မိူဝ်ႈဝႃးဝၼ်းတီႈ 13/11/2025 ၵူၼ်းမိူင်းဝဵင်းတၢင်ႉယၢၼ်းထူပ်းႁၼ်တူဝ်တၢႆၵူၼ်းၵေႃႉၼိုင်ႈဢမ်ႇႁူႉဝႃႈပဵၼ်ၽႂ်- မီးယူႇတီႈၵွင်ယုၵ်းယၢၵ်းၼိူဝ်သဵၼ်ႈတၢင်းလူင် ဢၼ်လုၵ်ႉဝဵင်းတၢင်ႉယၢၼ်း တေဢွၵ်ႇၵႂႃႇၸူး ပၢင်သၢင်း။

ၵူၼ်းတၢႆၼၼ်ႉ ပဵၼ်ၽူႈၸၢႆး။  လႅပ်ႈၺႃးသမ်းၶဵမ်ဝႆႉႁိုဝ်ဢမ်ႇၼၼ်ယူတ်းယႃၸဵပ်းသေတီႈတီႈၼႆ ၼၢင်းယိင်း သႅၼ်းပၢၼ်ၵူၼ်းၼုမ်ႇ ယူႇဝဵင်းတၢင်ႉယၢၼ်းၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။  

“ လုၵ်ႈဢွၼ်ႇၵႂႃႇလဵၼ်ႈတၢင်းပုၼ်ႉသေၸင်ႇထူပ်းႁၼ်ၺႃးၶႃႈဢေႃႈ။ၵူၼ်းဢၼ်တၢႆဝႆႉၼၼ်ႉ ပဵၼ်ၵူၼ်းၸၢႆးၶႃႈဢေႃႈၼၼ်ႉ။ တီႈတူဝ်တၢႆမၼ်းၵေႃႈ လႆႈႁၼ်ႁွႆးသမ်းၶဵမ်ဝႆႉ။ ၼုၼ်းၵုၺ်  တိုၵ်ႉၸပ်းဝႆႉၸွမ်းၶႅၼ်မၼ်းဝႆႉယူႇ။   တီႈၶေႃႈမိုဝ်းၵေႃႈ မီးႁွႆးမၢတ်ႇၸဵပ်းဝႆႉသေဢၼ်ဢၼ်”– ဝႃႈၼႆ။

 ယၢမ်းလဵဝ် ၾၢႆႇၸွႆႈထႅမ်ၶႅၵ်ႇလီပၢင်ၸႃႉၶဝ် လႆႈဢဝ်ၶၢပ်ႈတူဝ်မၼ်းၸၢႆးၵႂႃႇယဝ်ႉ။  ၵူၼ်းတၢႆၵေႃႉၼႆႉပဵၼ်ၽႂ်လုၵ်ႉလႂ်မႃးၼႆၽႂ်ၵေႃႈဢမ်ႇႁူႉၸၵ်း ဢမ်ႇယၢမ်ႈႁၼ်။ ၵမ်ႈၽွင်ႈလၢမ်းၶၢတ်ႈဝႃႈလႅပ်ႈပဵၼ်ၵူၼ်းၵျႃႊၽျႅၼ်ႉ ဢၼ်လုၵ်ႉတၢင်ႇတီႈမႃး  ဝႃႈၼႆ။

 ၸၢႆးၼုမ်ႇသႅၼ်းပၢၼ်ၶၢဝ်ႉ ၵူၼ်းမိူင်းတၢင်ႉယၢၼ်းလၢတ်ႈတီႈၽူႈတွႆႇႁွၵ်ႈဝႃႈ-“ဢၼ်တၢႆၵႂႃႇၼႆႉ မၼ်းဢမ်ႇလႅပ်ႈၸႂ်ႈ ၵူၼ်းမိူင်းဝဵင်းတၢင်ႉယၢၼ်း။ ပီႈၼွင်ႉၸိူဝ်ႉၶိူဝ်းမၼ်းၵေႃႈ ဢမ်ႇမႃးၶႆႈ မႃးႁႃ။ မၼ်းလႅပ်ႈတေပဵၼ်ၵူၼ်းတၢင်ႇတီႈတၢင်ႇမိူင်းၼၼ်ႉၼႃႇ။ ပိူၼ်ႈတႄႉဢွၼ်ၵၼ်လၢမ်းၶၢတ်ႈဝႃႈ လႅပ်ႈတေပဵၼ် ၵူၼ်းၼႂ်းၵျႃးၽျႅၼ်ႉယူဝ်ႉၼႆ။ ယွၼ်ႉဝႃႈတီႈၶွပ်ႈမိုဝ်းမၼ်းၼၼ်ႉၵေႃႈ မိူၼ်မီးႁွႆးၶတ်းသေႃးမိုဝ်းဝႆႉသေ မီးႁွႆးသမ်းၶဵမ်ၸိူဝ်းၼႆႉပႃး ။”– ဝႃႈၼႆ။

ၵူၼ်းတၢႆၼႆႉ ဢမ်ႇယွမ်ႁႅင်း။ ဢမ်ႇၸႂ်ႈၾၢင်ႁၢင်ႈၵူၼ်းဢမ်ႇယူႇလီ။ ဢမ်ႇၸႂ်ႈၾၢင်ႁၢင်ႈၵူၼ်းၽၢၼ်ၵိၼ်းထိုင်တီႈဢမ်ႇမီးၵႃႈလုမ်းလႃးၶၢပ်ႈတူဝ်။ ၽႃႈႁူမ်ႇၶူဝ်းၼွၼ်းၸိူဝ်းၼႆႉပဵၼ်သႅၼ်းလီ။ မီးပႃးငိုၼ်းၸပ်းတူဝ်ၽွင်ႈယူႇ ။ ၵွပ်ႈၼႆလႄႈ ၵူၼ်းမိူင်းဝဵင်းတၢင်ႉယၢၼ်းတႄႉဢမ်ႇလႅပ်ႈပဵၼ်လႆႈ – ၵူၼ်းပိုၼ်ႉတီႈဢၼ်ၵႂႃႇႁၼ်မႃးလၢတ်ႈၽူႈတွႆႇႁွၵ်ႈၼင်ႇၼႆ။

ဝဵင်းတၢင်ႉယၢၼ်းပဵၼ်ဝဵင်းဢၼ်ဢမ်ႇတုမ်ႉတိူဝ်ႉယွၼ်ႉပၢင်တိုၵ်းၽႅၼ်ယၼ်ႇသိုၵ်း 1027။ ၵူၺ်းၵႃႈပဵၼ်တီႈ ၵူၼ်းပၢႆႈၽေးသိုၵ်းလၢႆတီႈလၢႆတၢင်းမႃးပိုင်ႈယူႇသဝ်းဝႆႉၽွင်းဝၢၼ်ႈမိူင်းလူႉ။ ၼႂ်းၶၢဝ်းတၢင်း 2-3 ပီမႃးၼႆႉ ၸုမ်းၵျႃႊၽျႅၼ်ႉၵေႃႈလိူင်ႇၼမ် – ႁၢၼ်ႉ KTV လႄႈ ႁူင်းမိပ်ႇၼူတ်ႈ ၸိူဝ်းၼႆႉၵေႃႈလိူင်ႇၼမ်မႃး တင်းမူတ်းဢမ်ႇယွမ်း 60 ႁၢၼ်ႉ – ၵူၼ်းပိုၼ်ႉတီႈလၢတ်ႈၼင်ႇၼႆ။

“ငဝ်းလၢႆးမိူဝ်ႈလဵဝ်မၼ်းဢမ်ႇမိူၼ်ၵူႈပီ။ ငိုၼ်းၵေႃႈႁႃယၢပ်ႇ။  လွင်ႈၵႂႃႇတႃႈပႆတၢင်းၵေႃႈ ဢမ်ႇလွတ်ႈလႅဝ်း။ လွင်ႈႁူမ်ႇလူမ်ႈ ၵေႃႈ ဢမ်ႇမီး။  ၵုမ်ႇလႆႈၵႆႉငိၼ်း ဢၼ်ပိူၼ်ႈၸူၼ်ၵၼ် ၸွမ်းၼႂ်းပွၵ်ႉ ၼႂ်းယွမ်ႇ၊ၵမ်ႈၽွင်ႈၺႃးၸူၼ်ၸွမ်းတႃႈၸွမ်းတၢင်း ။ၸိူဝ်းၼႆႉၵေႃႈမၼ်းတေၸၢင်ႈၵပ်းၵၢႆႇၵၼ်လႆႈယူႇ ၵွပ်ႈၼၼ်လႄႈ ပေႃးဝႃႈမၼ်းလိုၵ်းဢိတ်ႉၼိုင်ႈၸိူင်ႉၼႆၵေႃႈ ပိူၼ်ႈဢမ်ႇပေႃးႁတ်းဢွၵ်ႇႁိူၼ်းယေးၵၼ်ယဝ်ႉၶႃႈ။ ပေႃးမွၵ်ႈ 9−10 မူင်းၼႆ ယဵၼ်သီႇသီႇယဝ်ႉၶႃႈ။” – ၼၢင်းယိင်း ၵူၼ်းတၢင်ႉယၢၼ်းၼၼ်ႉလၢတ်ႈထႅင်ႈၼင်ႇၼႆ။

ဝဵင်းတၢင်ႉယၢၼ်းၼႆႉ တႄႇဢဝ် ႁူဝ်ပီ 2023 ၼၼ်ႉမႃး သိုၵ်းမၢၼ်ႈယိုတ်းမိူင်းတင်း ၸုမ်းသိုၵ်းဝႃႉ UWSA ႁူမ်ႈၵၼ်ၽွင်းငမ်းဝႆႉ ။ လိူဝ်ၼၼ်ႉၸုမ်းသိုၵ်းတႆး SSPP/SSA လႄႈ ၸုမ်းပျီႇတုၸျိတ်ႉလၢႆၸုမ်းၵေႃႈ မီးလွင်ႈတူင်ႉၼိုင်ၵႂႃႇမႃး ။