ၽူႈဢွၼ်ႁူဝ် မိူင်းၵူဝ်ႊရီႊယိူဝ်ႊႁွင်ႇ Kim Jong -un တေၵႂႃႇၶဝ်ႈႁူမ်ႈပၢင်ၼႄၾၢင်ႁၢင်ႈသိုၵ်း ဢၼ်တေၸတ်းႁဵတ်းတီႈပေႇၵျိၼ်း မိူင်းၶႄႇ – ႁွင်ႈၵၢၼ် ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ပိုၼ်ၽၢဝ်ႇဝႆႉၼင်ႇၼႆ။

ၵၢၼ်ဢွၵ်ႇၶၢဝ်းတၢင်း ႁူပ်ႉထူပ်းၵၼ်တင်းၽူႈဢွၼ်ႁူဝ်လၢႆၸိုင်ႈမိူင်းပွၵ်ႈၼႆႉ တေပဵၼ်ပွၵ်ႈၵမ်းႁႅၵ်ႈ ဝၢႆးသေပူၼ်ႉမႃး ၶၢဝ်းတၢင်းလၢႆလၢႆပီ။

တႃႇပဵၼ်တီႈမၢႆတွင်း တိုၵ်းတေႃးဢွင်ႇပေႉသိုၵ်းၵျပၼ်ႊလႄႈ ပၢင်တိုၵ်းသိုၵ်းလုမ်ႈၾႃႉ ပွၵ်ႈၵမ်းသွင် ယဝ်ႉတူဝ်ႈၵႂႃႇၼႆသေ ပေႃးထိုင်မႃးၼႂ်းဝၼ်းတီႈ 03/09/2025 (လိူၼ်ၼႃႈ) ၼႆႉ မိူင်းၶႄႇ တေၸတ်းႁဵတ်းပၢင်ၼႄၾၢင်ႁၢင်ႈသိုၵ်းၵႂႃႇ တီႈပၢင်ႇ Tiananmen Square ဝဵင်းပေႇၵျိၼ်း (Beijing) မိူင်းၶႄႇ ၼႆယဝ်ႉ။

ပၢင်ၼႄၾၢင်ႁၢင်ႈသိုၵ်းၼႆႉ တေမီးၽူႈဢွၼ်ႁူဝ်ၸိုင်ႈမိူင်း 26 ၵေႃႉ ၶဝ်ႈႁူမ်ႈၸွမ်း၊ ၼႂ်းၼၼ်ႉပႃး ၸွမ်ၸိုင်ႈမိူင်းရတ်ႉသျႃး ၵေႃႉၼိုင်ႈ။

တပ်ႉသိုၵ်းမိူင်းၶႄႇ တေဢဝ်ၵႃးတႅင်ႉ၊ ပၵ်းပိူင်ၾၢႆႇၵႅတ်ႇၶႄ ၶိူင်ႈတရူၼ်ႊ၊ ရူတ်ႉၵႃးသိုၵ်း ၼပ်ႉႁူဝ်ပၢၵ်ႇလမ်းလႄႈ ၶိူင်ႈၵွင်ႈၵၢင်ႇၶိုတ်းၵၢပ်ႈၸိူဝ်းၼႆႉ ၼႄၾၢင်ႁၢင်ႈၵႂႃႇ တင်းၼမ် ဝႃႈၼႆ။

ပၢင်ၼႄၾၢင်ႁၢင်ႈသိုၵ်းၼႆႉ တေႁိုင်ၶၢဝ်းတၢင်း 70 မိၼိတ်ႉ(ၼိုင်ႈၸူဝ်ႈမူင်းပၢႆ)။ ၽူႈလူင်ႉလႅၼ်ႇ ၶဝ်ထတ်းသၢင်ဝႃႈ မိူင်းဝၼ်းတူၵ်း ၸိူဝ်းပဵၼ်မိူင်းဢဵၼ်ႁႅင်းယႂ်ႇၶဝ် တေၸၢင်ႈပၵ်းတႃပႂ်ႉတူၺ်းၸွမ်းယူႇ ၼႆယဝ်ႉ။

ပၢင်ၼႄၾၢင်ႁၢင်ႈသိုၵ်း ဢၼ်မိူင်းၶႄႇၸတ်းႁဵတ်း မိူဝ်ႈပီ 2015 ၼၼ်ႉ ၽူႈဢွၼ်ႁူဝ် မိူင်းၵူဝ်ႊရီႊယိူဝ်ႊႁွင်ႇ  Kim Jong-un သူင်ႇတူဝ်တႅၼ်းၵႂႃႇၶဝ်ႈႁူမ်ႈၸွမ်းၵူၺ်း။

ယၢမ်းလဵဝ် ပိူဝ်ႈတႃႇတေၵိုတ်းပၢင်တိုၵ်းယူႊၶရဵၼ်ႊ – ရတ်ႉသျႃးၼႆသေ ၸွမ်ၸိုင်ႈမိူင်းဢမေႊရိၵၼ်ႊ တူဝ်ႊၼေႃႊ ထရမ်ႉ ၶတ်းၸႂ်ဢုပ်ႇၵုမ်ၵၼ်တင်း ၸွမ်ၸိုင်ႈမိူင်းရတ်ႉသျႃးဝႆႉယူႇ၊ လိူဝ်ၼၼ်ႉ ပူၼ်ႉမႃးပႆႇႁိုင်သင်ၼႆႉၵေႃႈ လၢတ်ႈဝႃႈ ၶႂ်ႈႁူပ်ႉထူပ်းၵၼ်တင်း ၽူႈဢွၼ်ႁူဝ်မိူင်းၵူဝ်ႊရီႊယိူဝ်ႊႁွင်ႇ ဝႃႈၼႆ။

ၾၢႆႇၼိုင်ႈၵေႃႈ ၸွမ်ၸိုင်ႈမိူင်းၶႄႇ သျီႊၵျိၼ်ႊၽိင်ႊသမ်ႉ မီးလွင်ႈႁူမ်ႇငမ်းဢေႃးၸႃႇဢႃႇၼႃႇၼိူဝ် ၸွမ်ၸိုင်ႈရတ်ႉသျႃးတင်း ၵူဝ်ႊရီႊယိူဝ်ႊႁွင်ႉဝႆႉယူႇ – ၶၢဝ်ႇသိုဝ်ႇ BBC ဢွၵ်ႇဝႆႉၼင်ႇၼႆ။