မိူဝ်ႈဝႃး ဝၼ်းတီႈ 23/04/2025 ယၢမ်းၵၢင်ၼႂ် 8 မူင်း ယိင်းသၢဝ်ၵေႃႉၼိုင်ႈ တီႈဝဵင်းလႃႈသဵဝ်ႈ ၵႂႃႇႁဵၼ်းလိၵ်ႈ မႃး ၺႃးၸူၼ်ၵၢင်တၢင်း ၸူၼ်ၸၵ်ႉမိုဝ်းထိုဝ်မၼ်းၼၢင်းလႅၼ်ႈ ၽွင်းမၼ်းၼၢင်း ၸွမ်းၸၼ်ၶိုၼ်းၼၼ်ႉ ၺႃးၽၼ်းသႂ်ႇ မၢတ်ႇၸဵပ်းပဵၼ်လိူတ်ႈပဵၼ်ယၢင်။

မၼ်းၼၢင်းၸိုဝ်ႈႁွင်ႉ မၶွင်ႇၺွႆႇ (မခေါင်ညွယ်) ဢႃယု 23 ပီ ပဵၼ်လုၵ်ႈႁဵၼ်း တီႈႁူင်းႁဵၼ်းလုၵ်ႈဢွၼ်ႇ ၽၢၼ်ပေႃႈမႄႈ တႅတ်ႉသၢၼ်းယေႇ (သက်စမ်းရေ)။ ၽွင်းမၼ်းၼၢင်း လုၵ်ႉတီႈႁွင်ႈႁဵၼ်းလိၵ်ႈသေ ပွၵ်ႈၶိုၼ်းတီႈႁူင်းသဝ်းၼၼ်ႉ ၺႃးၸူၼ်ၸၵ်ႉဢဝ်မိုဝ်းထိုဝ်မၼ်း တီႈၼိူဝ်သဵၼ်ႈတၢင်းပႃႇရမီႇ မၢႆ 207 ။

ၽွင်းယိင်းသၢဝ်ဢွၼ်ႇၵႂႃႇသွၼ်လိၵ်ႈ ဢၢၼ်းပွၵ်ႈၶိုၼ်းႁိူၼ်းၼၼ်ႉ ၸွမ်းတၢင်း မီးၵူၼ်းဢမ်ႇႁူႉၾၢႆႇ ၶီႇရူတ်ႉၶိူင်ႈမႃး လၢတ်ႈဝႃႈ မီးလွင်ႈတေလၢတ်ႈၼႆသေ ၸၼ်ဢဝ်ၾူင်းၼႂ်းမိုဝ်းယိင်းသၢဝ်ၼၼ်ႉယဝ်ႉ ဢဝ်လႅဝ်းၽၼ်း မိုဝ်းယိင်းသၢဝ်ၼၼ်ႉၵႂႃႇ လႆႈယဵပ်ႉ 6 ၵမ်း ဝႃႈၼႆ။

ၽွင်းၼၼ်ႉ ၵႂႃႇလၢတ်ႈၼႄသိုၵ်းမၢၼ်ႈ ဢၼ်ပႂ်ႉတီႈတၢင်းၼႃႈ ၸၼ်ႉၸွမ်ၵေႃႈ ဢမ်ႇဢဝ်ပုၼ်ႈၽွၼ်း ပၼ်သင်သေ တုမ်ႉတွပ်ႇ ၸႂ်ဢမ်ႇလီၸွမ်းၼႆၵူၺ်း – ၵူၼ်းပိုၼ်ႉတီႈလၢတ်ႈ။

ၵူၼ်းၸမ်ၸႂ် မၶွင်ႇၺွႆႇ လၢတ်ႈၽူႈတွႆႇႁွၵ်ႈဝႃႈ -“ပဵၼ်ၽွင်းမၼ်းၵႂႃႇႁဵၼ်းလိၵ်ႈတီႈႁွင်ႈႁဵၼ်းသေ ပွၵ်ႈၶိုၼ်းဢေႃႈ။ တီႈႁူင်းသဝ်းလႄႈ ႁွင်ႈႁဵၼ်းလိၵ်ႈ တမ်ႉဢမ်ႇၵႆၵၼ်သေဢိတ်းၶႃႈလူး။ ႁဝ်းၶႃႈမုင်ႈႁၼ် မၼ်းယူႇ။ ၵူၼ်းၸူၼ်ဢၢင်ႈၽၼ်းတီႈၶေႃးမၼ်း။ မၼ်းသမ်ႉဢဝ်မိုဝ်းမၼ်းႁႄႉလႄႈ ၽၼ်းၺႃးမိုဝ်းမၼ်း။ ၽိူဝ်ႇႁဝ်းၶႃႈလႅၼ်ႈၵႂႃႇ ထိုင်တီႈမၼ်း ၼၼ်ႉၵေႃႈ ၸူၼ်ပေႃးလႅၼ်ႈပၢႆႈယဝ်ႉ”- ဝႃႈၼႆ။

ႁွင်ႈႁဵၼ်းလႄႈ ႁူင်းလိုဝ်ႈသဝ်းလုၵ်ႈႁဵၼ်းၼၼ်ႉ ပႆတၢင်းပွၵ်ႈႁိုင်မွၵ်ႈ 2 မိၼိတ်ႉၵူၺ်း။ တီႈႁိမ်းၼၼ်ႉ မီးပႃးသိုၵ်းမၢၼ်ႈ ၸုမ်းၼိုင်ႈ။ ၵႂႃႇလၢတ်ႈယူႇၵေႃႈ ဢမ်ႇဢဝ်ပုၼ်ႈၽွၼ်းပၼ်သင်။

“ၽိူဝ်ႇၵႂႃႇလၢတ်ႈတီႈသိုၵ်းမၢၼ်ႈၸိူဝ်းၼၼ်ႉလႄႈ ၶဝ်ၵေႃႈသမ်ႉဝႃႈ – ဢမ်ႇၸၢင်ႈၸွႆႈပၼ်သင်။ ယွၼ်ႉဝႃႈ တွၼ်ႈတႃႇၶဝ် ယင်းပႆႇမီးတီႈယူႇ။ ပဵၼ်ၸႂ်ဢမ်ႇလီၸွမ်းတႄႉတႄႉ – ဝႃႈၼႆၵူၺ်း။ ၵူၼ်းမိူင်းၼႆႉတႄႉ ဢမ်ႇၸၢင်ႈၸႂ်ယႂ်ႇပိုင်ႈဢိင်ၽႂ်”- ၵူၼ်းၼႂ်းပွၵ်ႉၼၼ်ႉ လၢတ်ႈၼင်ႇၼႆ။

မၶွင်ႇၺွႆႇ မၢတ်ႇၸဵပ်းတီႈမိုဝ်းပဵၼ်လိူတ်ႈတူၵ်းယၢင်ဢွၵ်ႇႁႅင်းယူႇသေတႃႉ တီႈဝဵင်းလႃႈသဵဝ်ႈ ယၢမ်းလဵဝ် ႁူင်းယႃၵေႃႈဢမ်ႇမီးလႄႈ ႁႃတီႈယူတ်းယႃပဵၼ်ယၢပ်ႇပဵၼ်ၽိုတ်ႇ ၵူၼ်းၼႂ်းပွၵ်ႉၼၼ်ႉလၢတ်ႈၼင်ႇၼႆ။

“ပေႃးပဵၼ်မႃးၸိူင်ႉၼႆ ဢမ်ႇၸၢင်ႈၵႂႃႇယႃတီႈလႂ်၊ ၶဝ်ၵႂႃႇလႄႇႁႃပၼ် ႁူင်းယႃၼႆႉတႄႉ ပေႃးၸွတ်ႇဝဵင်း၊ ပေႃးၸဵပ်းႁႅင်းတႄႉ ယင်းၸၢင်ႈတၢႆၵၢင်တၢင်းလူးၵွၼ်ႇယဝ်ႉ။ ႁဝ်းၶႃႈၶႂ်ႈဝႃႈတႄႉ ၽႂ်ၶႂ်ႈမႃးၽွင်းငမ်းၵေႃႈယဝ်ႉ ၶႂ်ႈႁႂ်ႈဝႆႉၼၵ်းလွင်ႈႁူမ်ႇလူမ်ႈၵူၼ်းမိူင်းၽွင်ႈ။ ပေႃးပဵၼ်မႃးလိူင်ႈၸိူင်ႉၼႆ ၶႂ်ႈႁႂ်ႈသႂ်ႇၸႂ် ဢဝ်လိူင်ႈပၼ် ၼၵ်းၼၵ်းၼႃၼႃ။ ၶႂ်ႈႁႂ်ႈၸတ်းပၼ်ႁႂ်ႈမီးႁူင်းယႃပိုတ်ႇပၼ် 24 ၸူဝ်ႈမူင်းၽႂ်းၽႂ်း။ ၵူၼ်းမိူင်းယၢပ်ႇၸႂ်ၼႃႇယဝ်ႉ”- ဝႃႈၼႆ။

ယၢမ်းလဵဝ်ၼႆႉ ပဵၼ်ၶၢဝ်း တပ်ႉသိုၵ်းမၢၼ်ႈလႄႈ တပ်ႉသိုၵ်းၵဝ်ႈၵၢင်ႉMNDAA လႅၵ်ႈလၢႆႈၵၢၼ် ၽွင်းငမ်း ၼႂ်းဝဵင်းလႃႈသဵဝ်ႈ။ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈသေဢိတ်း။ လွင်ႈၽူႈလၵ်ႉ၊ လွင်ႈၸူၼ် ၸိူဝ်းၼႆႉ ဢမ်ႇမီးၽႂ်ဢဝ်ပုၼ်ႈၽွၼ်းသင်လႄႈ ၶႂ်ႈႁႂ်ႈၾၢင်ႉၵၼ်ၵႂႃႇမႃး – ၵူၼ်းပိုၼ်ႉတီႈလၢတ်ႈၼင်ႇၼႆ။

မေႃသွၼ် ၵူၼ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ ယွၼ်ႉဝၢၼ်ႈမိူင်း တေပဵၼ်သင်မႃးထႅင်ႈ ၸိူင်ႉႁိုဝ်ဢမ်ႇႁူႉ။ ၽွင်းယၢမ်းၼႆႉ ပေႃးတေၵႂႃႇတၢင်းၼွၵ်ႈ ဢမ်ႇၶႂ်ႈ ႁႂ်ႈၵႂႃႇၵေႃႉလဵဝ်၊ ပေႃးၵႂႃႇၵေႃႈ ႁႂ်ႈလုမ်းလႃးၵဵပ်းၶူဝ်းၶွင်မီးၵႃႈၶၼ်ဝႆႉတီႈႁူမ်ႇလူမ်ႈၵွၼ်ႇ။ ပေႃးၵႂႃႇၸွမ်းတၢင်းၼႆႉ ဢမ်ႇတူၺ်းမိုဝ်းထိုဝ် ယိင်ႈၶႅၼ်းလီယဝ်ႉ။ ပေႃးပဵၼ်ၵူၼ်းၸၢႆး ၶီႇရူတ်ႉၶိူင်ႈသွၼ်ႉၵၼ်မႃးသွင်သၢမ်ၵေႃႉၼႆ ႁႂ်ႈၾၢင်ႉႁႂ်ႈဝႄႈဝႆႉ။ ယွၼ်ႉဝႃႈ ဢမ်ႇမီးၽႂ်ဢဝ်ႁူမ်ႇလူမ်ႈပၼ် ၵႅတ်ႇၶႄပၼ်ၵူၼ်းမိူင်းသေဢိတ်းယဝ်ႉ။ ၶႂ်ႈႁႂ်ႈၾၢင်ႉၵၼ်လွင်ႈ ၵႂႃႇမႃးဢိတ်းၼိုင်ႈ”- ဝႃႈၼႆ။ 

မိူင်းၶႄႇ ၶဝ်ႈၵႄႈၵၢင်ငူပ်ႉငီႉပၼ် ၼႂ်းၵႄႈ တပ်ႉသိုၵ်းမၢၼ်ႈလႄႈ တပ်ႉသိုၵ်းၵဝ်ႈၵၢင်ႉ MNDAA ၵိုတ်းတိုၵ်း ၵၼ်သေ ၾၢႆႇသိုၵ်းၵဝ်ႈၵၢင်ႉ ဢၼ်ၽွင်းငမ်းမႃးၶၢဝ်းတၢင်း 9 လိူၼ်ၼႆႉ ၼၼ်ႉ လႆႈထွႆဢွၵ်ႇပၼ်ၶိုၼ်း ဝဵင်းလႃႈသဵဝ်ႈ။ ယၢမ်းလဵဝ် ပဵၼ်ၽွင်းတပ်ႉသိုၵ်းမၢၼ်ႈ ၶဝ်ႈမႃးဢဝ်တီႈယူႇၶိုၼ်းၼႂ်းဝဵင်း ဝႃႈၼႆ။