ၽွင်းၶၢဝ်းသွၼ်းၼမ်ႉ မိူင်းထႆး ပီၼႆႉ ရူတ်ႉၵႃးပဵၼ်ၽေး ၵိုင်ႉၵၢင်ႉမီး 1,216 ၵမ်း ၊ ၵူၼ်းတၢႆ 171 ၵေႃႉၼႆ – ၸုမ်းၾၢႆႇၸွႆႈထႅမ်လႄႈ လူတ်းယွမ်းလွင်ႈပဵၼ်ၽေးၵိုင်ႉၵၢင်ႉ ၽွင်းၶၢဝ်းသွၼ်းၼမ်ႉ ပီ 2025 ပိုၼ်ၽၢဝ်ႇဝႆႉ ၼႂ်းဝၼ်းတီႈ 16/04/2025 ၼႆႉၼင်ႇၼႆ။
တႄႇဢဝ် ဝၼ်းတီႈ 11 တေႃႇထိုင် ဝၼ်းတီႈ 15 လိူၼ်ဢေႊပရိူဝ်ႊ ၼႂ်းၶၢဝ်းတၢင်း 5 ဝၼ်းၼႆႉ ၵူၼ်းလူႉ တၢႆယွၼ်ႉပဵၼ်ၽေးၵိုင်ႉၵၢင်ႉမီး 171 ၵေႃႉ ၊ မၢတ်ႇၸဵပ်းမီး 1,208 ၵေႃႉ ပိုၼ်ႉတီႈဢၼ်မီးၵူၼ်းလူႉတၢႆ ၼမ်လိူဝ်ပိူၼ်ႈ ပဵၼ်ၼႂ်းၸႄႈတွၼ်ႈၵုင်းထဵပ်ႈ မီး 15 ၵေႃႉ၊ ၸႄႈတွၼ်ႈဢၼ်ပဵၼ်ၽေးၵိုင်ႉၵၢင်ႉၼမ်လိူဝ် ပိူၼ်ႈ ပဵၼ်ၼႂ်းၸႄႈတွၼ်ႈ ၽတ်ႉထလုင်း မိူင်းထႆးတွၼ်ႈတႂ်ႈ မီး 44 ပွၵ်ႈ ၊ ၸႄႈတွၼ်ႈလမ်းပၢင်းသမ်ႉ ပဵၼ်တီႈ မီးၵူၼ်းမၢတ်ႇၸဵပ်းၼမ်လိူဝ်ပိူၼ်ႈ မီး 47 ၵေႃႉ ဝႃႈၼႆ။
လွင်ႈတၢင်း ဢၼ်ႁဵတ်းႁႂ်ႈပဵၼ်ၽေးၵိုင်ႉၵၢင်ႉ ၼမ်လိူဝ်ပိူၼ်ႈသမ်ႉပဵၼ် ႁေႃႈၶပ်းရူတ်ႉၵႃးဝႆးႁႅင်း 36.92% ၊ ၵိၼ်မဝ်းသေၶပ်းရူတ်ႉၵႃး 31.31% ၊ သၢႆတႃဢမ်ႇလီသေ ၶပ်းရူတ်ႉၵႃးသမ်ႉ 20.9% ။ ၼႂ်းၼၼ်ႉ ရူတ်ႉၶိူင်ႈ ပဵၼ်ၽေးၵိုင်ႉၵၢင်ႉသေ ၽႃႇၵၼ်ၼမ်လိူဝ်ပိူၼ်ႈသုတ်း။
တႄႇဢဝ် ဝၼ်းတီႈ 11 တေႃႇထိုင် ဝၼ်းတီႈ 17 လိူၼ်ဢေႊပရိူဝ်ႊၼႆႉ လႆႈမၵ်းမၼ်ႈပဵၼ်ၶၢဝ်း ဢၼ်မီး ၽေး ၊ ႁႂ်ႈၾၢင်ႉသတိ လွင်ႈပဵၼ်ၽေးၵိုင်ႉၵၢင်ႉၼႆသေ ၾၢႆႇၸဝ်ႈၼႃႈတီႈၶဝ် လႆႈတမ်းဝၢင်းၵဵတ်ႉ/ လၢၼ်ႇ ၵူတ်ႇထတ်းဝႆႉၼိူဝ်သဵၼ်ႈတၢင်းလူင် 1,764 တီႈ ၊ မီးၽူႈႁၢပ်ႇၵၢၼ် 5 မိုၼ်ႇပၢႆ (51,093) ပၼ်ႇပုတ်ႈ ၵၼ် သေ ပၵ်းတႃပႂ်ႉတူၺ်းၵူတ်ႇထတ်းဝႆႉယူႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ