ၸွမ်သိုၵ်းလူင် ၵျေႃႇသႂႃႇလိၼ်း ၾၢႆႇၵုမ်းၵမ် တပ်ႉၼမ်ႉ တပ်ႉလူမ်း တပ်ႉလိၼ် သိုၵ်းမၢၼ်ႈ လၢတ်ႈဝႃႈ တေယိုဝ်းဢဝ်ၶိုၼ်းဝဵင်း ဢၼ်လႆႈပွႆႇၽႃႈဝႆႉတင်းသဵင်ႈ ၼႂ်းမိူင်းမၢၼ်ႈပတ်းပိုၼ်ႉ ဝႃႈၼႆ။

ၶေႃႈၼႆႉ ၸွမ်သိုၵ်းလူင် ၵျေႃႇသႂႃႇလိၼ်း လၢတ်ႈၵႂႃႇ တီႈပၢင်ၵုမ် ၵဵဝ်ႇၵပ်းၽႅၼ်ၵၢၼ်သိုၵ်း ၼွင်ၶဵဝ်၊ မၢၼ်ႈမေႃႇ၊ ၽႃၵၢၼ်ႉ၊ ပၢၼ်ႇတွင်းလႄႈ ဢေႊရႃႇဝတီႇ မိူဝ်ႈဝၼ်းတီႈ 27/04/2025 ၼႆႉ တီႈလုမ်းငဝ်းငုၼ်းၾၢႆႇၵႅတ်ႇၶႄ ဝႃႈၼႆ။

တႃႇတေသူင်ႇၶိူင်ႈၵွင်ႈၵၢင်ႇတင်း ထႅမ်ႁႅင်းသိုၵ်း တီႈပဵၼ်ပၢင်တိုၵ်းၼၼ်ႉ သိုၵ်းမၢၼ်ႈ ပၼ်သုၼ်ႇ ၸႂ်ႉၶိူင်ႈမိၼ်သိုၵ်း တီႈတပ်ႉၾၢႆႇတေႃႉသူင်ႇလႄႈ ၾၢႆႇၵွပ်ႇၵူႈသိုၵ်းမၢၼ်ႈဝႆႉယဝ်ႉ ဝႃႈၼႆ။

ယွၼ်ႉပိဝ်ႇႁႃႇ ၽႅၼ်ၵၢၼ်သိုၵ်း ၸွမ်သိုၵ်းလူင် ၵျေႃႇသႂႃႇလိၼ်းသေ ဝဵင်းဢိၼ်းတေႃႇ ဢၼ်ပဵၼ်ပၢင်တိုၵ်းၵၼ်မႃး ႁိုင်ၶၢဝ်းတၢင်း 8 လိူၼ်ၼၼ်ႉ လႆႈပွႆႇၽႃႈပၼ် သိုၵ်းလုၵ်ႉၽိုၼ်ႉ ယိုတ်းၵုမ်းလႆႈ ၵႂႃႇ။ ဝၢႆးလင်ၼၼ်ႉ ၽူႈၵွၼ်းတပ်ႉ တီႈၼႃႈလိၼ်သိုၵ်းၼၼ်ႉ ၸႂ်ႉလၢႆးတိုၵ်းႁင်းၽႂ်မၼ်းသေ ယိုဝ်းတိုၵ်း ၸုမ်းလုၵ်ႉၽိုၼ်ႉၶိုၼ်းၼႆ ၽူႈၸမ်ၸႂ်တင်းသိုၵ်းမၢၼ်ႈ တပ်ႉမ 77 တွပ်ႇဝႆႉတီႈသိုဝ်ႇ DVB ၼင်ႇၼႆ။

ၸွမ်သိုၵ်းလူင် ၵျေႃႇသႂႃႇလိၼ်းၼႆႉ မိူဝ်ႈဝၼ်းတီႈ 18/12/2024 ၼၼ်ႉ ထုၵ်ႇယုၵ်ႉယွင်ႈပဵၼ်မႃး ၸၼ်ႉၸွမ်သိုၵ်းလူင် ၾၢႆႇငူပ်ႉငီႉၵုမ်းၵမ် တပ်ႉၼမ်ႉ တပ်ႉလူမ်း တပ်ႉလိၼ်။

ၼႂ်းမိူင်းမၢၼ်ႈပတ်းပိုၼ်ႉၼႆႉ တပ်ႉသိုၵ်းမၢၼ်ႈ လႆႈပွႆႇၽႃႈဝႆႉ တပ်ႉငဝ်ႈငုၼ်းတိူင်းသိုၵ်း 2 တီႈ၊ တပ်ႉပၢင်သဝ်း 146 တီႈလႄႈ ဝဵင်း 90 ပၢႆ တေႃႇထိုင်ယၢမ်းလဵဝ် ပႆႇယိုတ်းလႆႈၶိုၼ်း။