ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈပွႆႇမၢၵ်ႇလူင် တီႈဝၢၼ်ႈၶွင်းဢီႉ(ခေါင်းအိရွာ) ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းတုမ်ႉတိူဝ်ႉမၢတ်ႇၸဵပ်း 7 ၵေႃႉ။
ဝၼ်းတီႈ 21/04/2025 ယၢမ်းၵၢင်ဝၼ်း 1 မူင်း ဢမ်ႇမီးပၢင်တိုၵ်းၵေႃႈ သိုၵ်းမၢၼ်ႈလုၵ်ႉတၢင်း တပ်ႉပၢင် သဝ်းမၢႆ 7 ဝဵင်းၾၢႆၶုၼ် ပွႆႇမၢၵ်ႇလူင် ဢမ်ႇယွမ်း 10 ၵမ်း။ ႁဵတ်းႁႂ်ႈၵူၼ်းပိုၼ်ႉတီႈ မၢတ်ႇၸဵပ်းၼႆ ၸုမ်း ၵႅတ်ႇၶႄႇၵူၼ်းမိူင်း PDF တပ်ႉပိဝ်ႇႁႃႇမၢႆ 1 ၼႃႈလိၼ်သိုၵ်းၽႄ ၸိုင်ႈတႆးပွတ်းၸၢၼ်း (ရှမ်းတောင် စစ်ဒေသခွဲ ၊ PDF အမှတ်(၁) ဗျူဟာ) ပိုၼ်ၽၢဝ်ႇဝႆႉၼင်ၼႆ။
ၼၢင်းယိင်းၵူၼ်းမိူင်း ဝဵင်းလွႆၶေႃ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈဝႃးယိၼ်းဝႃႈ သိုၵ်းမၢၼ်ႈ ပွႆႇမၢၵ်ႇလူင် တၢင်းဝဵင်းၾၢႆၶုၼ်။ လုၵ်ႈဢွၼ်ႇ 3 ၵေႃႉမၢတ်ႇၸဵပ်း။ တီႈဝၢၼ်ႈလွႆၼွၵ်ႇဝူဝ်း ၾၢႆႇဢွၵ်ႇဝဵင်းလွႆၶေႃ ၼၼ်ႉၵေႃႈ ယၢမ်းလဵဝ် ပဵၼ်ပၢင်တိုၵ်းၵၼ်ၶိုၼ်း။ ၶမ်ႈဝႃးၵေႃႈ ယူႇၼႂ်းဝဵင်းသေ ယိၼ်းသဵင်ၵွင်ႈသဵင်မၢၵ်ႇယူႇ”- ဝႃႈၼႆ။
ယၢမ်းလဵဝ် ၵူၼ်းဢၼ်မၢတ်ႇၸဵပ်းၼၼ်ႉ ယူႇတီႈ ၸုမ်းၵွပ်ႇၵူႈၸွႆႈထႅမ်ပၢႆးယူႇလီၾၢႆၶုၼ် PKHC ယူတ်းယႃ ပၼ်ဝႆႉ။ ၼႂ်းၼၼ်ႉပႃး ၼၢင်းယိင်းဢႃယု 40 မၢတ်ႇၸဵပ်းႁၢဝ်ႈႁႅင်းလႄႈ လႆႈမႆႈၸႂ်ဝႆႉ။ ၼႂ်းၵူၼ်းမၢတ်ႇၸဵပ်း ၼၼ်ႉပႃး လုၵ်ႈဢွၼ် 8 ၶူပ်ႇလူင်းတႂ်ႈ 3 ၵေႃႉ ဝႃႈၼႆ။
ယၢမ်းလဵဝ် တွၼ်ႈတႃႇ တေၵုမ်းၵမ်လႆႈၶိုၼ်း ဝဵင်းၾၢႆၶုၼ်၊ ဝဵင်းမိူင်းပၢႆး၊ ဝဵင်းလွႆၶေႃ ၸိူဝ်းၼႆႉသေ သိုၵ်းမၢၼ်ႈ ၸင်ႇထႅမ်ႁႅင်းသိုၵ်းမႃးၶိူဝ်းယႂ်းလႄႈ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈ – ၵူၼ်းပိုၼ်ႉ တီႈလၢတ်ႈ။
ယွၼ်ႉသိုၵ်းမၢၼ်ႈပၼ်ႁႅင်းဢီးသေ ၵူၼ်းပၢႆႈၽေးသိုၵ်းလႆႈပွၵ်ႈမိူဝ်းယူႇၶိုၼ်းၼမ်ယဝ်ႉသေတႃႉ ယၢမ်းလဵဝ် ၾၢႆႇတင်းသိုၵ်းမၢၼ်ႈထႅမ်ႁႅင်းသိုၵ်းၶိူဝ်းယႂ်းလႄႈ ႁဵတ်းႁႂ်ႈၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းၵၼ် ၶိုၼ်းႁၢဝ်ႈႁႅင်း – ၵူၼ်းပိုၼ်ႉတီႈလၢတ်ႈ။
“တၢင်းၾၢႆၶုၼ်၊ လွႆၶေႃ ၵူၼ်းပၢႆႈၽေးမႃးယူႇၶိုၼ်းၼမ်ယဝ်ႉ၊ ဢၼ်ဢမ်ႇပႆႇယူႇၶိုၼ်းၼႆႉ ပဵၼ်တၢင်း မိူင်းပၢႆးလႄႈ တင်းဝၢၼ်ႈသၼ်တၢၼ်း (သံတန်း) ၊ မိူင်းလူင်(မိုင်းလုံး) ၊ ဝၢၼ်ႈယႂႃႇတၢၼ်းသျေႇ(ရွာတန်း ရှည်) ၸိူဝ်းၼႆႉ၊ ၵူၼ်းပၢႆႈၽေး ဢၼ်တေမႃးၶိုၼ်းၼႂ်းဝဵင်းတႄႉ ထိုင်ယၢမ်းလဵဝ် ၾၢႆႇတင်းသိုၵ်းမၢၼ်ႈ ၵူတ်ႇထတ်းၵူၼ်းၶဝ်ႈၵူၼ်းဢွၵ်ႇ ဝဵင်းလွႆၶေႃ”- ဝႃႈၼႆ။
ၼၢင်းယိင်းၵူၼ်းပၢႆႈၽေးသိုၵ်း လၢတ်ႈၽူႈတွႆႇႁွၵ်ႈဝႃႈ– “ပွၵ်ႈမႃးယူႇပႆႇတၼ်းႁိုင်၊ သိုၵ်းမၢၼ်ႈ ၵႆႉထႅမ် ႁႅင်းသိုၵ်းလႄႈ ၵူဝ်ပဵၼ်ပၢင်တိုၵ်းၶိုၼ်းယူႇၵေႃႈ ဢမ်ႇၸၢင်ႈႁဵတ်းႁိုဝ် ပၢႆႈယူႇဝၢၼ်ႈပိူၼ်ႈ မိူင်းပိူၼ်ႈၵေႃႈ တႃႇႁႃၵိၼ်လဵင်ႉတွင်ႉယၢပ်ႇၼႃႇ”- ဝႃႈၼႆ။
မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 18/04/2025 ၾၢႆႇသိုၵ်းမၢၼ်ႈ လုၵ်ႉတၢင်းတပ်ႉမၢႆ 442 မိူင်းပၢႆး ထူဝ်းသိုၵ်း လေႃႇတိုၵ်းၶိုၼ်ႈမႃး ဢဵၼ်ႁႅင်းမွၵ်ႈ 30 လႄႈ ပဵၼ်ပၢင်တိုၵ်းၵၼ်ႁၢဝ်ႈႁႅင်းတင်း တပ်ႉသိုၵ်းၸိူဝ်ႉၸၢတ်ႈၵယၢၼ်း(ယၢင်းပၢတ်ႈတွင်း) KNA ပိုၼ်ၽၢဝ်ႇဝႆႉၼင်ႇၼႆ။
တႄႇႁူဝ်ပီ 2025 ၼႆႉမႃး သိုၵ်းမၢၼ်ႈ ဢၢၼ်းၵုမ်းၶိုၼ်း တၢင်းလႅၼ်လိၼ်တႆး – ယၢင်းလႅင်သေ ထူဝ်းသိုၵ်း ၶဝ်ႈၼႂ်းပိုၼ်ႉတီႈ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉမႃးႁၢဝ်ႈႁႅင်း တေႃႇထိုင်ဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ