ၵၢပ်ႈပၢၼ်ဝၼ်းမိူဝ်ႈၼႆႉ လဵၵ်ႉယႂ်ႇၼုမ်ႇထဝ်ႈ သၢမ်ပၢၼ်ၸဵတ်းသႅၼ်း ဢွၼ်ၵၼ်ၸပ်းယိၼ်ႉ ယိပ်းမိုဝ်းထိုဝ် တူၺ်းသိုဝ်ႇၼႅင်ႈသၢၼ် တႄႇၸဵမ်မိုၼ်းတႃတိုၼ်ႇမႃးတေႃႇထိုင်ပေႃးလပ်းတႃၶိုၼ်း။ လုၵ်ႈဢွၼ်ႇ သႅၼ်းပၢၼ်ယႂ်ႇလႄႈၵူၼ်းလူင်တႄႉ မီးတၢင်းႁူႉတႅပ်းတတ်း မေႃလိူၵ်ႈတူၺ်း ဢၼ်မီးၽွၼ်းလီ ၊ မေႃ တႅပ်း တတ်းၶၢဝ်းၵိၼ် ၶၢဝ်းၼွၼ်း ၶၢဝ်းလိုဝ်ႈ ၶၢဝ်းတူၺ်း ယူႇသေတႃႉ – လုၵ်ႈဢွၼ်ႇလဵၵ်ႉ သႅၼ်းပၢၼ် ပႃႈတႂ်ႈ 10 ၶူပ်ႇၼၼ်ႉတႄႉ  ယဵၼ်းပဵၼ်လုၵ်ႈဢွၼ်ႇၸွႆးမိုဝ်းထိုဝ်သေ ၸၢင်ႈပဵၼ်ၽေးတေႃႇတူဝ် တေႃႇ ၸၢတ်ႈပၢၼ်ပႅတ်ႈ။ ပေႃးပဵၼ်လုၵ်ႈဢွၼ်ႇ ၸပ်းယိၼ်ႉလဵၼ်ႈၵဵမ်းၼႆ ယိင်ႈၶႅၼ်းႁၢႆႉ။

ဝၢၼ်ႈမိူင်းၶိုၼ်ႈယႂ်ႇ တီႈမီးၾႆးၾႃႉ မီးဢိၼ်ႊထိူဝ်ႊၼႅတ်ႇတဵမ်ထူၼ်ႈ မိူၼ်ၼင်ႇမိူင်းထႆးၼႆ – လုၵ်ႈဢွၼ်ႇ တိတ်းၸွႆး ၵဵမ်း ထိုင်တီႈတုမ်ႉတိူဝ်ႉပၢႆးတူဝ် ပၢႆးၸႂ်- လႆႈဢဝ်ၵႂႃႇယူတ်းယႃတူဝ်  10 ထိုင် 15 ပိူဝ်ႊသႅၼ်ႊ ယဝ်ႉ ဝႃႈၼႆ။   

ယွၼ်ႉသင်လႄႈလုၵ်ႈဢွၼ်ႇတိတ်းၸွႆးလဵၼ်ႈၵဵမ်း

 ယွၼ်ႉဝႃႈ လဵၼ်ႈၵဵမ်းၼႆႉ မီးတၢင်းမူၼ်ႈသိူဝ်းၸႂ် ၼႆတႄႉၽႂ်တေဢမ်ႇၸၢင်ႈထဵင်။ လိူဝ်သေသၢင်ႈ တၢင်း မူၼ်ႈသိူဝ်း လႆႈလီယဝ်ႉ  ထႅၵ်ႉၼူဝ်ႊလူဝ်ႊၵျီႊ တီႈႁဵတ်းႁႂ်ႈသိုဝ်ႇၵူႈဢၼ်ဢၼ် ယဵၼ်းပဵၼ်ၶူဝ်းၶွင်ၸမ်တူဝ် လႄႈ ၶဝ်ႈထိုင်ၶဝ်ႈ တူၺ်းလႆႈငၢႆႈ။ ဝၼ်းမိူဝ်ႈၼႆႉ ပေႃႈမႄႈ ၽူႈၵုမ်း 99 ပိူဝ်ႊသႅၼ်ႊ ၼႆႉသမ်ႉ တႃႇတေ ႁဵတ်း ၵၢၼ် ငၢႆႈၼၼ်ႉ ဢဝ်မိုဝ်းထိုဝ် ယဵတ်ႈပၼ်လုၵ်ႈလၢင်းၸဝ်ႈၵဝ်ႇတိၵ်းတိၵ်း။ လုၵ်ႈဢွၼ်ႇလဵၵ်ႉ ၶူပ်ႇ သွင်ၶူပ်ႇၵူၺ်းၵေႃႈ သမ်ႉပေႃးပၼ်ယိပ်းမိုဝ်းထိုဝ်ယဝ်ႉ။ လုၵ်ႈဢွၼ်ႇၸိူဝ်းၼႆႉ ၵမ်ႈၼမ် ယဵၼ်းပဵၼ် လုၵ်ႈဢွၼ်ႇ သူင်လဵၼ်ႈၵဵမ်း ၵႂႃႇပႅတ်ႈ။  လိုၼ်းသုတ်း ႁဵတ်းႁႂ်ႈမီးၽွၼ်းၸႃႉတေႃႇပၢႆးယူႇလီ လုၵ်ႈဢွၼ်ႇ။ ယွၼ်ႉဝႃႈ ပေႃးလုၵ်ႈဢွၼ်ႇ တိတ်းၸွႆးၾူင်းႁႅင်းပူၼ်ႉတီႈၸိုင် ၸၢင်ႈႁဵတ်းႁႂ်ႈဢွၵ်းဢေႃလူႉ လႄႈ မီးၽွၼ်းၸႃႉတၢင်ႇၸိူဝ်ႉတၢင်ႇပိူင်ၸွမ်းမႃး  မိူၼ်ၼင်ႇ –

ပၢႆးယူႇလီ ပၢႆးတူဝ်ဢၼ်ၽိတ်း ၾိင်ႈတိုၼ်းပဵၼ်သၽႃႇဝ – လုၵ်ႈဢွၼ်ႇတေတႄႇမီးတၢင်းပဵၼ်ႁူဝ်ၶႆႈ တႃၸဵပ်း တႃလႅင် ၶေႃးၶတ်း လႄႈ တွင်ႉၵႅၼ်းလူၺ်ႈဢမ်ႇႁူႉငဝ်ႈငႃႇမၼ်း။ မၢင်ၵေႃႉတိူဝ်ႉ  ၼိူဝ်ႉတီႈတႃ ႁၢဝ်ႈႁႅင်း ထိုင်တီႈ လႆႈၽႃႇ တတ်းယူတ်းယႃၵေႃႈမီး။ လုၵ်ႈဢွၼ်ႇမၢင်ၵေႃႉၵေႃႈ ပဵၼ်တၢင်းပဵၼ်ၶၢတ်ႇ တၢင်းၵိၼ်ဢႁႃႇရ  (ယွၼ်ႉၵိၼ်ဢမ်ႇမၢၼ်ႇ ၵိၼ်ဢမ်ႇမႅၼ်ႈတွၼ်ႈတႃႇပၢႆးယူႇလီ) ႁိုဝ် တၢင်းပဵၼ်ပီး (ယွၼ်ႉၼင်ႈတီႈၵဝ်ႇတီႈလဵဝ်သေ လဵၼ်ႈၾူၼ်ႊ ၼႂ်းၶၢဝ်းယၢမ်းႁိုင်)။  ၸိူဝ်းၼႆႉၸၢင်ႈတုမ်ႉတိူဝ်ႉထိုင်ဢဵၼ် – ၵၢမ်ႈၼိူဝ်ႉလႄႈ သဵၼ်ႈလိူတ်ႈတၼ် ၸိူဝ်းၼႆႉ။

ဢွၵ်းဢေႃႁူတ်း  တၢင်းႁူႉဢမ်ႇႁုၼ်ႈမုၼ်း – ယူႇတီႈၾၢႆႇမေႃယႃၶဝ် ၵူတ်ႇထတ်းထူပ်းႁၼ်ဝႃႈ လုၵ်ႈဢွၼ်ႇ လဵၼ်ႈၵဵမ်း ယိပ်းမိုဝ်းထိုဝ် ၼိုင်ႈၵမ်းႁိုင် 2 ၸူဝ်ႈမူင်းၶိုၼ်ႈ၊  လဵၼ်ႈၵဵမ်းမႃးမွၵ်ႈ 2 ပီၼၼ်ႉ ပေႃးသၵႅၼ်ႊတူၺ်းတၢင်း MRI ၸိုင် တေလႆႈႁၼ်ဝႃႈ  ဢွၵ်းဢေႃႁူတ်းၵႂႃႇ  ၊ ပေႃးဢွၵ်းဢေႃ ဢမ်ႇမုၼ်းဢမ်ႇယႂ်ႇၵေႃႈ ၺၢၼ်ႇပၢႆးႁူႉၵေႃႈ တေဢမ်ႇႁုၼ်ႈမုၼ်း၊ လွင်ႈမၢႆတွင်းၵေႃႈတေဢမ်ႇၵိုမ်း ၸၢင်ႈလူင်လူင်လိုမ်းလိုမ်း ဢမ်ႇမေႃၼမ်ႉၼၵ်းသင်၊ ၶီႈၶၢၼ်ႉဝူၼ်ႉ၊ ၵၢၼ်ႁဵၼ်းႁူႉလႄႈလွင်ႈၵႄႈလိတ်ႈပၼ်ႁႃ တေထိူင်း၊ လိုၼ်းသုတ်း ပဵၼ်လုၵ်ႈဢွၼ်ႇၸႂ်ပိတ်းၸႂ် ပွတ်းတေႃးသယႂ်ႇ၊ ဢၼ်ထႆးၶဝ်ႁွင်ႉဝႃႈ သမႃႇထိသၼ်ႉ (ဢမ်ႇမီးသမႃႇထိ)  ။

ၶဝ်ႈတူင်ႇဝူင်းၵူၼ်းယၢပ်ႇ – လုၵ်ႈဢွၼ်ႇ ယိပ်းမိုဝ်းထိုဝ်ႁိုင်ၼႆႉ ဢမ်ႇသူႈၶဝ်ႈၵၼ်တင်းၽႂ်လႆႈလီ။ ၵၢၼ်ၵပ်းသိုပ်ႇတိတ်းတေႃႇ ပႆႇဝႃႈၼွၵ်ႈႁိူၼ်း ၼႂ်းဝၢၼ်ႈၼႂ်းၶူင်ႇ ၼႂ်းတူင်ႇဝူင်းလႃႈ- တင်းၵူၼ်းၼႂ်းႁိူၼ်း ၼႂ်းယေးၸဝ်ႈၵဝ်ႇၵူၺ်းၵေႃႈ ဢမ်ႇၶဝ်ႈၽႂ်လႆႈ ၵႆႉမီးပၼ်ႁႃ  တွပ်ႇထဵင်ၽိတ်းမေႃးၵၼ် ဢမ်ႇမေႃ ဢဝ်ၸႂ်ၵၼ် ဢမ်ႇမေႃၵေႃႇသၢင်ႈလွင်ႈဢုၼ်ႇၸႂ်တေႃႇၵၼ်။  

လူမ်းႁၢဝ်ႈ တၢင်းႁဵတ်းသၢင်ႈၵေႃႈႁၢဝ်ႈ/ႁႅင်း-  လုၵ်ႈဢွၼ်ႇဢႃယုပႆႇတဵမ် 6 ပီ ပေႃးမီးလူမ်းႁၢဝ်ႈ တေႃးသယႂ်ႇ ၸႂ်လမ်ငၢႆႈ လၢတ်ႈၵႂၢမ်းႁၢႆႉၸႃႉဢွၵ်ႇမႃးၸိူဝ်းၼႆႉ တၵ်းပဵၼ်ယွၼ်ႉ ယိပ်းမိုဝ်းထိုဝ်ပူၼ်ႉၶၢဝ်းယၢမ်း ဢမ်ႇထုၵ်ႇယိပ်း။ လုၵ်ႈဢွၼ်ႇၸိူဝ်းၼႆႉ  ပေႃးဢမ်ႇၼႅတ်ႈမူၼ်ႉမႄး ၊ ၾိုၵ်းပၼ်ပိူင်ယူႇသဝ်းၵိၼ်သၢင်ႈၶဝ်ဝႆးဝႆးၸိုင် ယိင်ႈၵေႃႉယႂ်ႇမႃး ယိင်ႈၶႅၼ်းတေႁၢႆႉႁႅင်းမႃးတိၵ်းတိၵ်း။ သင်ၸိူဝ်ႉပေႃႈမႄႈၵေႃႈ ဢမ်ႇၾၢင်ႉ ဢမ်ႇသႂ်ႇၸႂ်ၼိူဝ်လုၵ်ႈလၢင်းၸဝ်ႈၵဝ်ႇသေ ပွႆႇဝႆႉၸိူင်ႉၼၼ်ၵႂႃႇၸိုင် ပေႃးၵေႃႉယႂ်ႇမႃး ၸၢင်ႈမီးပၼ်ႁႃထိုင်တၢင်းပၢႆးၸႂ်။ ၸၢင်ႈသၢင်ႈပၼ်ႁႃၼႂ်းတူင်ႇဝူင်းၵူၼ်း – မုင်ႈသူႇသဵၼ်ႈတၢင်းဢမ်ႇလီ။ ဢမ်ႇၼၼ် လုၵ်ႈဢွၼ်ႇၸိူဝ်းၼႆႉ ၸၢင်ႈပဵၼ်တၢင်းပဵၼ် ငဝ်မိုင် ၊ တိူဝ်ႉၸႂ်ငၢႆႈ ထၢတ်ႈၸႂ်တူၵ်းငၢႆႈ-ၼၼ်ႉၵေႃႈ မုင်ႈသူႇသဵၼ်ႈတၢင်းႁၢႆႉၸႃႉ တေႃႇတူဝ်လုၵ်ႈဢွၼ်ႇ လႄႈ ၼေႃႇတႅၼ်းၶိူဝ်းသႅၼ်းႁုၼ်ႈမႂ်ႇ လူးၵွၼ်ႇ။ 

တၢင်းပဵၼ် 4 သႅၼ်းဢၼ်လၢမ်းၶၢတ်ႈလႆႈဝႃႈ လုၵ်ႈဢွၼ်ႇတိတ်းၸွႆးမိုဝ်းထိုဝ်ႁႅင်း လူဝ်ႇလႆႈႁႃလၢႆးယူတ်းယႃ

ပေႃႈမႄႈ ဢမ်ႇၼၼ် ၵူၼ်းလုမ်းလႃးလုၵ်ႈဢွၼ်ႇ ထုၵ်ႇလႆႈ ၾၢင်ႉတူၺ်းလုၵ်ႈလၢၼ်ႁဝ်းတႃႇသေႇဝႃႈ ယိပ်းၾူၼ်ႊ မိုဝ်းထိုဝ် လဵၼ်ႈသိုဝ်ႇၼႅင်ႈသၢၼ် လဵၼ်ႈၵဵမ်း ႁိုဝ်လၢႆၸူဝ်ႈမူင်းယဝ်ႉ -ၼႆယူႇတႃႇသေႇ။  ပေႃးႁၼ် 4 ၶေႃႈဢၼ်တေလၢတ်ႈၼေၼႆႉၼႆတႄႉ ထုၵ်ႇလီဢဝ်လုၵ်ႈလၢၼ်ၸဝ်ႈၵဝ်ႇၵႂႃႇၸူးမေႃယႃ – ႁပ်ႉလွင်ႈယူတ်းယႃ ၽႂ်းၽႂ်း။ 

1. လုၵ်ႈဢွၼ်ႇၼၼ်ႉ ဢမ်ႇသူၼ်ၸႂ် ႁိုဝ် ဢမ်ႇႁဵတ်းလွင်ႈတူင်ႉၼိုင်သင်သေပိူင်( ပႃးတၢင်းလွင်ႈဢၼ်ၶဝ်သူင်ႁဵတ်း) 
2. ဢမ်ႇမီးလွင်ႈႁပ်ႉပုၼ်ႈၽွၼ်းသင် (ဢမ်ႇသူၼ်ၸႂ်ၼႂ်းၵၢၼ်ႁဵၼ်းလိၵ်ႈလၢႆး ပႃးၸဵမ်လွင်ႈႁဵတ်းသၢင်ႈလုမ်းလႃးတူဝ်ၵဝ်ႇ ဢၼ်ထုၵ်ႇလႆႈႁဵတ်းယူႇၵူႈဝၼ်းဝၼ်း)  
3. ဢမ်ႇၵုမ်းၸႂ်လႄႈ ဢမ်ႇၵုမ်းၶၢဝ်းယၢမ်းလဵၼ်ႈမိုဝ်းထိုဝ်ၸဝ်ႈၵဝ်ႇလႆႈ ( လဵၼ်ႈမိုဝ်းထိုဝ် ဢမ်ႇယွမ်းပွႆႇၽႃႈ ႁိုင်ၼၢၼ်းထပ်းၵၼ်လၢႆဝၼ်း) 
4. ၸႂ်ပိတ်းၸႂ်ပွတ်း ၶီႈၸႂ်လမ်ငၢႆႈ (လွင်ႈႁဵတ်းသၢင်ႈႁၢဝ်ႈႁႅင်း- ၽႂ်လၢတ်ႈသင်မႃးၵေႃႈ ဢမ်ႇမေႃႁၼ်လီ ဢမ်ႇယွမ်းႁပ်ႉ၊ သၢၼ်ၶတ်းလႄႈႁႃတၢင်းၽိတ်းတေႃႇၶိုၼ်းၵူႈလွင်ႈ)

ၶေႃႈၵႂၢမ်းဢၼ်ဝႃႈ – လုၵ်ႈဢွၼ်ႇလူမ်းႁၢဝ်ႈ ၸႂ်ပိတ်းပွတ်းၼႆႉ  ၵမ်ႈၼမ်သမ်ႉတေထၢင်ႇဝႃႈပဵၼ်ၽွင်း ပေႃႈမႄႈ ၸႂ်ႉပွႆႇမိုဝ်းထိုဝ်ၼၼ်ႉၵူၺ်း – ၼႆ။ ၵူၺ်းၵႃႈဢမ်ႇၸႂ်ႈၸိူင်ႉၼၼ်။ လုၵ်ႈဢွၼ်ႇတိတ်းၸွႆးမိုဝ်းထိုဝ်ၼႆႉ ပေႃႈမႄႈႁၢမ်ႈလွင်ႈသင်ၵေႃႈယဝ်ႉ တိုၼ်းပဵၼ်လွင်ႈၸႂ်လမ်သႆႈၵမ်ႇ။ ၵႆႉမေႃဝိုတ်ႉထိုမ်ႈၶူဝ်းၶွင် ယႃႉၶူဝ်းၶွင်ၵွႆ လွႆးလွႆးမႃး ၸၢင်ႈႁဵတ်းႁၢႆႉပိူၼ်ႈပႃး။ ပေႃးဢမ်ႇမိူၼ်ၸႂ်မႃး ၸၢင်ႈႁဵတ်းႁၢႆႉပေႃႉထုပ်ႉပႃးပေႃႈမႄႈထႅင်ႈ။  လိုၼ်းလၢႆးဝၢႆးမႃး ပၼ်ႁႃလဵၵ်ႉလဵၵ်ႉၵူၺ်းၵေႃႈ ဢမ်ႇၵုမ်းလူမ်းၵုမ်းၸႂ်ၸဝ်ႈၵဝ်ႇလႆႈ ၵေႃႈမေႃပဵၼ်မႃး။

ၽႂ်တေၸၢင်ႈမူၼ်ႉမႄးယူတ်းယႃပၼ်ၾိင်ႈယၢမ်ႈလႄႈလူမ်းႁၢႆႉၸႃႉၸိူဝ်းၼႆႉ

ပေႃႈမႄႈၼႆႉလမ်ႇလွင်ႈသုတ်း – တႃႇၸွႆႈမူၼ်ႉမႄးၾိင်ႈယၢမ်ႈတၢင်းႁဵတ်းသၢင်ႈလုၵ်ႈဢွၼ်ႇ။ လုၵ်ႈဢွၼ်ႇလဵၼ်ႈၵဵမ်းၼႆႉ ၽွၼ်းလီမီးဢေႇလႄႈ ၽွၼ်းၸႃႉမီးၼမ်။ ပၼ်လုၵ်ႈဢွၼ်ႇလဵၼ်ႈၵဵမ်း ယိပ်းၾူၼ်ႊမိုဝ်းထိုဝ်ၼႆႉ တီႈတႄႉမၼ်း ယိင်ႈၶႅၼ်းႁဵတ်းႁႂ်ႈပေႃႈမႄႈလႄႈလုၵ်ႈလၢင်းႁၢင်ႇယၢၼ်ၵၼ်၊ ဢမ်ႇမီးၶၢဝ်းယၢမ်း သင်ႇသွၼ်ၵၼ်လွင်ႈလီလွင်ႈၸႃႉ ဢၼ်ပေႃႈမႄႈထုၵ်ႇသင်ႇသွၼ်ပၼ်လုၵ်ႈလၢင်း။ ပေႃးဢမ်ႇလႆႈသင်ႇသွၼ်လၢတ်ႈၼေၵၼ်ၸိုင် တေၵႂႃႇတုမ်ႉယွၼ်ႉၽွင်းလုၵ်ႈဢွၼ်ႇပဵၼ်မၢဝ်ႇပဵၼ်သၢဝ်မႃး၊ ႁေႃႊမူၼ်ႊ ၼႂ်းတူဝ်လႅၵ်ႈလၢႆႈမႃးၸိူဝ်းၼႆႉ  ၸၢင်ႈမီးၽွၼ်းယွၼ်ႈၵမ်းသိုဝ်ႈ။ 

ၶၵ်ႉတွၼ်ႈၵၢၼ်ယူတ်းယႃ မေႃယႃတေထတ်းသၢင်လွင်ႈႁဵတ်းသၢင်ႈလုၵ်ႈဢွၼ်ႇ တေတူၺ်းလွင်ႈလၢတ်ႈၸႃ လွင်ႈႁဵတ်းသၢင်ႈ ၸိူဝ်းၼႆႉ။ ၼွၵ်ႈလိူဝ်ၼၼ်ႉ တေထတ်းသၢင်ပႃးၼမ်ႉၵတ်ႉပေႃႈမႄႈ လႄႈ ၽူႈၵုမ်းလုၵ်ႈဢွၼ်ႇ- ဝႃႈ – ဢဝ်ပုၼ်ႈၽွၼ်းၼိူဝ်လုၵ်ႈလၢင်းၸိူင်ႉႁိုဝ် သင်ႇသွၼ်ပူၵ်းပွင်ၵၼ်ၸိူင်ႉႁိုဝ် ၸဵမ်ၸိူဝ်းၼႆႉယဝ်ႉ ၸင်ႇၸၢင်ႈ  ၼႄႉၼမ်း ဝႃႈတေႁဵတ်းႁိုဝ် မူၼ်ႉမႄးၾိင်ႈယၢမ်ႈလွင်ႈႁဵတ်းသၢင်ႈလုၵ်ႈဢွၼ်ႇ  ။

မၵ်းမၼ်ႈၶၢဝ်းယၢမ်းလဵၼ်ႈၾူင်းပၼ်ႁႂ်ႈတႅတ်ႈတေႃး၊ ၸတ်းၵၢၼ်ၵုမ်းတူၺ်းလွင်ႈၸႂ်ႉသူဝ်ႊသျေႊ မီႊတီႊယႃႊ (Social Media) ။ ဢၼ်သၢင်ႇထုၵ်ႇသုတ်းတႄႉ ထုၵ်ႇလႆႈပၼ်လဵၼ်ႈမိုဝ်းထိုဝ် ၼႂ်းဝၼ်းႁဵတ်းၵၢၼ် ၼိုင်ႈဝၼ်း ဢမ်ႇ ပူၼ်ႉ 1 ၸူဝ်ႈမူင်း လႄႈ ဝၼ်းသဝ် ဝၼ်းတိတ်ႉ ၼိုင်ႈဝၼ်းဢမ်ႇပူၼ်ႉ 2 ၸူဝ်ႈမူင်း ။  ၶႂ်ႈလဵၼ်ႈၶၢဝ်းလႂ်ၵေႃႈလႆႈ  ၵူၺ်းၵႃႈ လူဝ်ႇလႆႈလဵၼ်ႈၸွမ်းၶၢဝ်းယၢမ်းတီႈမၵ်းမၼ်ႈဝႆႉ ၼၼ်ႉၵူၺ်း။

  ပေႃးပဵၼ်လုၵ်ႈဢွၼ်ႇ ဢႃယု 3 ၶူပ်ႇလူင်းတႂ်ႈၸိုင် မေႃယႃ ယင်းပႆႇပၼ်တူၺ်းၾူၼ်ႊ လဵၼ်ႈၵဵမ်း ယိပ်းမိုဝ်းထိုဝ်ႁိုဝ် ထႅပ်ႊလႅတ်ႉ။

လုၵ်ႈဢွၼ်ႇဢႃယု 3 ထိုင် 6 ၶူပ်ႇၼႆႉ ပေႃႈမႄႈတေလႆႈၸတ်းတူၺ်းပၼ်ၵဵမ်း ဢမ်ႇၼၼ် တၢင်းႁူႉ ဢၼ်တေပူၵ်းပွင်ပၼ်လုၵ်ႈဢွၼ်ႇႁႂ်ႈထုၵ်ႇသႅၼ်းပၢၼ်။

လုၵ်ႈဢွၼ်ႇဢႃယု 6 ပီၶိုၼ်ႈၼိူဝ်   ထုၵ်ႇလီ လိူၵ်ႈၵဵမ်း ဢၼ်ဢမ်ႇမီးလွင်ႈလိူင်းၸိူင်း  ။  ၵူဝ်လုၵ်ႈဢွၼ်ႇ ၸပ်းၾိင်ႈယၢမ်ႈတၢင်းႁဵတ်းသၢင်ႈ ႁၢႆႉႁႅင်း၊ ၸၢင်ႈႁဵတ်းႁႂ်ႈလုၵ်ႈဢွၼ်ႇပဵၼ်ၵူၼ်းတိုဝ်တၼ်။ 

ၸူဝ်းလုၵ်ႈဢွၼ်ႇႁဵတ်းပႃးတၢင်ႇမဵဝ်း  ယွၼ်ႉပိူဝ်ႈၵူၼ်းလဵၼ်ႈၵဵမ်းၼႆႉ ၸၢင်ႈတိူဝ်ႉၸႂ်ငၢႆႈ ၊ ပေႃးမီးႁႅင်းဢီး ထႅင်ႈ လၢႆလၢႆၾၢႆႇ ယိင်ႈၶႅၼ်းႁဵတ်းႁႂ်ႈလူမ်းပွတ်းတေႃးသဢွၵ်ႇႁႅင်း။ ပေႃးလႆႈလဵၼ်ႈၵဵမ်းပဵၼ်မူႇပဵၼ်ၸုမ်း – သမ်ႉမီး လွင်ႈၶဵင်ႇတႃႉၵၼ်တင်း ဢူၺ်းၵေႃႉထႅင်ႈၼႆၸိုင် ယိင်ႈၶႅၼ်းၵုမ်းၸႂ်ဢမ်ႇလႆႈ။ ၵွပ်ႈၼႆ ယူႇတီႈပေႃႈမႄႈ ထုၵ်ႇလႆႈ ၸူဝ်းဢဝ် လုၵ်ႈလၢင်း ၵႂႃႇႁဵတ်းလွင်ႈတူင်ႉၼိုင်တၢင်ႇမဵဝ်း ၵၢၼ်ၼႂ်းႁိူၼ်းၵေႃႈလီ ၵၢၼ်ၼႂ်းဝၢၼ်ႈ ၵေႃႈလီ။  ဢမ်ႇၼၼ် ၸူဝ်းၵၼ်ႁဵတ်းၵၢၼ်ၼႂ်းဝၢင်းၼႂ်းသူၼ် ၊   ၸွႆႈၵၼ် ႁဵတ်းတၢင်း ၵိၼ် ႁိုဝ် လဵၼ်ႈႁႅင်းႁူမ်ႈၵၼ် ၸိူဝ်းၼႆႉ တေၸၢင်ႈႁဵတ်းႁႂ်ႈ လုၵ်ႈဢွၼ်ႇႁၢင်ႇယၢၼ်တင်းမိုဝ်းထိုဝ်သေ တေၸၢင်ႈလႅၵ်ႈလူမ်း လႅၵ်ႈၸႂ်လုၵ်ႈဢွၼ်ႇလႆႈ ။

ၽိူဝ်ႇတေၸွမ်းၸႂ်လုၵ်ႈဢွၼ်ႇၼၼ်ႉ တႃႉသၢင်ႈလွင်ႈၸမ်ၸႂ်ၵၼ်   တႃႇသၢင်ႈလွင်ႈၸမ်ၸႂ်ၵၼ်တင်းလုၵ်ႈဢွၼ်ႇၼၼ်ႉ ၵူၼ်းၼႂ်းၼႃႈႁိူၼ်းလမ်ႇလွင်ႈသုတ်းယဝ်ႉ။ တႃႇယူတ်းယႃၸႂ်လုၵ်ႈဢွၼ်ႇဢၼ်ႁၢႆႉလိူင်းယွၼ်ႉၵဵမ်း ယွၼ်ႉမိုဝ်းထိုဝ်ၼၼ်ႉ – တႄႇတီႈၵူၼ်း ႁိူၼ်း တၵ်းလႆႈလၢတ်ႈတေႃႇၵႂၢမ်းလီ၊ ႁဵတ်းသၢင်ႈတေႃႇလုၵ်ႈဢွၼ်ႇလီလီ၊ ႁႃလွင်ႈတၢင်းသေဢၼ်ဢၼ်သေ ႁဵတ်းၵၢၼ်ႁူမ်ႈၵၼ်၊ ၸူဝ်းလုၵ်ႈၵႂႃႇႁူမ်ႈႁဵတ်းသၢင်ႈၸွမ်းၼႂ်းဝၢၼ်ႈၼႂ်းၶူင်ႇ၊ ၾိုၵ်းႁႂ်ႈလုၵ်ႈမီးတူင်ႇဝူင်းမႂ်ႇ – ၶတ်းၸႂ်သၢင်ႈလွင်ႈတၢင်းသိူဝ်းပၼ်လုၵ်ႈဢွၼ်ႇ  -ၼႆႉ ပဵၼ်လၢႆးႁဵတ်းဢၼ်တိူဝ်ႉယမ် တႃႇသၢင်ႈလွင်ႈယုမ်ႇၸႂ် ၸမ်ၸႂ်  ယူတ်းယႃၸႂ်လုၵ်ႈဢွၼ်ႇ ။

တႃႇလုၵ်ႈဢွၼ်ႇတေပႅတ်ႈ/ဝၢင်းလႆႈမိုဝ်းထိုဝ်ၼႆႉ တၵ်းလႆႈၸႂ်ႉၶၢဝ်းယၢဝ်း   လွင်ႈယူတ်းယႃလုၵ်ႈဢွၼ်ႇၸိူဝ်းဢၼ်လၢတ်ႈမႃးတၢင်းၼိူဝ်ၸိူဝ်းၼၼ်ႉ ထုၵ်ႇလႆႈႁဵတ်းၵႂႃႇဢမ်ႇၵိုတ်းဢမ်ႇလိုဝ်ႈၶၢဝ်းယၢဝ်း – ယွၼ်ႉဝႃႈ လွင်ႈလဵၼ်ႈၵဵမ်းၼႆႉ တတ်းလႆႈယဝ်ႉ ဝႃႈၼႆသေတႃႉ ပေႃးမီးတိုဝ်ႉတၢင်း မၼ်းၸၢင်ႈပွၵ်ႈမႃးတိတ်းၸပ်းၶိုၼ်း။  သင်ဝႃႈ ပေႃႈမႄႈ ၵူၼ်းႁိူၼ်း ၶတ်းၸႂ်ႁဵတ်းသၢင်ႈတူၺ်း ၼင်ႇပၼ်တၢင်းၶႆႈၸႂ်မႃးၸိူဝ်းၼၼ်ႉလႄႈဢမ်ႇထိုင်တီႈလႆႈ ဢမ်ႇတိူဝ်ႉယမ်လႆႈၼႆၸိုင် ၶႅၼ်းတေႃႈ ၶဝ်ႈၵႂႃႇၸူးမေႃယႃ ၽူႈလူင်ႉလႅၼ်ႇၾၢႆႇပၢႆးၸႂ်လုၵ်ႈဢွၼ်ႇသေ ဢဝ်တၢင်းၶႆႈၸႂ် တၢင်းၸွႆႈထႅမ်တီႈၶဝ်ၸဝ်ႈ တႃႇမႃးယူတ်းယႃပၼ်ၵၼ်ၶိုၼ်း – ၼႆႉသၢင်ႇထုၵ်ႇသေပိူၼ်ႈ။

 တႅမ်ႈ- ယိင်းမူၺ်

ၶေႃႈမုလ်းဢၢင်ႈဢိင် – ႁူင်းယႃၽယႃးထႆး