မိူဝ်ႈဝၼ်းတီႈ 23/01/2025 ၼၼ်ႉ သိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ် ၵဵဝ်ႇလူၺ်ႈ “ပၵ်းပိူင် ၵူၼ်းမိူင်းႁၢပ်ႇၵၢၼ်သိုၵ်း ပီ 2025 (ပြည်သူ့စစ်မှုထမ်းနည်းဉပဒေများ) ” ။ တီႈၼႂ်းပၵ်းပိူင်ၼၼ်ႉ မီး 10 တွၼ်ႈ ၊ မတ်ႉတႃ 59 ဢၼ် ၊ ပိူင်ဢၼ်ၵွင်ႉႁွႆႈၸွမ်းမီး 12 ဢၼ်။ ပဵၼ်သင်လၢႆလၢႆ မီးၸိူင်ႉႁိုဝ်ၽွင်ႈ- ဢၼ်ပႃးၼႂ်းပၵ်းပိူင်လႄႈ ဢၼ်ၶဝ်ႁဵတ်းယူႇသမ်ႉ မီးလွင်ႈပိူင်ႈႁွႆႈၵၼ်ၸိူင်ႉႁိုဝ်ၽွင်ႈ။

သင်ဝႃႈ ၵၢၼ်ၵႅတ်ႇၶႄၸိုင်ႈမိူင်းလႄႈ ၵၢၼ်ႁူမ်ႇလူမ်ႈ တူဝ်ႈမိူင်းမၢၼ်ႈပတ်းပိုၼ်ႉ ဢမ်ႇၼၼ် ပိုၼ်ႉတီႈမၢင်တီႈ ယူႇဝႆႉၼႂ်းငဝ်းလၢႆးၶိုၵ်ႉၶၵ်ႉၼႆၸိုင် ၵူၼ်းၸိူဝ်းဢႃယုထူၼ်ႈတဵမ် တႃႇႁၢပ်ႇၵၢၼ်သိုၵ်းတင်းသဵင်ႈ တေလႆႈၵႂႃႇႁၢပ်ႇၵၢၼ်သိုၵ်း – ဝႃႈၼႆဝႆႉ။

လိူဝ်ၼၼ်ႉ ဢမ်ႇၵႃး တီႈၼႂ်းတွၼ်ႈ 9 မတ်ႉတႃ 49 ၵၢၼ်သူၼ်းတုမ်သိုၵ်းၼၼ်ႉပႃးဝႆႉဝႃႈ – ၵူၼ်းၸိူဝ်း ယၢမ်ႈႁၢပ်ႇၵၢၼ်သိုၵ်းယဝ်ႉၵေႃႈ သင်ဝႃႈလူဝ်ႇမႃးၸိုင် တေလႆႈၶဝ်ႈႁၢပ်ႇ ၵၢၼ်သိုၵ်းထႅင်ႈ – ၼႆယဝ်ႉ။

တီႈၼႂ်းပၵ်းပိူင်ၼၼ်ႉတႅမ်ႈဝႆႉဝႃႈ “သင်ဝႃႈ ၵၢၼ်ၵႅတ်ႇၶႄၸိုင်ႈမိူင်းလႄႈ ၵၢၼ်ႁူမ်ႇလူမ်ႈ တူဝ်ႈမိူင်းမၢၼ်ႈ ပတ်ႉပိုၼ်ႉ ဢမ်ႇၼၼ် ပိုၼ်ႉတီႈမၢင်တီႈ ယူႇဝႆႉၼႂ်းငဝ်းလၢႆးၶိုၵ်ႉၶၵ်ႉၸိုင် တႃႇတေႁွင်ႉၵူၼ်း ၸိူဝ်းဢႃယု  ထူၼ်ႈတဵမ် တႃႇႁၢပ်ႇၵၢၼ်သိုၵ်းတင်းသဵင်ႈ ဢမ်ႇၼၼ် ၵမ်ႈၽွင်ႈ ၊ ၵူၼ်းၸိူဝ်းႁၢပ်ႇ ၵၢၼ်သိုၵ်းယဝ်ႉ တင်းသဵင်ႈ ဢမ်ႇၼၼ် ၵမ်ႈၽွင်ႈ ၵႂႃႇႁၢပ်ႇၵၢၼ်သိုၵ်းၼၼ်ႉ လူင်ပွင်ၸိုင်ႈ မိူင်းႁူမ်ႈတုမ် တေဢွၵ်ႇၶေႃႈပူင် ၵၢၼ်သူၼ်းတုမ်သိုၵ်း ၸွမ်းၼင်ႇ ပိုၼ်ႉတီႈဢၼ်ၵဵဝ်ႇၶွင်ႈ။ ၽွင်းၼၼ်ႉ ၸုမ်းငဝ်ႈငုၼ်း တေလႆႈတမ်းဝၢင်း ၼႃႈၵၢၼ်ပုၼ်ႈၽွၼ်း ၵမ်းၶၵ်ႉၶၵ်ႉပၼ်တီႈၸုမ်းႁွင်ႉ ၵူၼ်းမိူင်းၵႂႃႇႁၢပ်ႇၵၢၼ်သိုၵ်း။

ဢဝ်ၸွမ်းၼင်ႇ ပၵ်းပိူင်ၵူၼ်းမိူင်း ႁၢပ်ႇၵၢၼ်သိုၵ်း (ပြည်သူ့စစ်မှုထမ်းနည်းဉပဒေများ) ဝႃႈၸိုင် တႃႇတေ ႁွင်ႉၵူၼ်းမိူင်း ၵႂႃႇႁၢပ်ႇၵၢၼ်သိုၵ်းၼၼ်ႉ ၶွတ်ႇၽွတ်ႈဝႆ့ယူႇ လၢႆၸၼ်ႉ။ မိူၼ်ၼင်ႇ ၸၼ်ႉငဝ်ႈငုၼ်း၊ ၼေႇ ပျီႇတေႃႇ ၊ တိူင်းလႄႈ ၸႄႈမိူင်း ၊ ၼႃႈလိၼ်ဢုပ်ႉပိူင်ႇၽွင်းငမ်းတူဝ်ၵဝ်ႇ ၊ ၸႄႈတွၼ်ႈ ၊ ၸႄႈဝဵင်းတေႃႇ ပေႃးထိုင် ၸၼ်ႉမူႇဝၢၼ်ႈ ၊ ပွၵ်ႉၸိူဝ်းတေလူင်းၼႂ်းပိုၼ်ႉတီႈသေ ၵဵပ်းသဵၼ်ႈမၢႆပၼ် ၸိူဝ်းၼႆႉ။

ၼႂ်းၼၼ်ႉ ၽွင်းလူင်ၾၢႆႇၵႅတ်ႇၶႄ ပဵၼ်ႁူဝ်ပဝ်ႈ ၸုမ်းငဝ်ႈငုၼ်း ။ လိူဝ်ၼၼ်ႉ ၸွမ်းၼင်ႇ ႁွင်ႈၵၢၼ် ၽွင်း လူင် ဢၼ်လႂ်ဢၼ်ၼၼ်ႉသေ တေမီးပႃး ၽွင်းလူင် ၊ ၸွမ်ၾၢႆႇၸွပ်ႇသိုၵ်း၊ ၸွမ်ၾၢႆႇပၢႆးသိုၵ်း၊ ၸွမ်ၾၢႆႇ ၾိင်ႈပၵ်းပိူင်သိုၵ်း၊ ၽူႈၵုမ်းၾၢႆႇၸီႉသင်ႇ တပ်ႉပႂ်ႉလႅၼ်လိၼ်လႄႈ ပျီႇတူႉၸိတ်ႉ ၸိူဝ်းၼႆႉ။

ၼႂ်းတွၼ်ႈ  4 ၵဵဝ်ႇလူၺ်ႈၵၢၼ်ၵဵပ်းသဵၼ်ႈမၢႆတင်း တၢင်ႇသဵၼ်ႈမၢႆ/ မၢႆၾၢင် ၼၼ်ႉတႄႉ ပၼ်သုၼ်ႇ ၽူႈ ဢွၼ်ႁူဝ်ဝၢၼ်ႈ/ ပွၵ်ႉၶဝ်ႁဵတ်းသၢင်ႈဝႆႉ။ ၽူႈၵွၼ်းဝၢၼ်ႈ / ပွၵ်ႉၶဝ် တေလႆႈလူင်းၼႂ်းပိုၼ်ႉတီႈသေ ၵဵပ်း သဵၼ်ႈမၢႆ ၵူၼ်းၸိူဝ်းဢႃယုထူၼ်ႈတဵမ် တႃႇႁၢပ်ႇၵၢၼ်သိုၵ်း။ တေလႆႈဢဝ်သဵၼ်ႈမၢႆ ဢၼ်ၵဵပ်းလႆႈဝႆႉ ၸိူဝ်းၼၼ်ႉ တၢင်ႇထိုင်တီႈၸုမ်းၸႄႈဝဵင်း ၸွမ်းၼင်ႇဝၼ်းဢၼ်မၵ်းမၼ်ႈဝႆႉ ၵူႈပီ – ပႃးဝႆႉၼင်ႇၼႆ။

ဢၼ်လီပႅၵ်ႇၸႂ်ထႅင်ႈဢၼ်ၼိုင်ႈတႄႉ ၼႂ်းပၵ်းပိူင်ၼၼ်ႉတႅမ်ႈဝႆႉဝႃႈ – ဝၼ်းတီႈ 1 လိူၼ်တီႊသႅမ်ႊပိူဝ်ႊ ၵူႈပီ ၽူႈၵွၼ်းဝၢၼ်ႈ/ ပွၵ်ႉၶဝ် တေလႆႈလူင်းၵဵပ်းသဵၼ်ႈမၢႆ ၵူၼ်းၸိူဝ်းဢႃယု ထူၼ်ႈတဵမ် တႃႇႁၢပ်ႇၵၢၼ် သိုၵ်း – ဝႃႈၼႆဝႆႉသေတႃႉ – တင်ႈတႄႇ သိုၵ်းမၢၼ်ႈပိုၼ်ၽၢဝ်ႇ မၢႆမီႈၵူၼ်းမိူင်းႁၢပ်ႇၵၢၼ်သိုၵ်းမႃး တေႃႇထိုင် ယၢမ်းလဵဝ် ၼႂ်းၶၢဝ်းတၢင်း ပီပၢႆၵူၺ်း သိုၵ်းမၢၼ်ႈ ဢဝ်ၵူၼ်းမိူင်းၵႂႃႇၾိုၵ်းၵၢၼ်သိုၵ်း 11 ၸုပ်ႈယဝ်ႉ။ ယၢမ်း လဵဝ် ၵဵပ်းသဵၼ်ႈၸိုဝ်ႈ တႃႇၾိုၵ်းၵၢၼ်သိုၵ်း ၸုပ်ႈထီႉ 12 ယူႇယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းၸႄႈဝဵင်းၵေႃႉမူး ၊ တိူင်းတႃႈၵုင်ႈၵေႃႉၼိုင်ႈ လၢတ်ႈဝႃႈ – တေႃႈၼင်ႇ ပၵ်းပိူင်ဢၼ်မီးဝႆႉယၢမ်ႈလဵဝ်ၼႆႉၵူၺ်း ၽူႈၵွၼ်းဝၢၼ်ႈ/ ပွၵ်ႉ ၶဝ်ပေႃးထႆၵိၼ်ငိုၼ်း ၵူၼ်းမိူင်းၼႃႇယဝ်ႉ။ သင်ဝႃႈ ပၵ်းပိူင် (နည်းဉပဒေ) တိူဝ်းတႅတ်ႈမႃးလိူဝ်ၼႆႉထႅင်ႈၸိုင် မိူၼ်ၵၼ် တင်းၼမ်ႉ ဢၼ်မီးတီႈၼႂ်း ၽႃႇမိုဝ်းၶဝ်ၵူၺ်း ၶဝ်ယွၼ်းသင်ၵေႃႈလႆႈပၼ်၊ လွၵ်ႇၸိူင်ႉႁိုဝ်ၵေႃႈ လႆႈၵူဝ်၊ ဢမ်ႇၸၢင်ႈ တၵ်းသဵင်သင် – ဝႃႈၼႆ။

တီႈၼႂ်းပၵ်းပိူင်တွၼ်ႈ 5 ပႃးဝႆႉဝႃႈ  – ၵဵဝ်ႇလူၺ်ႈ ၵၢၼ်လူတ်းယွၼ်ႇပၼ် ၶၢဝ်းယၢမ်း ႁၢပ်ႇၵၢၼ်သိုၵ်း / သုတ်ႉၶၢႆႉၶၢဝ်းယၢမ်း/ ပူတ်းပွႆႇပၼ် တႃႇႁၢပ်ႇၵၢၼ်သိုၵ်း ၸိူဝ်းၼႆႉ ယိုၼ်ႈတၢင်ႇလႆႈယူႇ။ ၵူၺ်းၵႃႈ တေ ၵူတ်ႇထတ်းၵႂႃႇ ၵမ်းၸၼ်ႉၸၼ်ႉ တေႃႇထိုင် ၸၼ်ႉငဝ်ႈငုၼ်း – ဝႃႈၼႆ။

တီႈၼႂ်းပၵ်းပိူင် (နည်းဉပဒေ) မတ်ႉတႃ 50 ၼၼ်ႉသမ်ႉ တႅမ်ႈဝႆႉဝႃႈ – ၵူၼ်းၸိူဝ်းထုၵ်ႇၵူတ်ႇထတ်း ယဝ်ႉ ၼၼ်ႉၵူၺ်း တေလႆႈၵႂႃႇႁၢပ်ႇၵၢၼ်သိုၵ်း။ ၵူၺ်းၵႃႈ သင်ဝႃႈ ဢဝ်ၶေႃႈဢၢင်ႈပၢႆးယူႇလီ ၶေႃႈဢၢင်ႇတၢင်ႇ ပိူင်သေ ယိုၼ်ႈလိၵ်ႈတၢင်ႇယွၼ်းႁႂ်ႈဢီးလူဝၢင်းပွႆႇၶၢမ်ႈပၼ် ယႃႇႁႂ်ႈလႆႈႁၢပ်ႇၵၢၼ်သိုၵ်း/ လူတ်းယွၼ်ႇပၼ် ၶၢဝ်းယၢမ်းႁၢပ်ႇၵၢၼ်သိုၵ်း/ သုတ်ႉၶၢႆႉ ၶၢဝ်းယၢမ်းႁၢပ်ႇၵၢၼ်သိုၵ်း ၸိူဝ်းၼႆႉသေၶေႃႈၶေႃႈၸိုင် ၵွၼ်ႇပႆႇလႆႈ  ၶေႃႈႁပ်ႉႁွင်းတီႈၸုမ်းငဝ်ႈငုၼ်းၼၼ်ႉ ဢမ်ႇမီးသုၼ်ႇ ဢွၵ်ႇၼွၵ်ႈမိူင်း – တီႈၼႂ်းပၵ်းပိူင် (နည်းဉပဒေ) မတ်ႉတႃ 51  ပႃးဝႆႉၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ၵူၼ်းႁဵတ်းၵၢၼ်သိုဝ်ႉၶၢႆဝႂ်ၶိူင်ႈမိၼ် ၵေႃႉၼိုင်ႈလၢတ်ႈဝႃႈ – လွင်ႈၼႆႉ တုမ်ႉယွၼ်ႈ ထိုင် ၵူၼ်းၼုမ်ႇၸိူဝ်းတေဢွၵ်ႇၼွၵ်ႈမိူင်း။ ပဵၼ်ဢၼ်လီလႆႈမႆႈၸႂ်။ မိူၼ်တေႃႈလဵဝ်ၵေႃႈ တီႈဝၢင်းၶိူင်ႈမိၼ် ၼႆႉ မီးသဵၼ်ႈတၢင်း ၊ လၢႆးတၢင်း ဢမ်ႇၶဝ်ႈတၢင်းၵၢၼ်တင်းၼမ်။ သိုၵ်းမၢၼ်ႈ ႁဵတ်းၼႆယိင်ႈၶႅၼ်း ထုၵ်ႇၸႂ် ၼၢႆးၼႃႈ(ပွႆးၸႃး) ၶဝ် ထၢင်ႇႁၢင်ႈယွၼ်းငိုၼ်းၼမ်။ ငဝ်းလၢႆး ၶႅၼ်းတေႁၢႆႉႁႅင်းမႃးထႅင်ႈၵူၺ်း – ဝႃႈၼႆ။

ၼႂ်းပၵ်းပိူင်တွၼ်ႈ 6 သမ်ႉပႃးဝႆႉဝႃႈ –  သင်ဝႃႈ ႁူဝ်ၼပ်ႉၵူၼ်းၵႂႃႇႁၢပ်ႇၵၢၼ်သိုၵ်း လူၺ်ႈၵၢင်ၸႂ် ၸဝ်ႈၵဝ်ႇ ၸိူဝ်းၼၼ်ႉ ဢမ်ႇတဵမ်ၸွမ်းၼင်ႇတမ်းဝၢင်းဝႆႉၸိုင် ၸုမ်းၸႄႈဝဵင်း တေၸႂ်ႉလွၵ်းလၢႆး ၸူၵ်းမႄးသေလိူၵ်ႈ ဢမ်ႇၼၼ် တေလိူၵ်ႈဢဝ်ၵႂႃႇၸွမ်းၼင်ႇ လၢႆးတၢင်း ဢၼ်ငဝ်ႈငုၼ်းတမ်း ဝၢင်းဝႆႉပၼ်။

လိူဝ်ၼၼ်ႉ ဢမ်ႇၵႃး ၼႂ်းမုင်ႉႁေႃႁိူၼ်း 1 လင်ၼၼ်ႉ သင်ဝႃႈ မီးၵူၼ်းဢႃယုတဵမ် တႃႇၵႂႃႇႁၢပ်ႇၵၢၼ် သိုၵ်း ၼမ်လိူဝ်သေ 1 ၵေႃႉၸိုင် ၸိူဝ်းၵိုတ်းဝႆႉၼၼ်ႉၵေႃႈ တေလႆႈပၼ်ႇပုတ်ႈၵၼ်သေ ၵႂႃႇႁၢပ်ႇၵၢၼ်သိုၵ်း။

မိူဝ်ႈၽွင်း မွၵ်ႇႁွင်ႉၵူၼ်းၵေႃႉဢႃယုတဵမ် တႃႇႁၢပ်ႇၵၢၼ်သိုၵ်း ၵႂႃႇသႂ်ႇသဵၼ်ႈမၢႆ/ တၢင်ႇမၢႆၾၢင် (မှတ်ပုံတင် စာရင်းသွင်းဖို့) ၼၼ်ႉ သင်ဝႃႈၵူၼ်းၵေႃႉၺႃးႁွင်ႉၸိုဝ်ႈ ဢမ်ႇၵႂႃႇသႂ်ႇ သဵၼ်ႈမၢႆ/ ဢမ်ႇပွင်ႇ ၶၢဝ်ႇၸိုင်ၸုမ်း ၸၼ်ႉၸႄႈဝဵင်း တေၵႂႃႇၵူတ်ႇထတ်း ၵူၼ်းၼႂ်းႁိူၼ်း။  

သင်ဝႃႈ ၵူၼ်းၵေႃႉၺႃးႁွင်ႉၸိုဝ်ႈ ဢမ်ႇၵႂႃႇသႂ်ႇသဵၼ်ႈမၢႆလႆႈၸိုင် ၵူၼ်းၼႂ်းၼႃႈႁိူၼ်း တေလႆႈၵႂႃႇ လၢတ်ႈ ၼႄလွင်ႈတၢင်း ၊ တေလႆႈဢဝ်ပႃး သၢၵ်ႈသေႇလၵ်းထၢၼ်ဝႃႈ ၵႂႃႇမီးတီႈလႂ်၊ မိူင်းလႂ် ၸိူဝ်းၼႆႉသေ တေလႆႈ သႂ်ႇသဵၼ်ႈတႅၼ်းတၢင်ဝႆႉ – ၼႆယဝ်ႉ။

သင်ဝႃႈ ၵူၼ်းၼႂ်းၼႃႈႁိူၼ်းၵေႃႈ ဢမ်ႇတၢင်တူဝ်သေ ၵႂႃႇသႂ်ႇပၼ်သဵၼ်ႈမၢႆၸိုင် ဢမ်ႇၼၼ် ဢမ်ႇဢဝ် သၢၵ်ႈသေႇလၵ်းထၢၼ် ဢၼ်တဵမ်ထူၼ်ႈ ၵႂႃႇတၢင်ႇၼႄလႆႈၸိုင် တေမၵ်းမၼ်ႈဝႃႈ ငိူင်ႉပၢႆႈပၵ်းပိူင်ၵူၼ်း မိူင်းႁၢပ်ႇၵၢၼ်သိုၵ်း ၊ ပူၼ်ႉပႅၼ်ပၵ်းပိူင် – ဝႃႈၼႆ။ ၵူၺ်းၵႃႈ တေလႆႈၺႃးတၢမ်ႇတၢင်းၽိတ်း ၸိူင်ႉႁိုဝ်ၼႆ ၼၼ်ႉတႄႉ ဢမ်ႇလၢတ်ႈဝႆႉပႃး။

လိူဝ်ၼၼ်ႉ တီႈၼႂ်းပၵ်းပိူင် (နည်းဉပဒေ) ပႃးဝႆႉဝႃႈ ပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်း မိူင်းမၢၼ်ႈ ဢိၵ်ႇ တင်း ၵူႈမိူင်းမိူင်းၸိူဝ်းၼႆ့ တေဝႆ့ပဵၼ် ပၢႆးၽႃသႃလိၵ်ႈလၢႆး (လၵ်းသုတ်ႇ) ဢၼ်ၼိုင်ႈသေ ပူင်သွၼ်ၵႂႃႇ ပၼ် တီႈၼႂ်းႁူင်းႁဵၼ်း ဝႃႈၼႆထႅင်ႈ။  

ၼႂ်းပၵ်းပိူင် (နည်းဉပဒေ) မတ်ႉတႃ 59 တႅမ်ႈဝႆႉဝႃႈ – ၼင်ႇႁိုဝ် ပၵ်းပိူင်ႁၢပ်ႇၵၢၼ်သိုၵ်း ၼႂ်းမိူင်း/ ၼွၵ်ႈမိူင်း ႁွင်ႈၵၢၼ်ၽွင်း လူင်ၾၢႆႇၵႅတ်ႇၶႄ တေႁွတ်ႈၽႅဝ်ၵႂႃႇထိုင် ၼႂ်းၵႄႈၵၢင်ၵူၼ်းတင်းၼမ်ၼၼ်ႉ တေလႆႈပူင် သွၼ် တႄႇဢဝ်ၼႂ်းႁူင်းႁဵၼ်းၵႂႃႇ။ တႃႇတေပူင်သွၼ်ၵႂႃႇလႆႈ ၼႂ်းႁူင်းႁဵၼ်းၼၼ်ႉၵေႃႈ ႁွင်ႈၵၢၼ်ၽွင်းလူင် ၸိူဝ်းၵဵဝ်ႇၶွင်ႈ တေလႆႈႁူမ်ႈၵၼ်ႁဵတ်းသၢင်ႈၵႂႃႇ – ဝႃႈၼႆ။

ပၵ်းပိူင် (နည်းဉပဒေ) တွၼ်ႈ 8 သမ်ႉလၢတ်ႈဝႆႉလွင်ႈ သုၼ်ႇလႆႈၸၢမ်ႇပူၺ်ႈၶွင် ၵူၼ်းမိူင်းၸိူဝ်း ႁၢပ်ႇၵၢၼ် သိုၵ်း ။ ၽူႈႁၢပ်ႇၵၢၼ် လူင်ပွင်ၸိုင်ႈၵေႃႈ တေလႆႈႁၢပ်ႇၵၢၼ်သိုၵ်း။ ၶၢဝ်းယၢမ်းႁၢပ်ႇ ၵၢၼ်သိုၵ်းၼၼ်ႉ တေ ဢဝ်မႃးႁူမ်ႈသႂ်ႇလေႃး ၼႂ်းၶၢဝ်းယၢမ်း ပဵၼ်ၽူႈႁၢပ်ႇၵၢၼ်လူင်ပွင်ၸိုင်ႈ။ ၵူၺ်းၵႃႈ ငိုၼ်းလိူၼ်လႄႈ သုၼ်ႇ လႆႈၸၢမ်ႇပူၺ်ႈတႄႉ တေလႆႈလိူၵ်ႈဢဝ်ဢၼ်ၼိုင်ႈၵူၺ်း – ဝႃႈၼႆ။

ၼႂ်းတွၼ်ႈ 8 မတ်ႉတႃ 44 တႅမ်ႈဝႆႉဝႃႈ – သင်ဝႃႈ ၵူၼ်းႁဵတ်းၵၢၼ် ၼိုင်ႈၵေႃႉ လႆႈၵႂႃႇႁၢပ်ႇၵၢၼ်သိုၵ်း ၸိုင် ငိုၼ်းလိူၼ်/ ၵႃႈႁႅင်းၸိူဝ်းၼႆႉ တေလႆႈၸၢမ်ႇပူၺ်ႈၸွမ်းၼင်ႇ ပၵ်းပိူင် (နည်းဉပဒေ) ႁွင်ႈၵၢၼ် ၽွင်းလူင် ဢၼ်ၵဵဝ်ႇၶွင်ႈတမ်းဝၢင်းဝႆႉပၼ် – ၼႆယဝ်ႉ။

ၼႂ်းၼၼ်ႉ ၸႂ်ႉတိုဝ်းၶေႃႈၵႂၢမ်းဝႆႉဝႃႈ ၵူၼ်းႁဵတ်းၵၢၼ်(အလုပ်သမား) ၼႆၵူၺ်း ဢမ်ႇလၢတ်ႈပႃးဝႃႈ ၵူၼ်း ႁဵတ်းသုၼ်ႇလဵဝ် ၼႆသေတႃႉ ၶႂ်ႈမၢႆထိုင် ၵူၼ်းႁဵတ်းၵၢၼ် သုၼ်ႇလဵဝ်ၵူၺ်း။

သင်ဝႃႈ ၶၢဝ်းယၢမ်းႁၢပ်ႇၵၢၼ်သိုၵ်း ၵူၼ်းႁဵတ်းၵၢၼ်တဵမ်သေ တေပွၵ်ႈၵႂႃႇႁဵတ်းၵၢၼ်ၶိုၼ်းတီႈၵဝ်ႇ ဢမ်ႇၼၼ် သင်တီႈၵၢၼ်ၵဝ်ႇ မီးလွင်ႈယၢပ်ႇၽိုတ်ႇ တႃႇတေႁပ်ႉႁဵတ်းၵၢၼ် ၶိုၼ်းၼႆၸိုင် ၸုမ်းငဝ်ႈငုၼ်းတင်း ႁွင်ႈၵၢၼ်ၽွင်းလူင် ၾၢႆႇၵူၼ်းႁဵတ်းၵၢၼ် တေလႆႈငူပ်ႉငီႉၵၼ် ႁႃပၼ်ၵၢၼ် ဢၼ်မိူၼ်ၶိုၼ်းတီႈၵဝ်ႇ။

ၽူးတၢင်ၼႃႈ ၵေႃႉၼိုင်ႈလၢတ်ႈဝႃႈ – ၵူၼ်းႁဵတ်းၵၢၼ် သုၼ်ႇလဵဝ်ၶဝ် တေၸၢင်ႈႁူပ်ႉလွင်ႈယၢပ်ႇၽိုတ်ႇ ယွၼ်ႉလွင်ႈၸိူဝ်းၼႆႉ။ သင်ဝႃႈ ၵူၼ်းႁဵတ်းၵၢၼ်ၵေႃႉၼိုင်ႈ ဢမ်ႇၸၢင်ႈႁဵတ်းႁိုဝ်သေ လႆႈၵႂႃႇႁၢပ်ႇၵၢၼ်သိုၵ်း ၊ ၽွင်းႁၢပ်ႇၵၢၼ်သိုၵ်းယဝ်ႉသေ တေပွၵ်ႈမႃးႁဵတ်းၵၢၼ်ၶိုၼ်းၼၼ်ႉ တႃႇတေလႆႈၵၢၼ်ၵဝ်ႇၶိုၼ်းၼၼ်ႉ တေလႆႈငူပ်ႉငီႉၵၼ်၊ တေလႆႈပႂ်ႉၶၢဝ်းယၢမ်းႁိုင်။ မိူဝ်ႈၵႂႃႇၵေႃႈယၢပ်ႇ၊ မိူဝ်ႈပွၵ်ႈ မႃးၶိုၼ်းၵေႃႈယၢပ်ႇ ယွၼ်ႉဢမ်ႇၸႂ်ႈသဵၼ်ႈတၢင်း ဢၼ်ၸဝ်ႈၵဝ်ႇလိူၵ်ႈ။ သင်ဝႃႈ ပဵၼ်ၵူၼ်းၵေႃႉ ဢၼ်ႁႃလဵင်ႉၼႃႈႁိူၼ်းၶႅၼ်း ၵိၼ်းၸႂ် – ဝႃႈၼႆ။

ပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းၼႆႉ မီးဝႆႉၸဵမ်မိူဝ်ႈပီ 2010 ။ သိုၵ်းမၢၼ်ႈၶိုၼ်းမႃး ပိုၼ်ၽၢဝ်ႇ မၵ်းမၼ်ႈ ၸႂ်ႉတိုဝ်းတႄႇဢဝ်ၼႂ်းဝၼ်းတီႈ 10/02/2024 မႃး။ ပၢင်သွၼ်ၵၢၼ်သိုၵ်း ၵူၼ်းမိူင်းႁၢပ်ႇၵၢၼ်သိုၵ်း ၸုပ်ႈ ထီႉ 1 ၼႆႉတႄႇပိုတ်ႇမႃး မိူဝ်ႈဝၼ်းတီႈ 01/04/2024။

ဢၢင်ႈဢိင် – BBC