ဝၢႆးလင် လူင်ပွင်ၸိုင်ႈမိူင်းၶႄႇ မိပ်ႇငႅၼ်းႁႂ်ႈသိုၵ်းၵဝ်ႈၵၢင်ႉ ထွႆဢွၵ်ႇၵႂႃႇၼႂ်းဝဵင်းလႃႈသဵဝ်ႈသေ ပၼ်တိုဝ်ႉ တၢင်းသိုၵ်းမၢၼ်ႈ ၶဝ်ႈမႃးၵုမ်းၵမ်ၶိုၼ်း ၼႂ်းဝဵင်းၼၼ်ႉ ၽူႈယႂ်ႇၵူၼ်းလူင် ၼႂ်းတပ်ႉသိုၵ်းမၢၼ်ႈ ဢိၵ်ႇၶႃႈ ႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်လူင်ပွင်ၸိုင်ႈၽႅဝ်ဝႆႉၶိုၼ်း။

တႄႇဝၼ်းတီႈ 01/05/2025 သိုၵ်းမၢၼ်ႈ ၸီႉသင်ႇႁႂ်ႈ ၶႃႈႁၢပ်ႇၵၢၼ်ၶုၼ်တင်းသဵင်ႈ ႁႂ်ႈပိုတ်ႇၶိုၼ်း ႁူင်းယႃ၊ ႁွင်ႈၵၢၼ် ၾၢႆႇလိူမ်ႈလႆႇ၊ ႁွင်ႈၵၢၼ် ပၢႆးပၺ်ႇၺႃႇ၊ ႁွင်ႈၵၢၼ် ၾၢႆႇၵူတ်ႇထတ်းၶဝ်ႈဢွၵ်ႇမိူင်း (လဝက) ၸဵမ်ၸိူဝ်းၼႆႉ – ၵူၼ်းမိူင်းပိုၼ်ႉတီႈ ၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄၼင်ႇၼႆ။

“မိူဝ်ႈလဵဝ် ၵူၼ်းႁဵတ်းၵၢၼ်လုမ်းၶဝ် ၽႅဝ်ဝႆႉၶိုၼ်း ၼႂ်းဝဵင်းတင်းၼမ်ယဝ်ႉ။ မိူဝ်ႈဝႃး ၼႂ်းဝၢင်းႁူင်းယႃလူင်ၼႆႉ ႁၼ်ၵူၼ်းႁဵတ်းၵၢၼ်ၶဝ် မႃးပေႃးတဵမ်ၵႂႃႇမူတ်း။ ၸွမ်းတၢင်းၵေႃႈ မိူဝ်ႈလဵဝ် လႆႈႁၼ် မေႃႇတေႃႇပီႇၵႄႇ ၶိုၼ်းယဝ်ႉ။ ၾၢႆႇၸွပ်ႇၶၢဝ်ႇ (SP) ၶဝ်ၸိူဝ်းၼႆႉၵေႃႈၽႅဝ်ဝႆႉ။ ၶႂ်ႈဝႃႈ ၶဝ်ၶဝ်ႈမႃးၸေးႁွင်ႈၵၢၼ်မၼ်းယဝ်ႉ။ ၵူၺ်းမၼ်းၵေႃႈ တေဢမ်ႇပႆႇၸေးမူတ်းၼင်ႇၵဝ်ႇ။ ၵွပ်ႈဝႃႈ ၶဝ်တေလႆႈပိုတ်ႇၼႄၵႂႃႇ ႁႂ်ႈမၼ်းပေႃးၶဝ်ႈပိူင် မၼ်းၵႃႈၼၼ်ႉၵူၺ်း”။

တႄႇဝၼ်းတီႈ 03/04/2025 မႃး သိုၵ်းၵဝ်ႈၵၢင်ႉ ဢဝ်ႁႅင်းၵူၼ်းဢိၵ်ႇ ႁႅင်းၶိူင်ႈၶူဝ်းၸႂ်ႉတိုဝ်း ၼႂ်းႁူင်းယႃ လူင်ၵူၼ်းမိူင်း တင်းသဵင်ႈထွႆဢွၵ်ႇဝဵင်းလႃႈသဵဝ်ႈလႄႈ ႁဵတ်းႁႂ်ႈၵူၼ်းမိူင်းဢမ်ႇႁၼ်လီၸွမ်းတင်းၼမ်။ သိုၵ်းမၢၼ်ႈ ၶဝ်ႈမႃးၵုမ်းၵမ်ၶိုၼ်းၵေႃႈ ၶိူင်ႈတႃႇၸႂ်ႉတိုဝ်းၼႂ်းႁူင်းယႃၼႆႉ တေဢမ်ႇၸေးၸုမ်ႇၶိုၼ်းမိူၼ် ၵဝ်ႇ၊ တႃႇတေသိုဝ်ႉမႂ်ႇၶိုၼ်းၵေႃႈဢမ်ႇငၢႆႈၼႆ ၵူၼ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။

“ပေႃးမိူၼ်ၾၢႆႇႁူင်းယႃၼႆႉ သိုၵ်းမၢၼ်ႈပိုတ်ႇၶိုၼ်းၵေႃႈ တေဢမ်ႇပေႃးၶႅမ်ႉၵႃႈႁိုဝ်။ ယွၼ်ႉဝႃႈ ၶိူင်ႈၶူဝ်း ဢၼ်ၶႅမ်ႉမၼ်းၼႆႉ ၵဝ်ႈၵၢင်ႉၶဝ် ပေႃးတေႃႉၵႂႃႇမူတ်းယဝ်ႉလူး။ ၼႂ်းႁူင်းယႃ ၼႆႉ မၼ်းဢမ်ႇမီးသင်ယဝ်ႉ။ သိုၵ်းမၢၼ်ႈၼႆႉ တႃႇဝႃႈၶဝ်တေမီးၼမ်ႉၸႂ်မႅတ်ႉတႃႇတေႃႇၵူၼ်းမိူင်းႁႄ သိုဝ်ႉၶိူင်ႈၸႂ်ႉၶူဝ်းတိုဝ်းမႂ်ႇမႂ်ႇမႃး သႂ်ႇပၼ်ဢၼ်ဝႃႈၼၼ်ႉ မၼ်းဢမ်ႇမီးလေႃႇ။ ၶဝ်မီးဢၼ်လႂ်ၵေႃႈ ၶဝ်တေဢဝ်ၸိူင်ႉၼၼ် ၸႂ်ႉၵႂႃႇမွၵ်ႈၼၼ်ႉၵူၺ်း။ ပေႃးပဵၼ်လွင်ႈယႂ်ႇမႃးၵေႃႈ ၵူၼ်းမိူင်းတိုၼ်းတုၵ်ႉၶယူႇယဝ်ႉ။ မဵဝ်းသိုၵ်းမၢၼ်ႈၼႆႉ ၶဝ်ဢမ်ႇတွၼ်ႉႁဵတ်းလီတေႃႇၵူၼ်းမိူင်းႁႄပွၵ်ႈလူး”။

ယွၼ်ႉလူင်ပွင်ၸိုင်ႈမိူင်းၶႄႇ မိပ်ႇငႅၼ်းလႄႈ ႁၢင်လိူၼ်ဢေႊပရိူဝ်ႊမႃး သိုၵ်းၵဝ်ႈၵၢင်ႉ ထွႆဢွၵ်ႇၵႂႃႇၼႂ်း ဝဵင်းလႃႈသဵဝ်ႈတင်းသဵင်ႈသေ သိုၵ်းမၢၼ်ႈတႄႇဢဝ်ႁႅင်းၵူၼ်း၊ ႁႅင်းသိုၵ်းလႄႈ ၶိူင်ႈၵွင်ႈၵၢင်ႇ ၶဝ်ႈမႃးပၵ်း တပ်ႉယူႇသဝ်းဝႆႉသေ ၵုမ်းၵမ် ၼႂ်းဝဵင်းလႃႈသဵဝ်ႈ တႃႇ 12 ပွၵ်ႉ။

တႄႇသိုၵ်းမၢၼ်ႈၵုမ်းၵမ်ၶိုၼ်း 12 ပွၵ်ႉ ၼႂ်းဝဵင်းလႃႈသဵဝ်ႈမႃး ၽူႈလၵ်ႉၵူၼ်းၸူၼ်လႄႈ လွင်ႈၶႃႈႁႅမ်ၵၼ်တၢႆ ၸိူဝ်းၼႆႉ ၼမ်လိူင်ႇၶိုၼ်ႈမႃး လိူဝ်ၵဝ်ႇၶိုၼ်း။ ၾၢႆႇသိုၵ်းမၢၼ်ႈတႄႉ ဢမ်ႇႁပ်ႉပုၼ်ႈၽွၼ်း ဢဝ်လိူင်ႈ ၸတ်းၵၢၼ်ပၼ်သင် ဝႃႈၼႆ။

လႆႈႁူႉဝႃႈ ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ လႅင်းၾူၼ်း၊ ဢိၼ်ႊထိူဝ်ႊၼႅတ်ႊ၊ ၾႆးၾႃႉ ၸိူဝ်းၼႆႉ ယင်းပႆႇ ၸႂ်ႉတိုဝ်းလႆႈလီငၢမ်း မိူၼ်ၵဝ်ႇၶိုၼ်းၵူၺ်းဢမ်ႇၵႃး သဵၼ်ႈတၢင်းၵႃႉၶၢႆၵေႃႈ ပႆႇပိုတ်ႇၶိုၼ်းတႄႉတႄႉလႄႈ ၶၼ်ၵုၼ်ႇၼႂ်းဝဵင်းလႃႈသဵဝ်ႈ ယင်းပႆႇလူတ်းယွမ်းၶိုၼ်း ၼႆယဝ်ႉ။  

တႅမ်ႈ – ၽူၺ်းၼုမ်ႇ