ဝၼ်းတီႈ 22/04/2025 DPLA ပိုၼ်ၽၢဝ်ႇဝႃႈ သိုၵ်းမၢၼ်ႈတင်း တပ်ႉသိုၵ်းပူတ်းပွႆႇၵူၼ်းမိူင်းထၼု DPLA ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းတီႈထုင်ႉၵျွၵ်ႉၵူႇ ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း။

ဝၼ်းတီႈ 21/04/2025 ယၢမ်းၵၢင်ဝၼ်း 12 မူင်းၶိုင်ႈ တႄႇပဵၼ်ပၢင်တိုၵ်းၵၼ်ႁၢဝ်ႈႁႅင်းတေႃႇထိုင် ႁူဝ်ၶမ်ႈ 5 မူင်းၶိုင်ႈ ပၢင်တိုၵ်းယဵၼ်ၵႂႃႇၵမ်းၼိုင်ႈ။ ထိုင်ဝၼ်းမိူဝ်ႈၼႆႉ ပၢင်တိုၵ်းတီႈထုင်ႉၵျွၵ်ႉၵူႇ သိုပ်ႇပဵၼ်ႁၢဝ်ႈႁႅင်းဝႆႉ ဝႃႈၼႆ။   

လုၵ်ႈၸုမ်း DPLA ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်း တႄႇပဵၼ်ၼႂ်းဝၼ်းတီႈ 21 ထိုင်မိူဝ်ႈၼႆႉ ပၢင်တိုၵ်း တိုၵ်ႉပဵၼ်ဝႆႉႁၢဝ်ႈႁႅင်း ၾၢႆႇတင်းသိုၵ်းမၢၼ်ႈထႅမ်ႁႅင်းသိုၵ်းမႃးတင်းၼမ်”- ဝႃႈၼႆ။

ယွၼ်ႉပၢင်တိုၵ်းႁၢဝ်ႈႁႅင်းလႄႈ တင်းသွင်ၾၢႆႇမီးလွင်ႈတုမ်ႉတိုဝ်ႉသေ ၾၢႆႇတင်းသိုၵ်းထၼု တီႉၺွပ်းလႆႈ ၸုမ်းသိုၵ်းမၢၼ်ႈ 3 ၵေႃႉ။ ၵွၼ်ႇၼႃႈ ပႆႇပဵၼ်ပၢင်တိုၵ်းၵေႃႈ ၾၢႆႇတင်းသိုၵ်းမၢၼ်ႈ ၵႆႉဢဝ်ၶိူင်ႈၵွင်ႈလူင်လႄႈ ၶိူင်ႈမိၼ်ပွႆႇမၢၵ်ႇ လၢမ်းလိမ်းပွႆႇမၢၵ်ႇသႂ်ႇ ၼႂ်းထုင်ႉၵျွၵ်ႉၵူႇၼႆႉ သိုၵ်းထၼု ပိုၼ်ၽၢဝ်ႇပႃးဝႆႉၼင်ၼႆ။

မိူၼ်ၼႆၼင်ႇၵဝ်ႇ ၾၢႆႇတင်းသိုၵ်းမၢၼ်ႈထႅမ်ႁႅင်းသိုၵ်းလေႃႇတိုၵ်း တီႈတပ်ႉသိုၵ်းတဢၢင်း TNLA လႄႈ DPLA ၶိူဝ်းယႂ်း တီႈတၢင်းဝၢၼ်ႈတွင်းၶမ်း။ ထုင်ႉၵျွၵ်ႉၵူႇၼႆႉ ယၢၼ်ၵႆၵၼ်တင်း ဝၢၼ်ႈတွင်းၶမ်း 30 လၵ်း။

လုၵ်ႈၸုမ်း DPLA သိုပ်ႇလၢတ်ႈဝႃႈ -“တင်းတွင်းၶမ်းၼႆႉၵေႃႈ ၾၢႆႇတင်းသိုၵ်းမၢၼ်ႈထႅမ်ႁႅင်းသိုၵ်းသေ ထူဝ်းသိုၵ်းၶဝ်ႈမႃး၊ ၼႂ်းဝၼ်းတီႈ 20 ၼၼ်ႉ ၾၢႆႇတင်းသိုၵ်းမၢၼ်ႈ ၸႂ်ႉမၢၵ်ႇၵွင်ႉငူၼ်ႉထၢတ်ႈပွႆႇလႄႈ လုၵ်ႈ ၸုမ်းထၼု တုမ်ႉတိူဝ်ႉႁၢဝ်ႈႁႅင်း၊ လႆႈသမ်းယႃ ၵိၼ်ယႃ  ႁၵ်ႉသႃတူဝ် သၢမ်ဝၼ်း၊ ထိုင်ယၢမ်းလဵဝ် ဝၢၼ်ႈတွင်းၶမ်းၼႆႉၵေႃႈ ပၢင်တိုၵ်းတိုၵ်ႉပဵၼ်ဝႆႉႁၢဝ်ႈႁႅင်း”- ဝႃႈၼႆ။

ယၢမ်းလဵဝ် တီႈထုင်ႉၵျွၵ်ႉၵူႇၼႆႉ ပၢင်တိုၵ်းသိုပ်ႇပဵၼ်ႁၢဝ်ႈႁႅင်း။ ၵူၼ်းပိုၼ်ႉတီႈလႆႈပၢႆႈၽေးသိုၵ်း ၼပ်ႉႁူဝ်ႁဵင်။ ၵူၼ်းဝၢၼ်ႈပယိၼ်း (ပယင်း) ၊ ဝၢၼ်ႈထမိၼ်းပွင်း (ထမင်းပေါင်း) လႄႈ ဝၢၼ်ႈၼွင်ဝူဝ်း လႆႈပၢႆႈဝႆႉ တင်းဝၢၼ်ႈ လင်ႁိူၼ်းၵူၼ်း 100 ပၢႆ ဝႃႈၼႆ။

ပၢင်တိုၵ်း ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းၼႆႉ တႄႇယိုဝ်းၵၼ် မိူဝ်ႈဝၼ်းတီႈ 04/01/2025 မႃး။ မိူဝ်ႈၽွင်းၽႅၼ်ယၼ်ႇသိုၵ်း 1027 ပၢင်တိုၵ်း ယိုတ်းဝဵင်းၼွင်ၶဵဝ်၊ သီႇပေႃႉၼၼ်ႉ တပ်ႉသိုၵ်းထၼု လႆႈႁူမ်ႈၸွမ်း သိုၵ်းတဢၢင်း TNLA သေ ယိုဝ်းတိုၵ်းသိုၵ်းမၢၼ်ႈမႃးၼင်ႇၵဝ်ႇ။