ဝၼ်းတီႈ 16/04/2025 ၸုမ်းၼၢင်းယိင်းမိူင်းႁူမ်ႈတုမ် (Burmese Women’s Union) ဢွၵ်ႇၽိုၼ်ႁၢႆး ငၢၼ်းဝႃႈ ၼႂ်းလိူၼ်မၢတ်ႊၶျ် ၶၢဝ်းတၢင်းလိူၼ်လဵဝ်ၵူၺ်း သိုၵ်းမၢၼ်ႈ ပူၼ်ႉပႅၼ်သုၼ်ႇလႆႈၵူၼ်း ၶႃႈ ႁႅမ်ၼၢင်းယိင်းတၢႆ 66 ၵေႃႉ မၢတ်ႇၸဵပ်း 88 ၵေႃႉ ဝႃႈၼႆ။
ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ဢွၵ်ႇဝႆႉဝႃႈ – “ၼႂ်းလိူၼ်မၢတ်ႊၶျ် ပီ 2025 ၼႆႉ ၵူၼ်းမိူင်းလႆႈႁူပ်ႉ ၽေးၽႅၼ်ႇလိၼ်ဝႆႁၢဝ်ႈႁႅင်း။ ၾၢႆႇၼိုင်ႈၵေႃႈ သိုၵ်းမၢၼ်ႈ ဢမ်ႇႁၼ်ထိုင်ၵၢင်ၸႂ်ၵူၼ်းမိူင်းသေ ယင်း သိုပ်ႇႁဵတ်းပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်း ၼမ်ႁႅင်းမႃးလိူဝ်ၵဝ်ႇ၊ ႁဵတ်းႁႂ်ႈၼၢင်းယိင်း ဢိၵ်ႇ ပႃး ၼုမ်ႇယိင်းဢွၼ်ႇ ၸိူဝ်းဢႃယုပႆႇထိုင် 18 ပီ လူႉတၢႆမၢတ်ႇၸဵပ်းၸွမ်းထႅင်ႈ ၼမ်မႃးၵူႈမိုဝ်ႉၵူႈ ဝၼ်း” – ဝႃႈၼႆ။
ၸွမ်းၼင်ႇ ၸုမ်းၼၢင်းယိင်းမိူင်းႁူမ်ႈတုမ် ၵဵပ်းဝႆႉသဵၼ်ႈမၢႆတႄႉ ၼၢင်းယိင်း ဢၼ်တၢႆယွၼ်ႉသိုၵ်းမၢၼ်ႈ ၼႂ်းလိူၼ်မၢတ်ႊၶျ်ပူၼ်ႉမႃးၼႆႉ ပႃးၼၢင်းယိင်းၸိူဝ်းယူႇသဝ်းၼႂ်းမိူင်းတႆး 12 ၵေႃႉ၊ မိူင်းၶၢင် 2 ၵေႃႉ၊ မိူင်းယၢင်းလႅင် 2 ၵေႃႉ၊ မိူင်းရၶႅင်ႇ 2 ၵေႃႉ၊ မိူင်းယၢင်းၽိူၵ်ႇ 2 ၵေႃႉ၊ တိူင်းမၵူၺ်း 15 ၵေႃႉ၊ တိူင်းမၼ်းတလေး (ဝဵင်းလိူဝ်ႇ) 12 ၵေႃႉ၊ တိူင်းၸႄႈၵႅင်း 9 ၵေႃႉ၊ တိူင်းပႃႇၵိူဝ် 7 ၵေႃႉ လႄႈ တိူင်းဢေႇရႃႇဝတီႇ 1 ၵေႃႉ။
တႄႇႁူဝ်ပီ 2025 ၶၢဝ်းတၢင်းသၢမ်လိူၼ်မႃးၼႆႉ သိုၵ်းမၢၼ်ႈ ႁဵတ်းလွင်ႈပူၼ်ႉပႅၼ်ၵူႈလွင်ႈလွင်ႈသေ ၼၢင်းယိင်းၸိူဝ်းလႆႈတၢႆၵႂႃႇ ၼႂ်းလိူၼ်ၵျႅၼ်ႊၼိဝ်ႊရီႊ မီး 86 ၵေႃႉ၊ လိူၼ်ၾႅပ်ႊပိဝ်ႊရီႊ မီး 66 ၵေႃႉ၊ လိူၼ်မၢတ်ႊၶျ် 66 ၵေႃႉ။
ၶေႃႈမုလ်းၸိူဝ်းၼႆႉ ၾၢႆႇၸုမ်းၼၢင်းယိင်းမိူင်းႁူမ်ႈတုမ် (BWU) လႆႈၵဵပ်းႁွမ်မႃး ၸွမ်းၼင်ႇယိုၼ်း ထိုင်လႆႈၼၼ်ႉၵူၺ်း။ လွင်ႈလူႉတၢႆမၢတ်ႇၸဵပ်း ၼႂ်းပိုၼ်ႉတီႈ ၸၢင်ႈမီးၼမ်လိူဝ်ၼႆႉထႅင်ႈယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ