼ် 219 ၵေႃႉ။ တေႃႇထိုင်ယၢမ်းလဵဝ် ၵူၼ်းဢၼ်မီးၼႂ်းငဝ်းလၢႆးလႆႈမႆႈၸႂ်ႁႅင်း (ယွၼ်ႉၵိၼ်ၼိူဝ်ႉဝူဝ်းလိပ်းၼႂ်းပွႆးၼၼ်ႉ) မီး 129 ၵေႃႉ။ မေႃယႃၼႂ်းၸႄႈဝဵင်း ဢွၼ်ၵၼ်တူၺ်းလူလုမ်းလႃး လဵင်ႉယႃႈယႃဝႆႉယူႇ။
တၢင်းပဵၼ်ၸိူဝ်ႉမႅင်း Anthrax ဢႅၼ်ႊထရႅၵ်ႊသ်ၼႆႉ ပဵၼ်တၢင်းပဵၼ် ၸိူဝ်ႉမႅင်းပႅတ်ႊထီႊရီႊယႃႊႁၢႆႉႁႅင်း။ ဢၼ်ႇဢမ်ႇသူႈလႆႈႁၼ်ဝႃႈ လၢမ်းၽႄႈၼႂ်းၼိူဝ်ႉၼႂ်းလိူတ်ႈသေ ႁဵတ်းႁႂ်ႈ ၵူၼ်းထိုင်တၢႆ။ ၵူၺ်းၵႃႈ ပေႃးမီးလွင်ႈလၢမ်းၽႄႈၸိူင်ႉၼႆၵေႃႈ ၸၢင်ႈပဵၼ်ၽေးၽႄႈလၢမ်းႁၢဝ်ႈႁႅင်းလႄႈ ပဵၼ်ဢၼ်လီလႆႈမႆႈၸႂ်လႄႈ ၾၢႆႇပၢႆးယူႇလီ မိူင်းထႆး ပိုၼ်ၽၢဝ်ႇဝႆႉ ႁၢမ်ႈ ၵိၼ်ၼိူဝ်ႉလိပ်း – ဝႃႈၼႆဝႆႉ။
ဢၢင်ႈဢိင် – သိုဝ်ႇၶၢဝ်ႇထႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ