ၸဝ်ႈၼႃႈတီႈထႆး ၶဝ်ႈၵူတ်ႇထတ်း ႁၢၼ်ႉၵျေႃႇမူၼ်ႈ ဢႃႇသီႇၼၢၼ်းတေႃႇ (အာစီနန်းတော်) ဢၼ်ႁႅင်းၵၢၼ်မၢၼ်ႈပိုတ်ႇဝႆႉ တီႈဝဵင်းမႁႃႊၶျၢႆႊ ၸႄႈတွၼ်ႈသမုတ်ႊသႃၶွၼ်ႊ မိူင်းထႆးၼၼ်ႉ တီႉၺွပ်းလႆႈၶိူင်ႈၵွင်ႈၵၢင်ႇလႄႈ ယႃႈမဝ်းၵမ်တင်းၼမ်။
ဝၼ်းတီႈ 28/04/2025 ၼႆႉ ၸဝ်ႈၼႃႈတီႈထႆး လၢႆႁွင်ႈၵၢၼ် ႁႅင်းၵူၼ်းမွၵ်ႈ 200 ၶဝ်ႈၵူတ်ႇထတ်း ႁၢၼ်ႉၵျေႃႇမူၼ်ႈ၊ ႁၢၼ်ႉတၢင်းၵိၼ်၊ ႁၢၼ်ႉၵႃႇရႃႇဢူဝ်ႇၶေႇတင်း ဢွင်ႈတီႈလဵၼ်ႈသၼုၵ်ႊၵိူဝ်ႊ (ပိလိယႅၵ်ႉ) ဢၼ်ၸဝ်ႈၶွင်ပဵၼ်ႁႅင်းၵၢၼ်မၢၼ်ႈ ၼႂ်းဝဵင်းမႁႃႊၶျၢႆႊ။ ၼႂ်းႁွင်ႈ VIP ၼၼ်ႉ တႂ်ႈတီႈၼင်ႈလႄႈ ၵႄႈၽႃၸိူဝ်းၼႆႉ ၸဝ်ႈၼႃႈတီႈထႆးၵူတ်ႇထတ်းႁၼ် ယႃႈမဝ်းၵမ် မတ်ႉတႃၾႅတ်ႉတမိၼ်း (မက်သာဖတမင်း) ၊ မၢၵ်ႇၵွင်ႈတင်း ၶိူင်ႈၵွင်ႈၵၢင်ႇ ၵမ်ႈၽွင်ႈ ဝႃႈၼႆ။
ၸွမ်းၼင်ႇ ပၵ်းပိူင်မိူင်းထႆးမီးဝႆႉၼၼ်ႉ ႁႅင်းၵၢၼ်ၼွၵ်ႈမိူင်းၼႆႉ ဢမ်ႇမီးသုၼ်ႇႁဵတ်းၵၢၼ် မိူၼ်ၼင်ႇ ႁၢၼ်ႉၵျေႃႇမူၼ်ႈ ၊ ႁၢၼ်ႉတၢင်းၵိၼ် ဢိၵ်ႇပႃးထႅင်ႈလၢႆလၢႆသႅၼ်း။
မိူၼ်ၼႆ မိူဝ်ႈဝူင်ႈပူၼ်ႉမႃးၼႆႉၵူၺ်း ၸဝ်ႈၼႃႈတီႈထႆး တီႉၺွပ်းလႆႈ ၶိူင်ႈၵွင်ႈၵၢင်ႇတင်းၼမ် ၼႂ်းဝဵင်းၵဵင်းမႂ်ႇ ဢၼ်တေသူင်ႇၸူး ၸုမ်းသိုၵ်းယၢင်းၽိူၵ်ႇ KNU တၢင်းဝဵင်းမႄႈႁွင်ႈသွၼ် လႅၼ်လိၼ်ထႆး – မၢၼ်ႈ သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ