တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ဢၼ်ၵုမ်းၵမ်ဝႆႉ ဝဵင်းမိူင်းၵုတ်ႈသေ ပၵ်းတပ်ႉပၢင်သဝ်း ယူႇဝႆႉၼႂ်းဝဵင်းၼၼ်ႉ ယၢမ်းလဵဝ် ၵဵပ်းၶွၼ်ႇယွၼ်းငိုၼ်းၵူၼ်းမိူင်းၼႂ်းပိုၼ်ႉတီႈ ၼမ်ၶိုၼ်ႈမႃးႁႅင်းလႄႈ ႁဵတ်းႁႂ်ႈၵူၼ်းမိူင်း ႁူပ်ႉတၢင်းယၢပ်ႇၵိၼ်းမႃးလိူဝ်ၵဝ်ႇ။

ၵူၼ်းမိူင်းၼႂ်းပိုၼ်ႉတီႈ ဝဵင်းမိူင်းၵုတ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈလဵဝ် လွင်ႈၵဵပ်းၶွၼ်ႇၵေႃႈ တိူဝ်းၼမ်မႃးၶႃႈလႄႈ ႁဵတ်းႁႂ်ႈၵူၼ်းမိူင်းယူႇယၢပ်ႇၶၢၼ်ၸႂ်ၼမ်ၼႃႇယဝ်ႉ။ ၶွၼ်ႇၼႆႉတႄႉ လႆႈပၼ်ၵူႈ မဵဝ်းယဝ်ႉ။ တီႈဢွၵ်ႇသႅင်လီၵေႃႈ ၵူၼ်းမိူင်းၼႂ်းပိုၼ်ႉတီႈ ဢမ်ႇမီးသုၼ်ႇလႆႈႁဵတ်းသင်”- ဝႃႈၼႆ။

မိူဝ်ႈႁူဝ်လိူၼ်မၢတ်ႊၶျ်ပူၼ်ႉမႃးၼႆႉ သိုၵ်းတဢၢင်း ဢွၵ်ႇၶေႃႈပူင်ဝႃႈ ၵူၼ်းမိူင်းၼႂ်းၸႄႈဝဵင်းမိူင်းၵုတ်ႈ ၵူႈၵေႃႉ တေလႆႈႁၢပ်ႇထၢမ်းၵၢၼ်သိုၵ်း ၼိုင်ႈႁိူၼ်းၼိုင်ႈၵေႃႉၼႆလႄႈ ႁဵတ်းႁႂ်ႈ ၵူၼ်းၼုမ်ႇ ၼႂ်းပိုၼ်ႉတီႈ ပၢႆႈယၢၼ်ဢွၵ်ႇဝဵင်းၵႂႃႇတၢင်ႇတီႈ တၢင်းလႅၼ်ပႅတ်ႈတင်းၼမ်။ မၢင်ၸိူဝ်း ႁွင်ႉဢဝ်မုင်ႉႁေႃႁိူၼ်း ဢွၵ်ႇပၢႆႈငိူင်ႉဝႄႈၵႂႃႇယူႇဝႆႉ တၢင်ႇဝၢၼ်ႈတၢင်ႇမိူင်း ၸိူဝ်းၼႆႉ ၵေႃႈမီး ၼႆယဝ်ႉ။

ဝၢႆးလင် ၽႅၼ်ယၼ်ႇသိုၵ်း 1027 သိုၵ်းတဢၢင်း ႁုပ်ႈယိုတ်းလႆႈဝဵင်း ၵုမ်းၵမ်ဝႆႉၸူဝ်ႈၶၢဝ်းၼႆႉ ႁၢၼ်ႉတေႃႇ ထိုင်ယၢမ်းလဵဝ် ယင်းပႆႇၸႂ်ႉတိုဝ်းလႆႈၾႆးၾႃႉ ၵူၺ်းဢမ်ႇၵႃး ၾူၼ်းလႅင်းၵေႃႈၶၢတ်ႇဝႆႉလႄႈ ႁဵတ်းႁႂ်ႈၵၢၼ် ၵပ်းသိုပ်ႇတိတ်းတေႃႇၵၼ် ယၢပ်ႇၵိၼ်းဝႆႉ။

ၼင်ႇႁိုဝ် တေၸၢင်ႈတိတ်းတေႃႇၵပ်းသိုပ်ႇလႆႈ ၵူၼ်းတၢင်းၼွၵ်ႈလႆႈၼၼ်ႉ ၽူႈမၢၵ်ႈမီးၶဝ်ပိုတ်ႇ Starlink (သတႃးလိင်ႉ) ဝႆႉၼႂ်းဝဵင်းလႄႈ ၵူၼ်းမိူင်းလႆႈၵႂႃႇသိုဝ်ႉၸႂ်ႉ ၼိုင်ႈၸူဝ်ႈမူင်းလႂ် ၼိုင်ႈႁဵင်ပျႃး။

လႆႈႁူႉဝႃႈ ၵူၼ်းမိူင်းၼႂ်းပိုၼ်ႉတီႈဝဵင်းမိူင်းၵုတ်ႈ လႆႈပၼ်ၶွၼ်ႇႁဵတ်းသႅင်၊ ၶွၼ်ႇလၢဝ်းပၢၼ်း၊ ၶွၼ်ႇၵႃႈၶၢႆသႅင် ပႃးၸဵမ် ၶွၼ်ႇႁၢၼ်ႉၶၢႆၵုၼ်ႇလႄႈ ၶွၼ်ႇယုၵ်းယၢၵ်းၸိူဝ်းၼႆႉၼႆ ၵူၼ်းမိူင်းပိုၼ်ႉတီႈ ၼႂ်းဝဵင်းမိူင်းၵုတ်ႈ လၢတ်ႈၼႄတီႈ ၽူႈတွႆႇႁွၵ်ႈၼင်ႇၼႆ။

“ၵႃႈၼမ်ႉ၊ ၵႃႈၾႆးတႄႉ ယွၼ်ႉၾႆးၵေႃႈဢမ်ႇမႃးႁႄ ၼမ်ႉၼႆၵေႃႈ ပွၵ်ႉၽႂ်ဝၢၼ်ႈမၼ်း ၵႂႃႇတေႃႇ ဢဝ်မႃး တီႈႁူဝ်ၼမ်ႉၵမ်းသိုဝ်ႈလႄႈ ၶဝ်ဢမ်ႇၸၢင်ႈၵဵပ်းၶွၼ်ႇမၼ်းၵူၺ်း။ ၶွၼ်ႇၵႃး၊ ၶွၼ်ႇလဝ်ႈ ၸိူဝ်းၼႆႉၵေႃႈမီး လႆႈပၼ်တင်းသဵင်ႈယဝ်ႉ။ ပေႃးၶဝ်ႁၼ်ဝႃႈ တၢင်ႇလဝ်ႈမႃးၼႆ ၼိုင်ႈၽႃႇၼႆႉ လႆႈပၼ်ယူႇ 3,000 ပျႃး ၸိူဝ်းၼႆႉ။ ဢီႈသင်ၵေႃႈ ၵုမ်ႇလႆႈပၼ်ၶွၼ်ႇတီႈ ၸုမ်းယိပ်းၵွင်ႈၵၢင်ႇၸိူဝ်းၼႆႉယူႇတိၵ်းတိၵ်း။ ယႃႇဝႃႈတေငွၵ်ႈႁူဝ်လႆႈ ၵူၼ်းမိူင်းတႄႉ တေၵႅၼ်ႉတၢႆယူႇႁင်းၵူၺ်းယဝ်ႉ”။

ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူးၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA ၵေႃႈ ဢမ်ႇလႆႈ။

လႆႈႁူႉဝႃႈ ၸုမ်းၸိူဝ်းၶုတ်းဢဝ်သႅင် ၼႂ်းပိုၼ်ႉတီႈဝဵင်းမိူင်းၵုတ်ႈၼႆႉ ပဵၼ်သိုၵ်းတဢၢင်း TNLA ၊ သိုၵ်းဝႃႉ UWSA ၊ သိုၵ်းၵဝ်ႈၵၢင်ႉ MNDAA ၊ သိုၵ်းရၶႅင်ႇ AA ၸဵမ်ၸိူဝ်းၼႆႉ။ ၼႂ်းၸႄႈဝဵင်းမိူင်းၵုတ်ႈၼႆႉ မီးၸုမ်း သိုၵ်းၸၢဝ်းၶိူဝ်း လၢႆလၢႆၸုမ်း ယူႇသဝ်းတူင်ႉၼိုင်ၵႂႃႇမႃးဝႆႉ ဝႃႈၼႆ။

တႅမ်ႈ – ၽူၺ်းၼုမ်ႇ