ၸၢတ်ႈၸိုင်ႈလုမ်ႈၾႃႉ ပိုၼ်ၽၢဝ်ႇဝႃႈ တေဢဝ်လိူင်ႈ ၵူၼ်းၸိူဝ်းဢဝ်ၶဝ်ႈမုၼ်း ပီႇသၵဵတ်ႉ (Biscuits) ဢၼ်ၸုမ်း WFP ၵမ်ႉၸွႆႈပၼ်တႃႇၵူၼ်းမိူင်း ၸိူဝ်းထူပ်းၽေးၽႅၼ်ႇလိၼ်ဝႆၼၼ်ႉ သိုပ်ႇၶၢႆတေႃႇၶိုၼ်း ဝႃႈၼႆ။

ယူႇတီႈၸုမ်း WFP ႁၼ်မႅၼ်ႈၼႂ်းသိုဝ်ႇတူင်ႇဝူင်းၵူၼ်း (social media) ဝႃႈ တီႈၼႂ်းတိူင်း ၼေႇပျီႇ တေႃႇ မီးၵူၼ်းဢဝ်ၶဝ်ႈမုၼ်း ပီႇသၵဵတ်ႉ (Biscuits) ၶၢႆၶိုၼ်း။ ၵူၺ်းၵႃႈ လွင်ႈၼႆႉ ပႆႇမီးလၵ်းထၢၼ် တႃႇတေယိုၼ်ယၼ်။

မိူဝ်ႈဝၼ်းတီႈ 01/04/2025 ၼႆႉ ပဵၼ်ဝၼ်းလိုၼ်းသုတ်း လႆႈၸႅၵ်ႇပၼ် ၶဝ်ႈမုၼ်း ပီႇသၵဵတ်ႉ တီႈ ၼေႇပျီႇတေႃႇ။ ၶိူင်ႈၶူဝ်းၸႂ်ႉတိုဝ်း တၢင်းၵိၼ်ယႅမ်ႉ ဢၼ်ယူႇတီႈ ၵူၼ်းၼင်ႇၵၼ် ႁၼ်ထိုင်ၸွႆႈထႅမ် ၵၼ်ၼႆႉ ဢမ်ႇၵိုင်ႇလီဢဝ်ၶၢႆၶိုၼ်း။ ယူႇတီႈ WFP တေပႂ်ႉတူၺ်းၸွမ်းငဝ်းလၢႆးသေ သင်ႁၼ် မႅၼ်ႈ မီးၵူၼ်းဢဝ်ၶၢႆၶိုၼ်းၸိုင် တေဢဝ်လိူင်ႈၵႂႃႇၵမ်းလဵဝ် ဝႃႈၼႆ။

ၶဝ်ႈမုၼ်း ပီႇသၵဵတ်ႉ ဢၼ်ၸုမ်း WFP ၵမ်ႉၸွႆႈထႅမ်ပၼ်ဝႆႉၼႆႉ ဢမ်ႇမိူၼ်ၵၼ်တင်း ၶဝ်ႈမုၼ်း ပီႇ သၵဵတ်ႉ ယူဝ်းယူဝ်း။ မၼ်းပဵၼ်ၶဝ်ႈမုၼ်း ဢၼ်ႁဵတ်းဢွၵ်ႇဝႆႉၶိုၵ်ႉတွၼ်း တႃႇ ၵိၼ်ႁႂ်ႈပဵၼ်ဢႃႇႁႃရ  ၽွင်းထူပ်းၽေးၶိုၵ်ႉၶၵ်ႉ မိူၼ်ၼင်ႇ ၽေးၽႅၼ်ႇလိၼ်ဝႆ ၸိူဝ်းၼႆႉ။

တီႈၼႂ်းၶဝ်ႈမုၼ်းၼၼ်ႉ ပႃး ၶဝ်ႈၵျုင်ႇ၊ ၽွင်ထူဝ်ႇ၊ ၵိူဝ်ဝၢၼ်၊ ၼမ်ႉၼူမ်း ဢၼ်ဢဝ်ၶႆမၼ်းဢွၵ်ႇဝႆႉ၊ ထၢတ်ႈၵႄႊလ်သီႊယမ်ႊ ၊ မၵ်ႉၵၼီႊသီႊယမ်ႊ ၊ ထၢတ်ႈလဵၵ်း၊ ထၢတ်ႈၵိူဝ် (ဢၢႆႇဢူဝ်ႇတိၼ်း) ၊ ၽေႃး လိတ်ႉ ဢႅတ်ႉၸိတ်ႉ ၊ ဝီႊတႃႊမိၼ်ႊ B1၊ B2 ၊ B6 ၊ B12 လႄႈ ထၢတ်ႈႁႄႈတၢင်ႇၸိူဝ်းထႅင်ႈ တင်းၼမ်။

ၸုမ်း WFP လၢတ်ႈဝႆႉဝႃႈ ၶဝ်ႈမုၼ်း ပီႇသၵဵတ်ႉၼႆႉ ႁၢမ်ႈလဵင်ႉလုၵ်ႈဢွၼ်ႇ ဢႃယု 6 လိူၼ် လူင်းတႂ်ႈ၊ လုၵ်ႈဢွၼ်ႇၸိူဝ်း ဢႃယု 6 လိူၼ်ၶိုၼ်ႈၼိူဝ်သမ်ႉ တေလႆႈလဵင်ႉၼမ်ႉၼူမ်းမႄႈ ဢွၼ်တၢင်းယဝ်ႉ ၸင်ႇတေၵိၼ်လႆႈ။ တွၼ်ႈတႃႇ ၵူၼ်းလူင်ၶဝ်တႄႉ ဢိင်ၼိူဝ်လွင်ႈတွင်ႉမႆႈသေ ၼိုင်ႈဝၼ်း ၵိၼ်လႆႈ ထိုင် 5 ထူင် ဝႃႈၼႆ။

ၶဝ်ႈမုၼ်း ပီႇသၵဵတ်ႉၼႆႉ ယူႇတီႈ ၸုမ်းၸၢတ်ႈၸိုင်ႈလုမ်ႈၾႃႉ ၸႅၵ်ႇဝႆႉပၼ်လၢႆလၢႆ တွၼ်ႈတႃႇ ၵူၼ်းမိူင်း ၸိူဝ်းထူပ်းၽေးၽႅၼ်ႇလိၼ်ဝႆၼႆ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။