မိူဝ်ႈၼႆႉ ဝၼ်းတီႈ 17/04/2025 ဝၼ်းပီမႂ်ႇသွၼ်းၼမ်ႉ  သိုၵ်းမၢၼ်ႈပိုၼ်ၽၢဝ်ႇ ပွႆႇၵူၼ်းတူၵ်းၶွၵ်ႈ   4893 ၵေႃႉ  လူၺ်ႈတၢင်းၶေႃႈၼွင်ႇငိူၼ်ႈၶႆ ၾိင်ႈမိူင်းၽိတ်းပၵ်းပိူင် တွၼ်ႈ 401 တွၼ်ႈၽႄ 1   “သင်ဝႃႈ ပူၼ်ႉပႅၼ် တၢင်းၽိတ်း ထႅင်ႈၸိုင် တေလႆႈၺႃးတူတ်ႈတၢမ်ႇ ၵဝ်ႇၵွႆးဢမ်ႇၵႃး တၢမ်ႇမႂ်ႇၵေႃႈ တေလႆႈသိုပ်ႇႁပ်ႉဢဝ်ထႅင်ႈ” ဝႃႈၼႆ။

ၵူၼ်းတူၵ်းၶွၵ်ႈ ၸိူဝ်းဢၼ်သိုၵ်းမၢၼ်ႈပွႆႇဢွၵ်ႇမႃး ဝၼ်းမိူဝ်ႈၼႆႉ 17/04/2025 ၼႆႉ ပႃးၵူၼ်းၼွၵ်ႈမိူင်း  13 ၵေႃႉ။ ၸိူဝ်းၶဝ်ထုၵ်ႇပၼ်တူတ်ႈတၢမ်ႇ လိုပ်ႈဢွၵ်ႇမိူင်း ။ ၼႂ်းလိၵ်ႈပိုၼ်ၽၢဝ်ႇသိုၵ်းမၢၼ်ႈၼၼ်ႉ ဢမ်ႇပိူင်းၼႄပႃးဝႆႉဝႃႈ ၶွၵ်ႈလႂ် ဝဵင်းလႂ် ပွႆႇပၼ်ၵူၼ်းလၢႆၵေႃႉၼႆၸိူဝ်းၼႆႉ  ။

လႆႈႁူႉဝႃႈ ၵူၼ်းတူၵ်းၶွၵ်ႈ ၸိူဝ်းထုၵ်ႇပွႆႇ ဢွၵ်ႇမႃးၼႆႉ သိုၵ်းမၢၼ်ႈယွမ်းပၼ် တူတ်ႈတၢမ် 6 ပုၼ်ႈ 1 ပုၼ်ႈယဝ်ႉသေ ၼႂ်းၼၼ်ႉပႃးၵူၼ်းႁဵတ်းၵၢၼ်မိူင်း ဢိတ်းဢွၼ်ႇၵူၺ်း ။   ၼွၵ်ႈလိူဝ်ၼၼ်ႉ ပဵၼ်ၵူၼ်းၸိူဝ်းႁဵတ်းၽိတ်းၾိင်ႈမိူင်း (ရာဇဝတ်မှု) ၵမ်ႈၼမ်ၵွႆး  ။  

ၵူၼ်းၸိူဝ်းဢၼ်သိုၵ်းမၢၼ်ႈ လူတ်းပၼ်တူတ်ႈတၢမ်သေ  ပွႆႇဢွၵ်ႇၶွၵ်ႈမႃးပွၵ်ႈၼႆႉ ဢမ်ႇပႃးၵူၼ်းၸိူဝ်းႁဵတ်းၽိတ်း လွင်ႈ ၵၼ်ႉ ၸၼ်လူလၢႆ၊ ၵႃႉၶိူင်ႈၵွင်ႈၵၢင်ႇ၊ ၵိၼ်ၸိၵ်းတွၵ်ႇၸွၵ်း၊ ၶႃႈႁႅမ်ၵူၼ်း  လႄႈ ယႃႈမဝ်းၵမ်  ၸိူဝ်းၼႆႉ ။

ၼင်ႇႁိုဝ် တေႁူႉသဵၼ်ႈမၢႆ ႁူဝ်ယွႆႈ ၵူၼ်းတူၵ်းၶွၵ်ႈ ၸိူဝ်းဢၼ်သိုၵ်းမၢၼ်ႈပွႆႇဢွၵ်ႇမႃးၼၼ်ႉၵေႃႈ ၾၢႆႇၵေႃႁူမ်ႈသၢင်ႈ ၸုမ်းတူင်ႉၼိုင်သုၼ်ႇလႆႈသုၼ်ႇပဵၼ်ၵူၼ်းတူၵ်းၶွၵ်ႈ/ၶွၵ်ႈ ယွၼ်ႉၵၢၼ်မိူင်း မိူင်းႁူမ်ႈတုမ် PPNM ယင်းတိုၵ်ႉတႄႇ လူင်းၵဵပ်းသဵၼ်ႈမၢႆမၼ်းဝႆႉယူႇ  – ပိုၼ်ၽၢဝ်ႇဝႆႉၼင်ႇၼႆ။

လိူဝ်ၼၼ်ႉ ၸွမ်ၸိုင်ႈမိူင်းႁူမ်ႈတုမ် ဢူးဝိၼ်းမိၼ်ႉ ၊ ၽူႈၵိူဝ်းၵုမ် ၸိုင်ႈမိူင်း တေႃႇဢွင်ႇသၢၼ်းသူႉၵျီႇ တင်း ၽူႈၶဝ်ႈၸုမ်း ပႃႇတီႇၼူၵ်ႉယုင်း NLD ဢၼ် သိုၵ်းမၢၼ်ႈ မိၼ်းဢွင်ႇလၢႆႇ မၢပ်ႇၼႄးဝႃႈ လွၵ်ႇလႅၼ်ဢဝ်ၶႅပ်းၵၢင်ၸႂ် ဢမ်ႇႁဵတ်းသိုဝ်ႈ တေႃႇဝၢၼ်ႈမိူင်းၼႆသေ တီႉၺွပ်းဝႆႉၸိူဝ်းၼၼ်ႉတႄႉ  ယင်းပႆႇပူၼ်ႉဢွၵ်ႇမႃးပႃး။

ၸုမ်းၸွႆႈထႅမ် ၵူၼ်းတူၵ်းၶွၵ်ႈၵၢၼ်မိူင်း AAPP ႁၢႆးငၢၼ်းပိုၼ်ၽၢဝ်ႇဢွၵ်ႇဝႆႉဝႃႈ တႄႇသိုၵ်းမၢၼ်ႈပိုၼ်ၽၢဝ်ႇယိုတ်းဢႃႇ ၼႃႇ  ဝၢၼ်ႈမိူင်းမႃး ၶၢဝ်းတၢင်း 4 ပီပၢႆ ၵူၼ်းၸိူဝ်းထုၵ်ႇသိုၵ်းမၢၼ်ႈတီႉ ၺွပ်းၵႂႃႇ မီး 29030 ၵေႃႉ။ ၼႂ်းၼၼ်ႉ တႃႇၵူၼ်း 22197 ၵေႃႉ ယင်းတိုၵ်ႉထုၵ်ႇသိုၵ်းမၢၼ်ႈၵုမ်းၵမ်ဝႆႉသေ တႃႇ 10769 ၵေႃႉသမ်ႉ ၺႃးတူတ်ႈတၢမ်ႇတူၵ်းၶွၵ်ႈဝႆႉ ဝႃႈၼႆ။

တႅမ်ႈ- ၽူၺ်းၼုမ်ႇ