ၵူဝ်ႊရီႊယိူဝ်ႊႁွင်ႇယိုၼ်ယၼ် ပဵၼ်ပွၵ်ႈၵမ်းႁႅၵ်ႈဝႃႈ လႆႈသူင်ႇၵူၼ်းသိုၵ်း ၵႂႃႇၸွႆႈမိူင်းရတ်ႉသျႃး တီႈၼႂ်းပၢင်တိုၵ်းယူႊၶရဵၼ်ႊ ဝႃႈၼႆ။

ၶိမ်ႊၵျုင်ႊဢၢၼ်ႊ ႁူဝ်ၼႃႈမိူင်းၵူဝ်ႊရီႊယိူဝ်ႊႁွင်ႇ လၢတ်ႈဝႃႈ – ယူႇတီႈ မိူင်းၵူဝ်ႊရီႊယိူဝ်ႊႁွင်ႇသေ လႆႈသူင်ႇႁႅင်းသိုၵ်း ၸွႆႈထႅမ်သိုၵ်းရတ်ႉသျႃး တိုၵ်းတေႃးဢဝ်ၶိုၼ်း လႅၼ်လိၼ်ၵၢတ်ႉသ်ၼႆ – သိုဝ်ႇၶၢဝ်ႇၸိုင်ႈမိူင်း (KCNA) ႁၢႆးငၢၼ်းဝႆႉၼင်ႇၼႆ။

ဝၢႆးလင် ၽူႈၵွၼ်းသိုၵ်းသုင်သုတ်း မိူင်းရတ်ႉသျႃး ယုၵ်ႉယွင်ႈတၢင်းႁတ်းႁၢၼ် သိုၵ်းၵူဝ်ႊရီႊယိူဝ်ႊႁွင်ႇၵႂႃႇယဝ်ႉ ၽူႈဢွၼ်ႁူဝ်မိူင်းၵူဝ်ႊရီႊယိူဝ်ႊႁွင်ႇ ၸင်ႇဢွၵ်ႇမႃးယိုၼ်ယၼ် လၢတ်ႈပဵၼ်တၢင်းၵၢၼ်။

ၸုမ်းၾၢႆႇၸွပ်ႇၶၢဝ်ႇၶဝ် လၢတ်ႈဝႃႈ – ၼႂ်းၵူၼ်းသိုၵ်းၵူဝ်ႊရီႊယိူဝ်ႊႁွင်ႇ ဢၼ်သူင်ႇၵႂႃႇၸွႆႈမိူင်းရတ်ႉသျႃး 11,000 ၵေႃႉၼၼ်ႉ ၼႂ်းၶၢဝ်းတၢင်း 3 လိူၼ် လူႉတၢႆၵႂႃႇ ၼိုင်ႈႁဵင်ပၢႆ။ ၾၢႆႇရတ်ႉသျႃးတႄႉ လၢတ်ႈဝႃႈ ၵုမ်းၵမ်လႆႈလႅၼ်လိၼ်ၵၢတ်ႉသ် တင်းမူတ်းယဝ်ႉ – ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ဢမေႊရိၵၼ်ႊလၢတ်ႈဝႃႈ ၵူဝ်ႊရီႊယိူဝ်ႊႁွင်ႇ ၵမ်ႉၸွႆႈ ၼင်ႇႁိုဝ် ပၢင်တိုၵ်းယူႊၶရဵၼ်ႊ တေယိုၼ်းယၢဝ်းၵႂႃႇလႄႈ ပုၼ်ႈၽွၼ်း မီးတီႈမိူင်းၵူဝ်ႊရီႊယိူဝ်ႊႁွင်ႇ။

သိုဝ်ႇၶၢဝ်ႇ (KCNA) မိူင်းၵူဝ်ႊရီႊယိူဝ်ႊႁွင်ႇတႄႉလၢတ်ႈဝႆႉဝႃႈ – လွင်ႈမိူင်းၵူဝ်ႊရီႊယိူဝ်ႊႁွင်ႇ သူင်ႇႁႅင်းတပ်ႉသိုၵ်း ၵႂႃႇၸွႆႈထႅမ်မိူင်းရတ်ႉသျႃးၼႆႉ ႁဵတ်းၸွမ်းၼင်ႇ ၶေႃႈတူၵ်းလူင်း ၵၢၼ်ၵႅတ်ႇၶႄႁႄႉၵင်ႈပၼ်ၵၼ် ၼႂ်းၵႄႈၵၢင်သွင်ၸိုင်ႈမိူင်းမီးဝႆႉၼၼ်ႉၵူၺ်း။ မိူဝ်းၼႃႈၵေႃႈ တေသိုပ်ႇၸွႆႈထႅမ်သိုၵ်းရတ်ႉသျႃးၵႂႃႇထႅင်ႈ – ဝႃႈၼႆ။

ၵူၺ်းၵႃႈ တီႈၼႂ်းပၢင်တိုၵ်း လႅၼ်လိၼ်ၵၢတ်ႉသ်ၼၼ်ႉ သိုၵ်းမိူင်းၵူဝ်ႊရီႊယိူဝ်ႊႁွင်ႇ ၶဝ်ႈၸွႆႈထႅမ် ၾၢႆႇလႂ်ၸိူင်ႉႁိုဝ်ၼႆတႄႉ ဢမ်ႇလၢတ်ႈဝႆႉပႃး – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။