မိူဝ်ႈဝၼ်းတီႈ 16/04/2024 ၼႆႉ ၼၢင်းယိင်းၵေႃႉၼိုင်ႈ ၵူၼ်းဝၢၼ်ႈ မူႇလႃႇတီႇ (မူလာဒီရွာ)၊ ၸႄႈဝဵင်းပူႇတႂ်း (ပူႇတႃႇဢူဝ်ႇ) မိူင်းၶၢင် ၺႃးၸၢင်ႉတူဝ်ၼိုင်ႈယဵပ်ႇတၢႆ ၽွင်းၵႂႃႇႁႃတွင် ဝႃႈၼႆ။

ၸၢင်ႉတူဝ်ၼၼ်ႉ ၶဝ်ႈသွၵ်ႈတဝ် ယႃႉၵဝ်းၼႂ်းဝၢၼ်ႈထႅင်ႈလႄႈ ႁဵတ်းႁႂ်ႈၵူၼ်းဝၢၼ်ႈ လႆႈလူႉတၢႆၵႂႃႇ 4 ၵေႃႉ။ ပဵၼ်ထဝ်ႈယိင်း ဢႃယု 80 ပၢႆ 3 ၵေႃႉလႄႈ ဢႃယု 30 ပၢႆ ၵေႃႉၼိုင်ႈ။

ၵူၼ်းဝၢၼ်ႈမူႇလႃႇတီႇ ၵေႃႉၼိုင်ႈ လၢတ်ႈဝႃႈ – ဢၼ်ၺႃးၸၢင်ႉယဵပ်ႇသေ လူႉတၢႆၼႆႉ မီး 3 ၵေႃႉ။ ထႅင်ႈၵေႃႉၼိုင်ႈသမ်ႉ ယွၼ်ႉတူၵ်းၸႂ်ၵူဝ်ႁႅင်းသေ လူႉတၢႆ။ ၸၢင်ႉၼၼ်ႉ မီးၸဝ်ႈၶွင်ယူႇ။ ယၢမ်းလဵဝ် တုၵ်းယွၼ်းဝႆႉ ႁႂ်ႈၵူၼ်းသိုၵ်းၶဝ် မႃးၶႃႈႁႅမ်ၸၢင်ႉၼၼ်ႉတၢႆသေတႃႉ ပႆႇႁၼ်တုမ်ႉတွပ်ႇသင်ၶိုၼ်း၊ ၸၢင်ႉတူဝ်ၼၼ်ႉၵေႃႈ တိုၵ်ႉလွတ်ႈဝႆႉ – ဝႃႈၼႆ။

တူဝ်တၢႆၼၢင်းယိင်း ၵေႃႉၺႃးၸၢင်ႉယဵပ်ႇဢွၼ်တၢင်းသုတ်းၼၼ်ႉ တိုၵ်ႉၵဵပ်းလႆႈ ၶႃသွင်ၶွၼ်လႄႈ ႁူဝ်မႃႇၼိုင်ႈၾၢႆႇၵူၺ်း။ ယွၼ်ႉၸၢင်ႉ ၶဝ်ႈသွၵ်ႈတဝ် ယႃႉၵဝ်းၼႂ်းမူႇဝၢၼ်ႈလႄႈ ၵူၼ်းဝၢၼ်ႈၶဝ် ဢွၼ်ၵၼ်ပၢႆႈၵႂႃႇယူႇသဝ်းဝႆႉၼႂ်းႁိူၼ်း ၸိူဝ်းၶိုင်ႇၶမ်ႉလႄႈ ၼႂ်းၵျွင်းၽြႃး ၸိူဝ်းၼႆႉ။

တီႈၼႂ်းၸႄႈတွၼ်ႈပူႇတႂ်းၼႆႉ ၵူၼ်းၼႂ်းပိုၼ်ႉတီႈ ၺႃးၸၢင်ႉ ၸိူဝ်းမီးၸဝ်ႈၶွင် ႁဵတ်းႁၢႆႉၶႃႈတၢႆသေ ဢမ်ႇၵႃး ၸွမ်းသဵၼ်ႈတၢင်းပူႇတႂ်း – ၸေႈၼႃး (မျိတ်ႉၵျီးၼႃး) လႄႈ သူၺ်ႇမေႃႇ ၸိူဝ်းၼႆႉၵေႃႈ ၺႃး ၸၢင်ႉထိူၼ်ႇ သွၵ်ႈတဝ်ယႃႉၵဝ်းဝႆႉ ဝႃႈၼႆ။

မိူဝ်ႈဝၼ်းတီႈ 12/03/2025 ၼၼ်ႉၵေႃႈ ၸၢင်ႉတူဝ်ၼိုင်ႈ ယႃႉၵဝ်းၼႂ်းဝၢၼ်ႈသေ ယဵပ်ႇတၢႆၵူၼ်းၸၢႆး 3 ၵေႃႉ ၼႂ်းၸႄႈဝဵင်းတၼၢႆး မိူင်းၶၢင် – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။