ဝၼ်းတီႈ 28/04/2025 ၵူၼ်း 5 ၵေႃႉ ၶဝ်ႈၸူၼ် ႁၢၼ်ႉၶၢႆၶမ်း သူၺ်ႇၸႃႇမၼီႇ (ရွှေဇာမဏီ) ၼႂ်းပွၵ်ႉဢွင်ႇပိၼ်ႇလႄႇ ၸႄႈဝဵင်းၶျၢမ်းမျႃႉတႃႇသီႇ တိူင်းဝဵင်းလိူဝ်ႇ သုမ်းၵႂႃႇၶမ်းမွၵ်ႈ 23 ၵျၢပ်ႈ (ၵိုင်ႇငိုၼ်းမွၵ်ႈ 1,600 သႅၼ်) လႄႈ ၾူၼ်း ဝႃႈၼႆ။

ဝၼ်းၼၼ်ႉ ယၢမ်းဝၢႆးဝၼ်းမွၵ်ႈ 3 မူင်း ၵူၼ်းၸၢႆး 5 ၵေႃႉ ၶီႇၵႃး Honda Insight (ႁွၼ်ႉတႃႇ ဢိၼ်းသၢႆႉ) သီလမ် လမ်းၼိုင်ႈ မႃးၵိုတ်းႁိမ်းႁၢၼ်ႉၶၢႆၶမ်းသေ ယိပ်းၵွင်ႈၶဝ်ႈၸူၼ်၊ ၸူၼ် 2 ၵေႃႉ ၼုင်ႈဝႆႉ ၶူဝ်းလၢႆးလွၵ်း။ ဝၢႆးပဵၼ်လွင်ႈၸူၼ်တီႈႁၢၼ်ႉၶၢႆၶမ်းယဝ်ႉ ပလိၵ်ႈသိုၵ်းမၢၼ်ႈ ဢိုတ်းသဵၼ်ႈတၢင်းသေ ၵူတ်ႇထတ်းယူႇသေတႃႉ တေႃႇထိုင်ဝၼ်းတီႈ 29 ၵၢင်ၼႂ်ၼႆႉ ပႆႇတီႇၺွပ်းလႆႈ။  

ပူၼ်ႉမႃး မိူဝ်ႈဝၼ်းတီႈ 28 လိူၼ်မၢတ်ႊၶျ်ၼၼ်ႉ ဢိင်ႇသၼ်ႇ (ၽႅၼ်ႇလိၼ်ဝႆ) ႁႅင်းယႂ်ႇ တီႈဝဵင်းလိူဝ်ႇၼႆႉသေ ၵူၼ်းမိူင်းလႆႈမၢတ်ႇၸဵပ်းလူႉတၢႆၼမ် တေႃႇထိုင်ယၢမ်းလဵဝ် ပႆႇၸၢင်ႈပူၵ်းပွင်ႁိူၼ်းယေးၶိုၼ်း။ ၾၢႆႇၼိုင်ႈသမ်ႉ ၽူႈလၵ်ႉၵူၼ်းၸူၼ် ၼမ်လိူင်ႇႁႅင်း ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ယူႇတီႈ ပလိၵ်ႈမၢၼ်ႈၵေႃႈ ဢမ်ႇဢဝ်ပုၼ်ႈၽွၼ်းပၼ်လႆႈ – သိုဝ်ႇၶၢဝ်ႇ Khit Thit Media ဢွၵ်ႇဝႆႉၼင်ႇၼႆ။