မိူဝ်ႈၼႆႉ ဝၼ်းတီႈ 30/04/2025 ယၢမ်းဝၢႆးဝၼ်းမွၵ်ႈ 1 မူင်း ႁွင်ႈၵဵပ်းယၢမ်း တႅၵ်ႇၽူင်ႉ တီႈဝၢၼ်ႈၼႃးမႂ်ႇ ပွၵ်ႉ 2 ဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႉ တိူဝ်ႉၺႃးၵူၼ်းလူႉတၢႆ 1 ၵေႃႉ၊ မၢတ်ႇၸဵပ်း ဢမ်ႇယွမ်း 3 ၵေႃႉ။
ၵူၼ်းပိုၼ်ႉတီႈ ဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈ ဢၼ်မၢၵ်ႇတႅၵ်ႇၼႆႉ ပဵၼ်တီႈႁွင်ႈထႅဝ် ဢၼ်မီးၼႂ်းပွၵ်ႇ 2 ။ မၢၵ်ႇဢၼ်တႅၵ်ႇၼႆႉ ၵမ်ႈၽွင်ႈဝႃႈ ပဵၼ်ဢွင်ႈတီႈၵဵပ်းယၢမ်း၊ ၵမ်ႈၽွင်ႈဝႃႈ ပဵၼ်မၢၵ်ႇပွႆႇပႃ ဢၼ်မီးၼႂ်းႁွင်ႈထႅဝ်ၼၼ်ႉတႅၵ်ႇ။ မၢၵ်ႇတႅၵ်ႇၵမ်းၼႆႉ မီးၵူၼ်းမၢတ်ႇၸဵပ်းၸွမ်း ဢမ်ႇယွမ်း 3 ၵေႃႉ၊ လူႉတၢႆ 1 ၵေႃႉ။ ႁွင်ႈထႅဝ်ၸိူဝ်းၼႆႉ ၵေႃႈ လႆႈလူႉၵွႆၸွမ်းထႅင်ႈၼမ်”- ဝႃႈၼႆ။
သိုပ်ႇလၢတ်ႈဝႃႈ – “ယွၼ်ႉႁႅင်းယွၼ်ႈမၢၵ်ႇတႅၵ်ႇၼႆႉသေ ႁဵတ်းႁႂ်ႈတုမ်ႉယွၼ်ႈထိုင်ႁူင်းႁေႃ ၵေႃလိၵ်ႈလၢႆး ဝဵင်းတၢင်ႉယၢၼ်း ၽၵ်းတူႇမၢၼ်ႇလႄႈ တိူမ်း ၵေႃလိၵ်ႈလၢႆး ၸိူဝ်းၼႆႉၵေႃႈ လႆႈလူႉၵွႆပႃး”- ဝႃႈၼႆ။
တီႈၼႂ်းပွၵ်ႉ 2 ဝၢၼ်ႈၼႃးမႂ်ႇၼႆႉ တေမီးလၢႆၸၢဝ်းၶိူဝ်းယူႇသဝ်းဝႆႉ။ မိူၼ်ၼင်ႇ – ၸၢဝ်းၶႄႇ (ပၢၼ်းသေး)၊ တႆး၊ ဝႃႉလႄႈ ၵူၼ်းပၢႆႈၽေးသိုၵ်း ၵေႃႈမီး။ ယွၼ်ႉမၢၵ်ႇမိုဝ်ႉၸိုၼ်းယၢမ်း တႅၵ်ႇၽူင်ႉၼႆႉသေ သင်ဢမ်ႇ လူင်ႉလႅၼ်ႇ လွင်ႈၵၢၼ်ၸႂ်ႉတိုဝ်းၼႆႉ ထုၵ်ႇလီၾၢင်ႉ(သတိ) ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ