မိူဝ်ႈဝၼ်းတီႈ 19/04/2025 ယၢမ်းၵၢင်ဝၼ်း ၸုမ်းသိုၵ်းၵူၼ်းၼုမ်ႇမၢၼ်ႈ Brave Warriors for Myanmar (BWM) ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ယိုဝ်းမၢၵ်ႇ သျွတ်ႉတၢႆႉတူင်း (ရှော့တိုက်ဒုံး) သႂ်ႇၶူင်ႇႁိူဝ်းမိၼ် ဢေႊလႃႊ တပ်ႉလူမ်းသိုၵ်းမၢၼ်ႈ (အေလာလေတပ်) ဝဵင်းလူင်ၼေႇပျီႇတေႃႇ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ပိူင်းၼႄပႃးဝႆႉဝႃႈ မိူဝ်ႈဝၼ်းတီႈ 18/04/2025 ယၢမ်းၵၢင်ၶမ်ႈ 8 မူင်း 35 မိၼိတ်ႉ ၾၢႆႇၸုမ်း သိုၵ်းၵူၼ်းၼုမ်ႇမၢၼ်ႈ BWM ယိုဝ်းမၢၵ်ႇ သျွတ်ႉတၢႆႉတူင်း (ရှော့တိုက်ဒုံး) သႅၼ်း မမ 107 သၢမ်လုၵ်ႈ ယိုဝ်းၵႂႃႇၼႂ်း ဝၢင်းၶူင်ႇႁိူဝ်းမိၼ်ဢေႊလႃႊ (အေလာလေတပ်) တပ်ႉလူမ်းသိုၵ်းမၢၼ်ႈၼၼ်ႉ တိူဝ်ႉၺႃးမႅၼ်ႈၸွမ်းၼင်ႇ ယိူင်းဢၢၼ်း (ပဝ်ႉမၢႆ) ၼၼ်ႉယူႇ ဝႃႈၼႆ။
ယွၼ်ႉငဝ်းလၢႆးၾိင်ႈၾႃႉဢမ်ႇလီၵေႃႈပႃး ၾၢႆႇၼိုင်ႈၵေႃႈ ၸုမ်းသိုၵ်းမၢၼ်ႈ မိၼ်းဢွင်ႇလၢႆႇ ၸတ်းတမ်းဝႆႉၾၢႆႇ ႁူမ်ႇလူမ်ႈ ဝၢင်းၶူင်ႇႁိူဝ်းမိၼ်ၼႅၼ်ႈၼႃႁႅင်းလႄႈ လႆႈတၼ်းယိုဝ်းၵႂႃႇ မၢၵ်ႇသျွတ်ႉတၢႆႉတူင်း တႃႇ 3 လုၵ်ႈၵွႆး ဝႃႈၼႆ။
ၸုမ်းသိုၵ်းၵူၼ်းၼုမ်ႇမၢၼ်ႈ BWM ယင်းပိုၼ်ၽၢဝ်ႇ ၵၢဝ်ႇလၢတ်ႈၵႂႃႇထႅင်ႈဝႃႈ- ၼႂ်းၶၢဝ်းယၢမ်းၵူၼ်းမိူင်း ႁူပ်ႉၽေးၽႅၼ်ႇ လိၼ်ဝႆ (ဢိင်ႇသၼ်ႇ) ထူပ်းတၢင်းယၢပ်ႇၵိၼ်းယူႇႁင်းၽႂ်မၼ်းၼၼ်ႉ သိုၵ်းမၢၼ်ႈ မိၼ်းဢွင်ႇလၢႆႇ ယင်းဢဝ်ၶိူင်ႈမိၼ် ၵႂႃႇ ၸွမ်းပွႆႇမၢၵ်ႇသႂ်ႇ ၼႂ်းမိူင်းႁူမ်ႈတုမ်ပတ်းပိုၼ်ႉယူႇ။ ဝၢႆးလင်ၽႅၼ်ႇလိၼ်ဝႆၼႆႉ ၵူၼ်းမိူင်းလႆႈမၢတ်ႇၸဵပ်း လူႉတၢႆယွၼ်ႉ ၶိူင်ႈမိၼ်သိုၵ်းမၢၼ်ႈ ၼပ်ႉႁူဝ်ပၢၵ်ႇမၼ်းယဝ်ႉ – ဝႃႈၼႆ။
ယွၼ်ႉၼၼ်လႄႈ ၾၢႆႇၸုမ်းသိုၵ်းၵူၼ်းၼုမ်ႇမၢၼ်ႈ BWM တင်း ၸုမ်းဢူၺ်းလီ ႁူမ်ႈၵၼ်သေ ၽႅၼ်ၵၢၼ် ယိုဝ်းတိုၵ်း ၵႂႃႇသႂ်ႇၼႂ်းဝၢင်းၶိူင်ႈမိၼ်သိုၵ်းမၢၼ်ႈ ႁႂ်ႈလူႉၵွႆ။ ပိူဝ်ႈတႃႇ ပဵၼ်ၶူဝ်းတွၼ်ႈ ၼႂ်းဝၼ်းပီမႂ်ႇ သွၼ်းၼမ်ႉ ဝႃႈၼႆ။
လႆႈႁူႉဝႃႈ ၾၢႆႇသိုၵ်းမၢၼ်ႈၵေႃႈ ဢဝ်ၶိူင်ႈၵွင်ႈလူင် ၵွင်ႈဢွၼ်ႇ လၢမ်းလိမ်းယိုဝ်းသႂ်ႇၶိုၼ်းလႄႈ ႁဵတ်းႁႂ်ႈ ၸုမ်းသိုၵ်းၵူၼ်း ၼုမ်ႇမၢၼ်ႈ လႆႈထွႆဢွၵ်ႇ ၼႂ်းပိုၼ်ႉတီႈ ႁိမ်းၸမ် ဝၢင်းၶိူင်ႈမိၼ်ဢေႊလႃႊၼၼ်ႉမႃး။ ၸုမ်းဢၼ်ပဵၼ်ဢူၺ်းလီၵၼ်တင်း သိုၵ်းၵူၼ်းၼုမ်ႇမၢၼ်ႈ BWM ၼႆႉ ပဵၼ်ၸုမ်းသိုၵ်းၵူၼ်းၼုမ်ႇမၢၼ်ႈ Black Leopard သိူဝ်ၸုမ်ႈလမ် (ကျားသစ်နက်) ဝႃႈၼႆ။
တႅမ်ႈ- ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ