ဝၼ်းတီႈ 23/04/2025 သိုၵ်းမၢၼ်ႈ ၸိူဝ်းပႂ်ႉႁိမ်းၶူဝ်ၼမ်ႉယၢဝ် တီႈလႅၼ်ၶႅၼ်ႈ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ တၢင်းၶဝ်ႈဢွၵ်ႇဝဵင်းလႃႈသဵဝ်ႈ – သႅၼ်ဝီၼၼ်ႉ တင်ႈလၢၼ်ႇပႂ်ႉၵဵပ်းၶွၼ်ႇ ရူတ်ႉၵႃးၵူၼ်းမိူင်း ၸိူဝ်းလတ်းၵႂႃႇမႃး ၼႂ်းၸိုင်ႈတႆးပွတ်းႁွင်ႇ။

တင်ႈတႄႇ သိုၵ်းမၢၼ်ႈ ဢဝ်ၶိူင်ႈၵွင်ႈၵၢင်ႇတင်း ႁႅင်းၵူၼ်းသိုၵ်း ၼပ်ႉႁူဝ်ႁဵင်ၵေႃႉ ၶဝ်ႈမႃးၵုမ်းၵမ်ၶိုၼ်း ၼႂ်းဝဵင်းလႃႈသဵဝ်ႈ ၵူၼ်းမိူင်းၸိူဝ်းလတ်းၵႂႃႇမႃး တီႈၶူဝ်ၼမ်ႉယၢဝ် AD လႆႈပၼ်ငိုၼ်း (ၵႃႈၶွၼ်ႇ) လတ်းသဵၼ်ႈတၢင်း ၵႂႃႇမႃးၼမ်ႁႅင်းၼႆ ၵူၼ်းမိူင်းၼႂ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႇၼင်ႇ ၼႆ။

“မိူဝ်ႈဝႃး ႁဝ်းမီးတၢင်းလူဝ်ႇ ၵႂႃႇသိုဝ်ႉၵုၼ်ႇၼႂ်းဝဵင်း။ ၾၢႆႇသိုၵ်းမၢၼ်ႈၼႆႉ ယွၼ်းႁဝ်း ၼိုင်ႈသႅၼ်ဝႃႇ။ ၵႃႈဢမ်ႇလႆႈဢမ်ႇၸူးၼၼ်ႉယဝ်ႉ။ ယွၼ်းတွင်းပၢၼ်ႇတႄႉတႄႉဝႃႈဝႃႈႁႄ ၸူးလႆႈပၼ်တီႈၶဝ် ႁႃႈမိုၼ်ႇယဝ်ႉ ၶဝ်ၸင်ႇပၼ်ၵႂႃႇ။ ပေႃးမိူၼ်ၸိူင်ႉၼႆၵႂႃႇတိၵ်းတိၵ်းတႄႉ ႁဝ်းတေႁဵတ်းၵိၼ်ၵၢၼ်သင်ယဝ်ႉလႃႇ။ ၶဝ်တိုၵ်ႉၶဝ်ႈယူႇ ၼိုင်ႈဝၼ်းၵူၺ်း။ မိူဝ်းၼႃႈမႃး ၶဝ်ယိုင်ႈၶႅၼ်းတေယွၼ်းၼမ်လိူဝ်ၼႆႉၵွၼ်ႇႁိုဝ်ဢမ်ႇႁူႉ။ ၵူၼ်းမိူင်းၵူၺ်းဢိူဝ်ႈ ၼႃႇယဝ်ႉၼႃႇထႅင်ႈ”။

လႆႈႁူႉဝႃႈ ပေႃးပဵၼ်ၵႃးဢွၼ်ႇ ဢၼ်လုၵ်ႉတၢင်းဝဵင်းသႅၼ်ဝီမႃးတၢင်း ဝဵင်းလႃႈသဵဝ်ႈၸိုင် လႆႈပၼ်တီႈသိုၵ်းမၢၼ်ႈ ၼိုင်ႈလမ်းလႂ် ဢေႇသုတ်း 5 မိုၼ်ႇ။ ပေႃးလုၵ်ႉတၢင်းဝဵင်းလႃႈသဵဝ်ႈ ဢွၵ်ႇၵႂႃႇတၢင်း ဝဵင်းသႅၼ်ဝီ လႆႈပၼ်ၼိုင်ႈလမ်း 5,000 ပျႃး။

သင်ပဵၼ်ၵႃးတေႃႉတၢင်ႇၵုၼ်ႇတင်း မၢၵ်ႇမႆႉ ဢိၵ်ႇၽၵ်းၶဵဝ် ၸိူဝ်းလတ်းၽၢၼ်ႇ ၶူဝ်ၼမ်ႉယၢဝ် AD သေ ၶဝ်ႈဢွၵ်ႇဝဵင်းလႃႈသဵဝ်ႈၸိုင် ၼိုင်ႈလမ်းလႂ် ဢေႇသုတ်း လႆႈပၼ်တီႈသိုၵ်းမၢၼ်ႈ 2 သႅၼ်ပျႃး ဝႃႈၼႆ။

ၵူၼ်းမိူင်းၵေႃႉၼိုင်ႈ လတ်းၵႂႃႇတီႈၶူဝ်ၼမ်ႉယၢဝ် ဢၼ်ႁၼ်တႂ်ႈၼႃႈတၼ်းတႃၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ – “ၶဝ်ယွၼ်းၼမ်ၼႅၼ်ႇၼႃႇ။ တီႈႁဝ်းၵေႃႈ ၶဝ်မႃးယွၼ်းယဝ်ႉ။ ၸဝ်ႈၵႃးမၢင်ၸိူဝ်း ပေႃးလႆႈ ၶုပ်ႉၶဝ်ႇတွင်းပၢၼ်ႇၶဝ် ႁႂ်ႈယွမ်းပၼ်ငိုၼ်း။ တီႈတူဝ်ၶဝ်ၼၼ်ႉ ဢၢႆလဝ်ႈပေႃးသိင်ႉသွင်းလႄႇ။ ႁမ်ႉပႃးၵွင်ႈႁႄ” – ဝႃႈၼႆ။

ယွၼ်ႉလူင်ပွင်ၸိုင်ႈမိူင်းၶႄႇ ယူႇၵႄႈၵၢင်သေ ၸွႆႈဢုပ်ႇဢူဝ်းငူပ်ႉငီႉပၼ်ၵူၺ်းဢမ်ႇၵႃး ပၼ်ႁႅင်းမိပ်ႇဢီး တေႃႇသိုၵ်းၵဝ်ႈၵၢင်ႉ ႁႂ်ႈထွႆဢွၵ်ႇၵႂႃႇပၼ် ၼႂ်းဝဵင်းလႃႈသဵဝ်ႈ ဝၼ်းတီႈ 17 ထိုင် 22 လိူၼ်ဢေႊပရိူဝ်ႊၼႆလႄႈ မိူဝ်ႈဝၼ်းတီႈ 22 ၼၼ်ႉ သိုၵ်းမၢၼ်ႈ လႆႈတေႃႉဢဝ် ၶိူင်ႈၵွင်ႈၵၢင်ႇတင်း ၵူၼ်းသိုၵ်းဢိၵ်ႇ လုၵ်ႈလၢင်းၼၢင်းမေး တင်းမုင်ႉႁေႃႁိူၼ်းၶဝ် တႄႇၶဝ်ႈမႃးပၵ်းတပ်ႉၶိုၼ်း တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းမိူင်းဝဵင်းလႃႈသဵဝ်ႈ ၵေႃႉၼိုင်ႈ သိုပ်ႇလၢတ်ႈၼႄထႅင်ႈဝႃႈ -“ပေႃးႁိုင်မႃး ယင်းၵူဝ်သိုၵ်းမၢၼ်ႈၶဝ် တဵၵ်းၵဵပ်းသိုၵ်း မိူၼ်တင်း မိူင်းမၢၼ်ႈ (ထုင်ႉပဵင်း) ၼၼ်ႉၵွၼ်ႇလႃႈ။ ၵၢင်ၶမ်ႈၵၢင်ၶိုၼ်းၵေႃႈ ၸွမ်းၶဝ်ႈၺွပ်းထိုင် ၼႂ်းႁိူၼ်းၵူၼ်းမိူင်း ၸိူဝ်းၼႆႉ မႆႈၸႂ်တႄႉဢိူဝ်ႈ။ ပေႃးႁိူၼ်းဢၼ်မီးလုၵ်ႈၸၢႆးၸိူင်ႉႁဝ်းၼႆႉ ယင်းလႆႈမႆႈၸႂ် ထူၼ်ႈယဝ်ႉ” – ဝႃႈၼႆ။

သိုၵ်းမၢၼ်ႈ ၸိူဝ်းၶဝ်ႈမႃးပၵ်းတပ်ႉပၢင်သဝ်းၶိုၼ်း ၼႂ်းဝဵင်းလႃႈသဵဝ်ႈ တႃႇၵႃး 200 လမ်းပၢႆ ႁႅင်းသိုၵ်းမွၵ်ႈ 1,300 ၼၼ်ႉ ၶဝ်ႈပၵ်းတပ်ႉဝႆႉၸွမ်း ၸၼ်ႉၸွမ်လူင် ဝဵင်းလႃႈသဵဝ်ႈလႄႈ တပ်ႉဢမျွၵ်ႈ (ၵွင်ႈလူင်) ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ