ဝၼ်းတီႈ 17/04/2025 ဝၼ်းၽတ်း တူၵ်းမႅၼ်ႈ ပီမႂ်ႇဝၼ်းၼိုင်ႈ ၶၢဝ်းသွၼ်းၼမ်ႉလႄႈ ၽူႈၼမ်းဝၢၼ်ႈမိူင်း ၸူဝ်ႈၶၢဝ်း ၼႂ်းမိူင်းႁူမ်ႈတုမ် ဢွၼ်ၵၼ် တူၵ်ႇတၵ်ႉ မွၵ်ႇလၢတ်ႈၶေႃႈၵႂၢမ်း ပၼ်ႁႅင်းၸႂ် ၵူၼ်းမိူင်းၵွႆးဢမ်ႇၵႃး ပိုၼ်ၽၢဝ်ႇပႃး ၶေႃႈမုၼ်း ၶၢဝ်ႇသၢၼ် တႃႇၵူၼ်းမိူင်းႁူမ်ႈတုမ်ၵႂႃႇ။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ

သင်ၶႂ်ႈလႆႈ ပိူင်ၵၢၼ်ပႃႇတီႇၸုမ်ႇၵူႈ (ပါတီစုံဒီမိုကရေစီစနစ်) တႄႉၼႆၸိုင် ၵူႈမူႇၵူႈၸုမ်း တေလႆႈႁူမ်ႈၵၼ်ၸွႆႈႁဵတ်းသၢင်ႈ ၶိုင်ပွင် ပၢင်လိူၵ်ႈတင်ႈ ဢၼ်တေၸတ်းႁဵတ်း ၼႂ်းႁၢင်ပီ 2025 ၼႆႉၵႂႃႇ ႁႂ်ႈပေႃးဢွင်ႇမၢၼ်။

ၼင်ႇႁိုဝ် ဝၢၼ်ႈမိူင်းတေမီးလွင်ႈၵတ်းယဵၼ် ၼိမ်တဵင်ႈမႃးၶိုၼ်း ပၼ်ႁႃၵၢၼ်မိူင်းၵေႃႈ တေလႆႈဢဝ်လၢႆးတၢင်း ၵၢၼ်မိူင်း ၵႄႈလိတ်ႈၵႂႃႇၵွႆး။ ၾၢႆႇၸုမ်းႁဝ်းၵေႃႈ ပိုၼ်ၽၢဝ်ႇႁပ်ႉႁွင်းယူႇတႃႇသေႇလႄႈ ၶႂ်ႈတိုၵ်းသူၼ်းႁႂ်ႈ ၵူႈမူႇၵူႈၸုမ်း ၶဝ်ႈမႃးႁူမ်ႈ မိုဝ်းၸွမ်းသေ ၸွႆႈၵၼ်ႁဵတ်းသၢင်ႈပၢင်လိူၵ်ႈတင်ႈၵႂႃႇ။

ယၢမ်းလဵဝ် ဝၢၼ်ႈမိူင်းႁူပ်ႉပၼ်ႁႃ ၽေးၶဵၼ်သၽႃႇဝ ၽႅၼ်ႇလိၼ်ဝႆ ဝႆႉလႄႈ တွၼ်ႈတႃႇတေၵေႃႇသၢင်ႈၶိုၼ်း ႁွင်ႈၵၢၼ် လူင်ပွင်ၸိုင်ႈ ဢၼ်လူႉၵွႆၵႂႃႇၸိူဝ်းၼၼ်ႉၵေႃႈ တေလႆႈသႂ်ႇဢဵၼ်သႂ်ႇႁႅင်းတေႉတေႉ။ မိူၼ်ၼၼ်ၼင်ႇၵဝ်ႇ ႁိူၼ်းယေး လႄႈ သဵၼ်ႈတႃႈသၢႆတၢင်း ၸိူဝ်းၼႆႉၵေႃႈ လူႉၵွႆဝႆႉတင်းၼမ်။ ၼင်ႇႁိုဝ် တေပူၵ်းပွင် မူၼ်ႉမႄးလႆႈၶိုၼ်းၼၼ်ႉၵေႃႈ တေ လႆႈၶတ်းၸႂ်ႁဵတ်းသၢင်ႈၵႂႃႇ ႁႂ်ႈဝႆးလိူဝ်သေပိူၼ်ႈ။

ၾၢႆႇၼိုင်ႈၵေႃႈ တွၼ်ႈတႃႇဝၢၼ်ႈမိူင်းတေၶိုၼ်ႈယႂ်ႇၼၼ်ႉ ပၢႆးပၺ်ႇၺႃႇၵေႃႈ ပဵၼ်ၵၢၼ်လမ်ႇလွင်ႈလူင် ၼႂ်းၶၵ်ႉၵၢၼ် တွၼ်ႈၼိုင်ႈယူႇ။

ယွၼ်ႉဝၢၼ်ႈမိူင်းႁူပ်ႉၺႃး ၽေးၽႅၼ်ႇလိၼ်ဝႆ (ဢိင်ႇသၼ်ႇ) သေ လူဝ်ႇတၢင်းၸွႆႈထႅမ်ႁၢဝ်ႈႁႅင်းလႄႈ မိူဝ်ႈၽွင်း ၵႂႃႇၶိုၼ်ႈ ပၢင်ၵုမ်လူင် လွင်ႈႁူမ်ႈမိုဝ်း ပၢႆးပၺ်ႇၺႃႇ လႄႈ ပၢႆးမၢၵ်ႈမီး ဢၢဝ်ႇၿင်းၵလႃး BIMSTEC တီႈမိူင်းၵွၵ်ႇၼၼ်ႉ လႆႈဢုပ်ႇဢူဝ်း တင်း ၽူႈၼမ်းၼႃႈၸိုင်ႈမိူင်းလၢႆလၢႆမိူင်း တီႈမိူင်းၵွၵ်ႇ ၸိုင်ႈထႆးသေ ၽိတ်ႈမွၵ်ႇႁပ်ႉႁွင်းယွၼ်းတၢင်းၸွႆႈထႅမ် ၼႂ်းမိူင်း ၼွၵ်ႈမိူင်းမႃး။

တွၼ်ႈတႃႇဝၢၼ်ႈမိူင်းတေမီးလွင်ႈၶိုၼ်ႈယႂ်ႇၶိုတ်းၸၼ်ႉ မီးလွင်ႈၼိမ်တဵင်ႈ ၵူၼ်းမိူင်းလႆႈယူႇၵတ်းယဵၼ်ၼၼ်ႉ ယင်း တိုၵ်ႉၶတ်းၸႂ်သၢင်ႈၶၵ်ႉၵၢၼ်ငမ်းယဵၼ်ယူႇ ဝႃႈၼႆ။

ၸွမ်ၸိုင်ႈၸူဝ်ႈၶၢဝ်း လူင်ပွင်ၸိုင်ႈၵူၼ်းမိူင်း NUG  တူႇဝႃႇလသျှီးလႃႉ (ဒူဝါလရှီးလ)

ပီ 2025 ၼႆႉ ပဵၼ်ပီဢၼ်လုၵ်ႉၽိုၼ်ႉသေ လႆႈလွင်ႈဢွင်ႇပေႉမႃးၼမ်လိူဝ်ပိူၼ်ႈသုတ်းသေ ထုၵ်ႇလီပဵၼ်ပီဢၼ် လူပ်း လင် ၵၢၼ်လုၵ်ႉၽိုၼ်ႉ ႁႂ်ႈပေႃးယဝ်ႉတူဝ်ႈလီငၢမ်းၵႂႃႇ။

သိုၵ်းမၢၼ်ႈယိုတ်းဢႃႇၼႃႇ သိမ်းဢဝ်ဝၢၼ်ႈမိူင်းမႃးၵေႃႈ ႁိုင်ၼၢၼ်းမႃး 4 ပီပၢႆ ၵူၼ်းမိူင်း လႄႈ ဝၢၼ်ႈမိူင်းၵေႃႈ လႆႈၸဵပ်း သႅပ်ႇ လူႉသုမ်းမႃး ယွၼ်ႉမၼ်း ၼမ်ႁႅင်းတေႉတေႉလႄႈ ၸုမ်းလုၵ်ႉၽိုၼ်ႉတင်းသဵင်ႈ ထုၵ်ႇလီၼႅတ်ႈႁဵတ်းသၢင်ႈ ႁႂ်ႈပၢင် လုၵ်ႉၽိုၼ်ႉၼႆႉ ထိုင်တီႈယွတ်ႈႁွတ်ႈတီႈပၢႆ ဝႆးဝႆးယူႇ။

ၸွမ်းၼင်ႇ ဢၼ်ၸုမ်းယိပ်းၵွင်ႈၵၢင်ႇၶဝ် ႁူမ်ႈၵၼ်လုၵ်ႉၽိုၼ်ႉ ဢႃႇၼႃႇသိုၵ်းမၢၼ်ႈ တိုၵ်းဢဝ်ဝၢၼ်ႈမိူင်းမႃး ၶၢဝ်းတၢင်း 4 ပီပၢႆၼႆႉ ပေႃးမႃးတူၺ်းႁၢင်ႈၽႅၼ်ႇလိၼ်ၸိုင် သိုၵ်းမၢၼ်ႈ သုမ်းသိုၵ်းမႃးတေႉတေႉဝႃႈဝႃႈသေ လႆႈၸုၼ်ႉပွႆႇပိုၼ်ႉတီႈ ၼႃႈလိၼ် တပ်ႉပၢင်သဝ်းၶဝ်ၼမ်ႁႅင်းလႄႈ ယၢမ်းလဵဝ် ပိုၼ်ႉတီႈၼႃႈလိၼ် ဢၼ်သိုၵ်းမၢၼ်ႈ ၵုမ်းၵမ်လႆႈဝႆႉၼႆႉ 4 ပုၼ်ႈ ယင်းဢမ်ႇမီး 1 ပုၼ်ႈယဝ်ႉ။

ပၢင်တိုၵ်းပွၵ်ႈၼႆႉ ပဵၼ်တႃႇလုၵ်ႉၽိုၼ်ႉ တိုၵ်းတေႃးပႅတ်ႈ ၸုမ်းသိုၵ်းၸဝ်ႈဢႃႇၼႃႇ ဢၼ်ၸုပ်ႇၼိူဝ်ႉၸုပ်ႇလိူတ်ႇ မၢပ်ႇမႂ်ႇသိမ်းဢဝ် ၶူဝ်း ၶွင်ၾိင်ႈတိုၼ်းဝၢၼ်ႈမိူင်း လႄႈ မိပ်ႇငႅၼ်းဢဝ်ငိုၼ်းၵူၼ်းမိူင်းၼၼ်ႉ ႁႂ်ႈပေႃးမူၺ်ႉဝၢႆးႁၢႆၵႂႃႇၼႆ လႄႈ သဵၼ်ႈတၢင်းၼႆႉ မီးလွင်ႈယၢပ်ႇၵိၼ်းၶၢၼ်ၸႂ် တင်းၼမ်ၼႆ တေႁူႉႁၼ်ၵၼ်ယူႇ။

ၵွပ်ႈၼၼ် ၶႃႈႁဝ်း ၸွမ်ၸိုင်ႈၸူဝ်ႈၶၢဝ်း လူင်ပွင်ၸိုင်ႈၵူၼ်းမိူင်း ယိၼ်းၸူမ်းၶွပ်ႈၸႂ်ထိုင် ၵူၼ်းၵတ်ႉငၢၼ် ၸိူဝ်းၶၢမ်ႇ ၸုၼ်ႉသုၼ်ႇတူဝ်သေ ၶဝ်ႈၸွႆႈၼႂ်းၵၢၼ်လုၵ်ႉၽိုၼ်ႉၵူႈၵေႃႉယူႇ။

လူင်ပွင်ၸိုင်ႈၵူၼ်းမိူင်း NUG ၼႆႉ ၵူၼ်းမိူင်းယုမ်ႇယမ်တမ်းၸႂ်သေ မွပ်ႈဢၢပ်ႈပၼ်ဝႆႉ ၼႃႈတီႈပုၼ်ႈၽွၼ်းလူင်ဢၼ် ၼိုင်ႈလႄႈ တေဢမ်ႇၵုမ်ႇမိုင်ႉမဝ်းၸွမ်း လွင်ႈဢွင်ႇမၢၼ် ဢၼ်လႆႈဝႆႉယၢမ်းလဵဝ်ၼႆႉၵွႆး။ တေသိုပ်ႇၶတ်းၸႂ်ႁဵတ်း သၢင်ႈ ၵၢၼ်လုၵ်ႉၽိုၼ်ႉ တိုၵ်းတေႃးၸဝ်ႈဢႃႇၼႃႇၵႂႃႇ ၸွမ်းၼင်ႇၵူၼ်းမိူင်းၶႂ်ႈလႆႈၶႂ်ႈပဵၼ်ၼၼ်ႉယူႇ။ တေဢမ်ႇပၼ်သဵၼ်ႈ တၢင်းပိူင်ႈၵႂႃႇ တေႃႇပေႃးၵၢၼ်လုၵ်ႉၽိုၼ်ႉ ဢွင်ႇမၢၼ်တေႉတေႉၼၼ်ႉ ဝႃႈၼႆ။

တႅမ်ႈ- ၽူၺ်းၼုမ်ႇ