မိူဝ်ႈဝၼ်းတီႈ 24/04/2025 ယၢမ်းၵၢင်ၶမ်ႈမွၵ်ႈ 6 မူင်း သိုၵ်းမၢၼ်ႈၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ ၸွမ်းႁိမ်းဝၢၼ်ႈ သဵၼ်ႈတၢင်းၽႄ ဢုမ်ႇတီး ၼႃႈတီႈတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇ မွၵ်ႈ 30 လုၵ်ႈပၢႆလႄႈ ႁဵတ်းႁႂ်ႈလင်ႁိူၼ်းၵူၼ်းမိူင်း ၸွမ်းဝၢၼ်ႈႁိမ်းတၢင်းၽႄ ဢုမ်ႇတီး ၾႆးမႆႈၵႂႃႇတင်းၼမ်ၼႆ ၵူၼ်းမိူင်းပိုၼ်ႉတီႈၵေႃႉၼိုင်ႈ လၢတ်ႈၼႄၼင်ႇၼႆ။

“မိူဝ်ႈဝႃး ယိုင်ႈၶႅၼ်းၵျၢမ်းယဝ်ႉ။ တီႈတၢင်းၽႄဢုမ်ႇတီးၼၼ်ႉ ၾႆးမႆႈႁိူၼ်းၵႂႃႇ တင်းၼမ်။ ၶဝ်ဢဝ် ၶိူင်ႈ မိၼ်မႃးပွႆႇ။ မိူဝ်ႈလဵဝ်ၼႆႉ ၼႂ်းဝၢၼ်ႈၵေႃႈ ပၢင်တိုၵ်းပဵၼ်ၶိုၼ်းဝႆႉႁႅင်းၵျႃႉၶႃႈ ၼေႈ။ မိူဝ်ႈၼႆႉၵေႃႈ ယင်းတိုၵ်ႉ ဢဝ်ၶိူင်ႈလူင်ႁႄ ယိုဝ်းမႃးထႅင်ႈယူႇ။ ပဵၼ်ပၢင်တိုၵ်းဝႆႉလႄႈ မိူဝ်ႈလဵဝ် ၶဝ်ဢမ်ႇပၼ်ၽႂ်လတ်းၽၢၼ်ႇသဵၼ်ႈ တၢင်းၼၼ်ႉ။ ပေႃးၵႂႃႇၼႆ ၶဝ်လၢတ်ႈဝႆႉဝႃႈတေယိုဝ်းၼႆဝႃႇ”။

ၼႂ်းၸႄႈဝဵင်းၼွင်ၶဵဝ် ဝၢၼ်ႈတွင်းၶမ်း ၼႃႈတီႈသိုၵ်းတဢၢင်း ၵုမ်ၵမ်ဝႆႉၼႆႉ ပဵၼ်ပၢင်တိုၵ်းၵၼ်ယူႇၵူႈဝၼ်း ၵူၼ်းဝၢၼ်ႈမႆႉပူၵ်ႇလႄႈ ၼွင်လႅင် လႆႈပၢႆႈၽေးပၢင်တိုၵ်းဝႆႉၼႆ ၵူၼ်းၼႂ်းပိုၼ်ႉတီႈ ၸႄႈဝဵင်းၼွင်ၶဵဝ် ၵေႃႉၼိုင်ႈ လၢတ်ႈၼႄၼင်ႇၼႆ။

“မိူဝ်ႈလဵဝ် တီႈၼွင်ၶဵဝ်ၼႆႉ ပၢင်တိုၵ်းပဵၼ်ႁႅင်းဝႆႉၶႃႈၼေႈ။ ၵွပ်ႈၼၼ် ၵူၼ်းဝၢၼ်ႈမႆႉပူၵ်ႇတင်း ၼွင်လႅင် ငိူင်ႉပၢႆႈဢွၵ်ႇဝၢၼ်ႈ ဝႆႉၵမ်းၼိုင်ႈ။ တၢင်းဝၢၼ်ႈတွင်းၶမ်းတႄႉ ယင်းတိုၵ်ႉပဵၼ်ပၢင်တိုၵ်းၵၼ်ယူႇၵူႈဝၼ်း။ သိုၵ်းမၢၼ်ႈၶဝ် ဢဝ်ၶိူင်ႈမိၼ်ႁႄပၼ်ႇပွႆႇမၢၵ်ႇသႂ်ႇ ယူႇတိၵ်းတိၵ်း”။

မိူဝ်ႈပူၼ်ႉမႃး ဝၼ်းတီႈ 22/04/2025 ၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇသႂ်ႇ ၼႂ်းဝၢၼ်ႈဢုမ်ႇတီး 2 လုၵ်ႈလႄႈ ႁဵတ်းႁႂ်ႈႁိူၼ်းၵူၼ်းမိူင်းလူႉၵွႆၵႂႃႇ 5 လင်။ မိူဝ်ႈဝၼ်းတီႈ 21/04/2025 ၼၼ်ႉၵေႃႈ ၾၢႆႇသိုၵ်း မၢၼ်ႈ ၸႂ်ႉမၢၵ်ႇထၢတ်ႈငူၼ်ႉပွႆႇသႂ်ႇ 15 လုၵ်ႈလႄႈ ႁဵတ်းႁႂ်ႈ ၵူၼ်းသိုၵ်းတဢၢင်း 15 ၵေႃႉမၢတ်ႇၸဵပ်းၵႂႃႇ။ တႃႇသၢမ်ၵေႃႉတႄႉ မၢတ်ႇၸဵပ်းဝႆႉႁၢဝ်ႈႁႅင်း ၾၢႆႇတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA ပိုၼ်ၽၢဝ်ႇဢွၵ်ႇဝႆႉ။

လႆႈႁူႉဝႃႈ ယၢမ်းလဵဝ် ၾၢႆႇသိုၵ်းမၢၼ်ႈ ႁႅၼ်းသိုၵ်းတႃႇလေႃႇတိုၵ်း တပ်ႉသိုၵ်းတဢၢင်း ၼႂ်းၸႄႈဝဵင်းၼွင် ၶဵဝ်ႁၢဝ်ႈႁႅင်း။ ၾၢႆႇသိုၵ်းတဢၢင်း TNLA လႆႈႁူမ်ႈၵၼ်တင်း သိုၵ်းထၼု DPLA သေ ႁပ်ႉတိုၵ်းၶိုၼ်းသၢႆ သိုၵ်းမၢၼ်ႈယူႇ ဝႃႈၼႆ။

တႅမ်ႈ – ၽူၺ်းၼုမ်ႇ