ၵူၼ်းၸိူဝ်းယိပ်းဝႂ်ဝီႊသႃႊလုၵ်ႈႁဵၼ်းသေ ၶဝ်ႈႁဵတ်းၵၢၼ်ဢမ်ႇထုၵ်ႇၸွမ်းပၵ်းပိူင်ၼမ်မႃးလႄႈ ၸဝ်ႈၼႃႈတီႈထႆး တေထတ်းထွင်ၶိုၼ်းသေ မႄးၶဵင်ႈပၵ်းပိူင်ဝီႊသႃႊၵႂႃႇၼႆ ၸဝ်ႈၼႃႈတီႈၾၢႆႇၵဵဝ်ႇၶွင်ႈ ပိုၼ် ၽၢဝ်ႇလၢတ်ႈၵႂႃႇၼႂ်းဝၼ်းတီႈ 23/04/2025 ။

ဢိင်ၼိူဝ်လွင်ႈၼႆႉသေ လုၵ်ႈႁဵၼ်းၵူၼ်းၼုမ်ႇဢၼ်လုၵ်ႉ မိူင်းမၢၼ်ႈမႃးႁဵၼ်းလိၵ်ႈလၢႆး ဝႆႉၼႂ်းမိူင်းထႆး ၸိူဝ်းၼၼ်ႉ ပဵၼ်ဢၼ်မႆႈၸႂ် ၵူဝ်ၺႃးၸွမ်းၸၢၵ်ႇလႄႈ ယၢပ်ႇၽိုတ်ႇၼႂ်းၵၢၼ် ႁဵၼ်း။ ၶႂ်ႈႁႂ်ႈၸဝ်ႈၼႃႈတီႈထႆး ယွၼ်ႇယၢၼ်းပၼ် လုၵ်ႈႁဵၼ်းၽွင်ႈ ဝႃႈၼႆ။

ဢိင်ၼိူဝ်မိူင်းႁူမ်ႈတုမ်မၢၼ်ႈ ဢမ်ႇၼိမ်ဢမ်ႇသဝ်းသေ ၵူၼ်းၼုမ်ႇၵမ်ႈၼမ်ၵေႃႈ ၶၢတ်ႇတိုဝ်ႉတၢင်း ဢမ်ႇလႆႈႁဵၼ်း ဢမ်ႇလႆႈသွၼ်လိၵ်ႈလီလီ။ မၢင်ၸိူဝ်းၵေႃႈ ၶတ်းၸႂ်ႁႃတၢင်းဢွၵ်ႇ လၢႆးၵႄႈလိတ်ႈၽႂ် မၼ်းသေ ၶဝ်ႈႁဵၼ်းၼႂ်းမိူင်းထႆး။

ၼႂ်းမိူင်းထႆးၵေႃႈ ဢမ်ႇၵွမ်ႉၵူၺ်း ၵူၼ်းမိူင်းႁူမ်ႈတုမ်မၢၼ်ႈ ၵူၼ်းတၢင်ႇၸိုင်ႈမိူင်းၵေႃႈ ၶဝ်ႈယူႇထင်ၼမ်လႄႈ ပၼ်ႁႃၵေႃႈမီးမႃးလၢႆလွင်ႈ။ ၸိူဝ်းယိုၼ်ႈတၢင်ႇယွၼ်းဢဝ်ဝႂ်ဝီႊသႃႊလုၵ်ႈႁဵၼ်း ED VISA သေ ႁဵတ်းၵၢၼ်ဢၼ်ဢမ်ႇၸွမ်းပၵ်းပိူင်ၵေႃႈမီးမႃး။

ဝီႊသႃႊလုၵ်ႈႁဵၼ်းၼႆႉ ၸွမ်းၼင်ႇပိူင်မီးဝႆႉတႄႉ သင်ဝႃႈတွၵ်ႇၸုမ်ႈၼိုင်ႈၵမ်း ဢႃယုမီးထိုင် 1 ပီ ၊ ၶၢဝ်း တၢင်း 90 ဝၼ်းၼႆႉ တေလႆႈႁၢႆးငၢၼ်းတူဝ် လုၵ်ႈႁဵၼ်းၼိုင်ႈပွၵ်ႈတီႈလုမ်းတေႃႊမေႃႊ ၾၢႆႇၵူတ်ႇထတ်း ၵူၼ်းၶဝ်ႈမိူင်း။

မၢင်ၸိူဝ်း ယိုၼ်ႈတၢင်ႇလႆႈဝႆႉဝီႊသႃႊလုၵ်ႈႁဵၼ်းသေတႃႉ သမ်ႉၵႂႃႇႁဵတ်းႁႅင်းၵၢၼ်တဵမ်တူဝ်လႄႈ ၸင်ႇမီးပၼ်ႁႃဝီႊသႃႊလုၵ်ႈႁဵၼ်းမႃး။

ၵူၺ်းၵႃႈ သင်ပဵၼ်လုၵ်ႈႁဵၼ်းတႄႉတႄႉ ဢၼ်ယိပ်းဝီႊသႃႊလုၵ်ႈႁဵၼ်းဝႆႉ၊ ၾၢႆႇၼိုင်ႈ ၼင်ႇႁိုဝ် တေမီးငိုၼ်းတႃႇႁဵၼ်းလိၵ်ႈလၢႆးၸဝ်ႈၵဝ်ႇၼၼ်ႉ ၵႂႃႇႁဵတ်းၵၢၼ်ႁႃငိုၼ်းၸူဝ်ႈၶၢဝ်း Part time ၵူၺ်းတႄႉ  ၸဝ်ႈၼႃႈတီႈထႆး ထုၵ်ႇလီဝဵၼ်ႉပၼ်ယူႇ လုၵ်ႈႁဵၼ်းၼႂ်းမိူင်းထႆးဢွၼ်ၵၼ်တုၵ်းယွၼ်းၼင်ႇၼႆ။

ၾၢႆႇၼိုင်ႈ သင်ၸိူဝ်ႉၸဝ်ႈၼႃႈတီႈထႆး ဢမ်ႇဝဵၼ်ႉပၼ်လုၵ်ႈႁဵၼ်းတႄႉတႄႉၼၼ်ႉၸိုင် ၸၢင်ႈတုမ်ႉတိူဝ်ႉ ၵူၼ်းၼွၵ်ႈမိူင်းၸိူဝ်းမႃးႁႃႁဵၼ်းလိၵ်ႈလၢႆးမိူင်းထႆး ပဵၼ်တၢင်းၵၢၼ်ၼၼ်ႉတႄႉတႄႉၼႆ – တွၵ်ႊ တိူဝ်ႊသူႇထီႊရႃႊ ၶၼထမ်ႊ ၾၢႆႇပၢႆးသၢႆႊတူင်ႇၵူၼ်း တီႈၸၼ်ႉၸွမ်ရၢတ်ႉၶျၽတ်း လၢတ်ႈၼင်ႇၼႆ။

“လွင်ႈၶဝ်ဢဝ်ဝီႊသႃႊလုၵ်ႈႁဵၼ်းသေ ယူႇမိူင်းထႆး။ ယဝ်ႉၵေႃႈ သမ်ႉၵႂႃႇႁဵတ်းၵၢၼ် ဢၼ်ဢမ်ႇထုၵ်ႇ ၸွမ်းပၵ်းပိူင်မၢႆမီႈၼႆတႄႉ တုမ်ႉတိူဝ်ႉၵူၼ်းၸိူဝ်းၶိုၼ်ႈႁဵၼ်းတႄႉတႄႉၼၼ်ႉ ဢေႃႈ။ တႃႇၵႂႃႇတေႃႇ ဢႃယုဝတ်းဝႂ်ၸိူဝ်းၼႆႉၵေႃႈ လုၵ်ႈႁဵၼ်းၶဝ် တေမီးလွင်ႈၶွင်ႈၶမ်မႃး”- ဝႃႈၼႆ။  

ပၢႆးပၺ်ႇၺႃႇမိူင်းထႆးၼႆႉ တႃႇႁႂ်ႈၵူၼ်းၼွၵ်ႈမိူင်းမီးတိုဝ်ႉတၢင်းႁဵၼ်းလိၵ်ႈလႆႈၼၼ်ႉ – ၶိုင်ဝႆႉပၼ်ၵၢၼ် ႁဵၼ်း ၶၢဝ်းယၢဝ်းလႄႈၶၢဝ်းပွတ်း။ ဢိင်ၼိူဝ်ၸၼ်ႉၸွမ်လႄႈ ၽႃသႃႁဵၼ်းၽႂ်မၼ်းသေ ဝီႊသႃႊ တႃႇ ယူႇသဝ်းၼႂ်းမိူင်းထႆးၵေႃႈ မီးလွင်ႈပိူင်ႈၵၼ်။

ၵူၼ်းၼုမ်ႇၸိူဝ်းၵႂႃႇ ႁဵၼ်းလိၵ်ႈတီႈမိူင်းၵျပၼ်ႊ ဢမေႊရိၵၼ်ႊၸိူဝ်းၼႆႉတႄႉ ၵမ်ႈၼမ် ႁႃလၢႆးတၢင်း ႁဵတ်းၵၢၼ် Part time ၵၼ်ပႃးၶႂ်ႈဝႃႈၵူႈၵေႃႉ။ မိူင်းပိူၼ်ႈၼၼ်ႉ ဢမ်ႇထိုင်တီႈ မီးတၢင်းၽိတ်းယႂ်ႇလူင်။ ၼႂ်းမိူင်းထႆးၵေႃႈ ၶႂ်ႈႁႂ်ႈၾၢႆႇၵဵဝ်ႇၶွင်ႈၶဝ် ထတ်းထွင်တူၺ်းသေ သင်ဝႃႈ ပဵၼ်လုၵ်ႈႁဵၼ်းတႄႉတႄႉ ႁႂ်ႈတူၺ်းထိုင်ပၼ်ၽွင်ႈ ယွၼ်ႉဝႃႈ ဢမ်ႇမီးတၢင်းလိူၵ်ႈလႄႈ ၸင်ႇလႆႈၶဝ်ႈႁဵၼ်းမိူင်းထႆး။ သင်ဝႃႈ ၶဵင်ႈၶႅင်လွင်ႈပၵ်းပိူင်ဝီႊသႃႊလုၵ်ႈႁဵၼ်းႁႅင်းၼႃႇၵေႃႈ လုၵ်ႈႁဵၼ်းတေယူႇယၢပ်ႇသေ သဵၼ်ႈတၢင်းၵၢၼ် ႁဵၼ်းၵူၼ်းၼုမ်ႇ တေၶၢတ်ႇၵၼ်မူတ်းယဝ်ႉၼႆ – ၵူၼ်းၸၢႆးၼုမ်ႇ လုၵ်ႈႁဵၼ်းၸၼ်ႉၸွမ်မႄႈၾႃႉလူင် လၢတ်ႈၼႄဝႆႉၼင်ႇၼႆ –

“ၵဵဝ်ႇၵပ်းလွင်ႈဝီႊသႃႊၼႆႉ တီႈၸၼ်ႉၸွမ်ၵေႃႈ ပိူၼ်ႈၵမ်းၵမ်းပၼ်ၾၢင်ႉယူႇ။ ၵမ်းၵမ်းမီးလွင်ႈလႆႈ ၵႄႈလိတ်ႈ လွင်ႈဝီႊသႃႊၸိူဝ်းၼႆႉယူႇ။ သင်ၸိူဝ်ႉဝႃႈ ႁဵတ်းၸွမ်း ယူႇၸွမ်းၼင်ႇပိူင်ဝီႊသႃႊၼၼ်ႉတႄႉ တႄႉ တေဢမ်ႇမီးလွင်ႈတုမ်ႉတိူဝ်ႉသင်။ တီႈၸၼ်ႉၸွမ်ၵေႃႈ မီးၽူႈပုၼ်ႈၽွၼ်းၶဝ် ႁပ်ႉႁွင်းပၼ်ယူႇ လူး။ ယွၼ်ႉမီးၸၼ်ႉၸွမ်မၢင်ဢၼ် တင်ႈၸႂ်ႁဵတ်းဝီႊသႃႊသေ ၶၢႆပၼ်ပိူၼ်ႈလႄႈ ၸင်ႇမီးပၼ်ႁႃၸိူင်ႉ ၼႆမႃး။ တီႈတႄႉမၼ်း ဝီႊသႃႊလုၵ်ႈႁဵၼ်းၵေႃႈ တေလႆႈမီးၸွမ်းလုၵ်ႈႁဵၼ်းၵူၺ်းလူးၼေႃႈ”- ဝႃႈၼႆ။

ၼႂ်းဝၼ်းမိူဝ်ႈၼႆႉ ၵႃႈၶၼ်ၵုၼ်ႇၵိၼ်ယႅမ်ႉ/ ၸႂ်ႉတိုဝ်း ၵႃႈယႂ်ႇၵႃႈပႅင်းၵူႈယၢင်ႇၵူႈဢၼ်။ တႃႇယူႇလွတ်ႈ လႆႈ ၼႂ်းမိူင်းထႆးၵေႃႈ လုၵ်ႈႁဵၼ်းမၢင်ၸိူဝ်း ၵႃႈလႆႈႁႃၵၢၼ်ႁဵတ်းၸူဝ်ႈၶၢဝ်း။ သင်ဝႃႈ ၸဝ်ႈၼႃႈတီႈၶဝ် ၵူတ်ႇထတ်းႁႅင်းသေ ထိုင်တီႈႁဵတ်းၵၢၼ်ႁႃၵိၼ်လဵင်ႉတွင်ႉပႃး ဢမ်ႇလႆႈတႄႉ ၵူၼ်းၼုမ်ႇၸိူဝ်းပဵၼ် လုၵ်ႈႁဵၼ်း တေယူႇယၢပ်ႇၵိၼ်းၸႂ်ယဝ်ႉ။ ဢမ်ႇၶႂ်ႈႁႂ်ႈ ၸဝ်ႈၼႃႈတီႈၶဝ် ၶဵင်ႈၶႅင်တေႃႇလုၵ်ႈႁဵၼ်းတႄႉ တႄႉၼင်ႇၵဝ်ႇၼႆ လုၵ်ႈႁဵၼ်းၸၼ်ႉၸွမ် ၵဵင်းမႆႇၵေႃႉၼိုင်ႈလၢတ်ႈၼင်ႇၼႆ။

ဢိင်ၼိူဝ်ပၼ်ႁႃဝီႊသႃႊၼႆႉသေ ၸုမ်းၵဵဝ်ႇၶွင်ႈၼႂ်းမိူင်းထႆး တေႁူမ်ႈၵၼ်လၢႆမူႇလၢႆၸုမ်း ၶိုၼ်းမူၼ်ႉ မႄးထတ်းထွင်။ တေတမ်းဝၢင်းပၵ်းပိူင်သေဢမ်ႇၵႃး တေႁဵတ်းပႃးပိူင် MOU သေ မိူင်းၼိုင်ႈလႄႈ မိူင်းၼိုင်ႈ တေၶိုၼ်းလူင်းလၢႆးမိုဝ်းႁဵတ်းသၢင်ႈၵႂႃႇလွင်ႈဝႂ်ၶၢမ်ႈမိူင်းလႄႈ ဝီႊသႃႊၸိူဝ်းၼႆႉၼႆ –  သိုဝ်ႇၶၢဝ်ႇထႆး The Nation Thailand လႄႈ Thai Enquirer ႁၢႆးငၢၼ်းဝႆႉ။

မိူဝ်ႈဝၼ်းတီႈ 28/03/2025 ၼၼ်ႉၵေႃႈ ၽႅၼ်ႇလိၼ်ဝႆသေ ႁဵတ်းႁႂ်ႈတိူၵ်ႈသုင်ၼႂ်းဝဵင်းလူင်မိူင်းၵွၵ်ႇ (ၵုင်းထဵပ်ႈ) ဢၼ်တိုၵ်ႉသၢင်ႈမႂ်ႇၼၼ်ႉ ၵူၼ်ႇပင်းသေ ႁႅင်းၵၢၼ်လူႉတၢႆၼမ်။ ဝၢႆးသေၸဝ်ႈၼႃႈတီႈ ထႆးၵူတ်ႇထတ်းယဝ်ႉၼၼ်ႉ လႆႈႁၼ်ပႃးႁႅင်းၵၢၼ်ၵူၼ်းမိူင်းၶႄႇ ဢၼ်ယိပ်းဝႂ်ဝီႊသႃႊလုၵ်ႈႁဵၼ်းသေ ႁဵတ်းၵၢၼ်ဝႆႉၵေႃႈမီး လႆႈႁူႉၼင်ႇၼႆ။