တႃႇတေပူၵ်းပွင် မႄးၶိုၼ်း ႁိူၼ်းဢၼ်လူႉၵွႆ/ ၵိူင်းၵႂႃႇ ယွၼ်ႉၽႅၼ်ႇလိၼ်ဝႆၼၼ်ႉၼႆသေ  ၵူၼ်းမိူင်း ၼႂ်းၼွင်ႁၢႆးယႃႈ လူဝ်ႇတၢင်းၸွႆႈထႅမ် ဢဵၼ်ႁႅင်းၵူၼ်း  ဝႃႈၼႆ ။

ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်းၼႆႉ ႁိူၼ်းယေး ဢၼ်လႆႈလူႉၵွႆၵႂႃႇ တၢင်းမူတ်း မီး 19 ဝၢၼ်ႈ ၊ လင်ႁိူၼ်မီး  2400 လင် ။ တႃႇတေမႄးၶိုၼ်းႁိူၼ်း ၼႆႉ ဢမ်ႇမီးလၢၵ်ႈသမ်းမႃးလႄႈ လူဝ်ႇတၢင်းၸွႆႈထႅမ် ဝႃႈၼႆ ။

ၼၢင်းယိင်းၵူၼ်းပိုၼ်ႉတီႈဝၢၼ်ႈ လွၼ်ပူၵ်ႇ(တွင်ႇပူဝ်ႉၵျီး) လၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈႁဝ်း ႁိူၼ်းဢၼ်လူႉၵွႆၵူၼ်ႇပင်း ဢမ်ႇမီးသေတႃႉ  ဢၼ်ၵိူင်းၵႂႃႇတႄႉမီးၼမ်  ၊ လူဝ်ႇမႄးၶိုၼ်းမီး 24 လင်၊ ယၢမ်းလဵဝ်ၼႆႉ လၢၵ်ႈသမ်းမႃးၵေႃႈ ႁႃဢမ်ႇလႆႈ ၊ ပေႃးပႆႇလႆႈမႄးၶိုၼ်း ၼိူဝ်ႁိူၼ်းၵေႃႈ ဢမ်ႇႁတ်းၼွၼ်းၶႃႈ ၊ ပေႃးၾူၼ်မႃးလူမ်းပတ်ႉ ဢမ်ႇႁူႉဝႃႈ မၼ်းၶၢမ်ႇလႆႈၵႃႈႁိုဝ် တေၵူၼ်ႇပင်းၵႂႃႇမိူဝ်ႈလႂ်ၸိူဝ်းၼႆႉ။  ယွၼ်ႉၼၼ် လႆႈၵႂႃႇၼွၼ်းၸွမ်း သုမ်ႉၼိူဝ်ၵုင်းဝႆႉ”- ဝႃႈၼႆ ။

ဢွၼ်တၢင်း ၵႃးၸၢင်ႈလၢၵ်ႈသမႃး  ၼိုင်ႈဝၼ်းလႆႈပၼ် 20000 ၊ တလဵဝ် ပၼ်ထိုင် 25000 ၸၢင်ႈၵေႃႈ ဢမ်ႇမီးၽႂ်ၶႂ်ႈႁဵတ်း ယွၼ်ႉၵူၼ်းမေႃမိုဝ်း လၢၵ်ႈသမ်းမႃး  ဢမ်ႇမီးၼမ် ဝႃႈၼႆ ။

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈ ဝႃႈ – “ ပေႃးပဵၼ်ႁိူၼ်း ဢၼ်လူႉၵူၼ်ႇ လူႉပင်းသဵင်ႈတႄႉ ၵူၼ်းဝၢၼ်ႈ ဢဝ်လၢႆးဝၼ်းၵၼ်သေ ႁဵတ်းသၢင်ႈပၼ်ၶိုၼ်းယူႇဢေႃႈ   ၊ ပေႃးပဵၼ်ႁိူၼ်းၵိူင်းၵႂႃႇၸိူဝ်းၼႆႉတႄႉ လူဝ်ႇမႄးၶိုၼ်းဢေႃႈ ၊ ပေႃးတေမႄးၶိုၼ်းႁိူၼ်း ဢၼ်ၵိူင်းၵႂႃႇၼႆႉ သမ်ႉလူဝ် လၢၵ်ႈသမ်းမႃး ဢၼ်လူင်ႉလႅၼ်ႇတႄႉတႄႉ ၊  ၼႂ်းၼွင်ၼႆႉ လၢၵ်ႈသမ်းမႃးဢၼ်လူင်ႉလႅၼ်ႇတႄႉတႄႉဢမ်ႇမီး ၊ ဢၼ်မီးဝႆႉၵေႃႈ ၵူၼ်းၵႂႃႇၸၢင်ႈဝႆႉ(ဢဝ်ၶိဝ်းဝႆႉ) ၼမ်ၼႃႇ”- ဝႃႈၼႆ ။

ၵူၼ်းဝၢၼ်ႈၼႂ်းၼွင် ဢၼ်လႆႈၵႂႃႇႁဵတ်းသုမ်ႉသေယူႇဝႆႉတီႈၼိူဝ်ႈၵုင်းသမ်ႉ  ပဵၼ်ၵူၼ်းဝၢၼ်ႈ ၵေႇလႃ (ကေလာ )၊ မျွင်းဝႃႉၵျီး ( (မြောင်းဝကြီး )၊ သျေႉဝႃႉၵျီး ( ရှေ့ဝကြီး )  ၸိူဝ်းၼႆႉ ။ ယၢမ်းလဵဝ်သမ်ႉ ယွၼ်းၾူၼ်တူၵ်းႁႅင်းလႄႈ ယၢပ်ႇၽိုတ်ႇတီႈယူႇတင်းသဝ်းဝႆႉ – ၵူၼ်းပိုၼ်ႉတီႈလၢတ်ႈ ။

“ၽွင်းသၢင်းၵျၢၼ်ႇၼႆႉ ၾူၼ်ၵႆႉတူၵ်း ၊ ပေႃးၾူၼ်တူၵ်းႁႅင်းၼႆႉ ႁိူၼ်းၵေႃႈဝႆ ၼႂ်းၼွင်ၼႆႉ ႁိူၼ်းမၢင်ၸိူဝ်း ဢမ်ႇၵူၼ်ႇ ဢမ်ႇလူႉပင်းသေတႃႉ ၊ ပေႃးၾူၼ်မႃးၸိူင်းၼႆႉ လႆႈမႆႈၸႂ် ၊ ပေႃးဢမ်ႇမႄးၶိုၼ်းတလဵဝ် ပေႃးထိုင် ၶၢဝ်းၾူၼ်မႃးၶႅၼ်း ယၢပ်ႇၸႂ်”- ဝႃႈၼႆ ။

ၽႅၼ်ႇလိၼ်ဝႆ ဝၼ်းတီႈ 28/03/2025 ၼၼ်ႉ သုၼ်ၵၢင်မၼ်းပဵၼ်တီႈတိူင်းၸႄႈၵႅင်း ႁႅင်းထိုင် 7.7 မႅၵ်ႊၼီႊၵျုတ်ႉ ႁဵတ်းႁႂ်ႈ ၵူၼ်းမိူင်း လူႉတၢႆၼပ်ႉႁိူဝ်ႁဵင်ၵေႃႉသေ ဢမ်ႇၵႃး ဝတ်ႉဝႃး ၽႃသိူဝ်လႄႈ ႁိူၼ်းယေး လူႉၵွႆ လူႉသုမ်းတင်းၼမ် ။ ၼႂ်းၼၼ်ႉ ယွၼ်ႉၽႅၼ်လိၼ်ဝႆလႄႈ ၵူၼ်းမိူင်းၼႂ်းၼွင်ႁၢႆးယႃႈ လူႉတၢႆ 135 ၵေႃႉ ၼႂ်းၼၼ်ႉ လုၵ်ႈဢွၼ်ႇလဵၵ်ႉ ဢႃယု 4 ၶူပ်ႇၵေႃႉၼိုင်ႈလႄႈ ၼၢင်းယိင်းဢႃယု 17 ၵေႃႉၼိုင်ႈလႄႈ ပႃးၵူၼ်းၶၢဝ်ႉ ၵူၼ်းဢႃယုယႂ်ႇ ၸိူဝ်းၼႆႉ ဝႃႈၼႆ ။