ဝၼ်းတီႈ 15/4/2025 ယၢမ်းႁူဝ်ၶမ်ႈ  ၾူၼ်လူင်လူမ်းလူင်တူၵ်းတီႈဝဵင်းတႃႈလိူဝ်ႇ (မၼ်းတလေး) လႄႈ  ဝဵင်းဢမရပူႇရ ၼႂ်းတိူင်းတႃႈလိူဝ်ႇ ႁဵတ်းႁႂ်ႈ ဢွင်ႈတီႈသုမ်ႉသွင်း ၵူၼ်းထူပ်းၽေးၽႅၼ်ႇလိၼ်ဝႆၸိူဝ်းၼၼ်ႉ လူမ်ႉပိဝ် ၼမ်ႉၼွင်းထူမ်ႈ ထႅင်ႈ။

ၼၢင်းယိင်းလုၵ်ႈၸုမ်းၾၢႆႇၸွႆႈထႅမ်ၵူၼ်းထူပ်းၽေးၽႅၼ်ႇလိၼ်ဝႆ လၢတ်ႈၽူႈတွႆႇႁွၵ်ႈဝႃႈ -“ လွင်ႈတၢင်းမႆႈၼႆႉ ဢၼ်ၼိုင်ႈယဝ်ႉ ဢၼ်ၼိုင်ႈ ၊ ပူၼ်ႉမႃးသွင်ဝၼ်းၼႆႉၵူၺ်း ဢွင်ႈတီႈပၢင်သဝ်းသုမ်ႉသွင်းၸိူဝ်းၼၼ်ႉ ဢမ်ႇမီးၽႃႈသိူဝ်ႇ ၽႃႈႁူမ်ႇၶူဝ်းၼွၼ်းၼႆလႄႈ ႁဝ်းၶႃႈၸင်ႇႁႃၵႂႃႇလူႇဝႆႉၵူၺ်း ၊ ၵမ်းၼႆႉ ယွၼ်ႉၾူၼ်တူၵ်းႁႃႇယႂ်ႇလႄႈ  တေႁဵတ်းႁိုဝ် ၸၢင်ႈလပ်းၸၢင်ႈၼွၼ်းလႆႈယဝ်ႉၶႃႈလႃႇ ၊ သုမ်ႉဢၼ်ႁဵတ်းဝႆႉၼၼ်ႉၵေႃႈ မၼ်းပဵၼ်တႃႇယူႇၸူဝ်ႈၶၢဝ်းၵူၺ်းၶႃႈလူး ဢမ်ႇႁႄႉၾူၼ်လႆႈလီလီ ၶႃႈလေႃႇ၊ ပေႃးၾူၼ်ႁႃႇယႂ်ႇ လူမ်းပတ်ႉႁႅင်းၸိူင်ႉၼႆ  ယိင်ႈၶႅၼ်းပႃးၵႂႃႇၸွမ်းလူမ်းၸွမ်းၾူၼ်ယဝ်ႉဢေႃႈ”– ဝႃႈၼႆ ။

 ယွၼ်ႉၾူၼ်လူမ်းႁႅင်း လႄႈ ၼမ်ႉၶဝ်ႈၼႂ်း သုမ်ႉတီႈယူႇတီႈၵိၼ် ၵူၼ်းထူၵ်းၽေးၽႅၼ်ႇလိၼ်ဝႆ ၸိူဝ်းယူႇသဝ်းဝႆႉၸွမ်းၵၢင်ပၢင်ႇလႄႈၸွမ်းတႃႈၸွမ်းတၢင်း ၊ ၵွပ်ႈၼႆ လူဝ်ႇတၢင်းၸွႆႈထႅမ် ၽႃႈၵင်ႈ ၽႃႈယၢင်မုင်း ၊ သုတ်းမူင်း ၸိူဝ်းၼႆႉ တင်းၼမ် ဝႃႈၼႆ။   

“ ဢၼ်လူဝ်ႇသေပိူၼ်ႈသုတ်းၼႆႉ ပဵၼ်ၽႃႈၵၢင်ႈ လႄႈသုတ်းမုင်း ဢေႃႈ ၊ၵူၼ်းဢၼ်လႆႈငိူင်ႉပၢႆႈဝႆႉ ၸိူဝ်းၼႆႉ ပဵၼ်ၵူၼ်းႁႃၸဝ်ႉၵိၼ်ၶမ်ႈ ပဵၼ်ၵူၼ်းႁဵတ်းၵၢၼ် ၼႂ်းႁူင်းၸၢၵ်ႈၸိူဝ်းၼၼ်ႉ ၊ တလဵဝ် ႁူင်းၸၢၵ်ႈၸိူဝ်းၼၼ်ႉၵေႃႈသမ်ႉၵိုတ်းဝႆႉယဝ်ႉလႄႈ ၸိူဝ်းၶဝ်ဢမ်ႇမီးငိုၼ်းၶဝ်ႈ ၊ တႃႇတေသိုဝ်ႉ ၽႃႈၵၢင်ယုင်းၵေႃႈဢမ်ႇမီးငိုၼ်း  ၊ ဝဵင်းလိူဝ်ႇ လႄႈ ဢမရပူႇရၼႆႉသမ်ႉယုင်းလိူင်ႇၼႃႈ။ ၽႃႈၵၢင်ယုင်းသမ်ႉၵႃႈယႂ်ႇၼႃႇ ”- ဝႃႈၼႆ ။

တီႈဝဵင်း ဝဵင်းဢမရပူရ  ၼႆႉမုင်ႉႁေႃႁိူၼ်း   ၵူၼ်းထူပ်းၽေးၽႅၼ်လိၼ်ဝႆ သၢမ်ဝၢၼ်ႈမႃးယူႇႁူမ်ႈၵၼ်ဝႆႉ  မီး 150 မုင်ႈႁေႃႁိူၼ်း၊  ပၢႆလိူဝ်ယုင်းလိူင်ႇ၊ သမ်ႉ ဢမ်ႇမီးၽႃႈသိူဝ်ႇ ၶူဝ်းၼွၼ်း။ ဢၼ် လူဝ်တၢင်းၸွႆႈထႅမ်ႁၢဝ်ႈႁႅင်းၼႆႉပဵၼ် ၾႆးသူဝ်ႊလႃႊ ၊ ၽႃႈယၢင်ႁႄႉၾူၼ်  ၊ ၽႃႈၵၢင်ယုင်း(သုတ်းမုင်း) လႄႈ ယႃႈယႃ ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ။

“ယွၼ်ႉလႆႈၼွၼ်းၼိူဝ် ၼင်လိၼ်လႄႈ ၵူၼ်းဢႃယုယႂ်ႇ ပဵၼ် ၵူၼ်ႉၵူၼ်ႉၶိုၼ်ႈၶိုၼ်ႈ ၊ ၸိူဝ်းမီးတၢင်းပဵၼ်ၶၢဝ်းယၢဝ်း မိူၼ်ၼင်ႇ လိူတ်ႈၶိုၼ်ႈ ၊ ယဵဝ်ႈဝၢၼ်ၸိူဝ်းၼႆႉၵေႃႈ လူဝ်ႇတၢင်းၸွႆႈထႅမ် ယႃႈယႃ ၊  တလဵဝ်ၼႆႉ ႁႃသိုဝ်ႉယႃႈယႃၵေႃႈယၢပ်ႇၼႃႇ”- ဝႃႈၼႆ ။ 

ၼႂ်းၶၢဝ်းတၢင်း သွင်ဝၼ်း ၽႃႈၵၢင်ယုင်းတီႈဝဵင်း ဢမရပူႇရ ၶိုၼ်ႈ 2 ႁဵင်ပျႃး ၊ ၽႃႈၵၢင်ႇယုင်း ဢွၼ်တၢင်း ဢၼ်လႆႈသိုဝ်ႉ17000 ပျႃးၼၼ်ႉ ယၢမ်းလဵဝ် ၶၢႆ 19000 ပျႃး ၊ ပေႃးပဵၼ် ၽႃႈၵၢင်ယုင်း (ကိုင်းခြင်ထောင်) ယူင်ႉလဵၵ်းၼၼ်ႉ ၶိုၼ်ႈထိုင်  60000 ပျႃး – ၵူၼ်းၵႂႃႇ ၸွႆႈထႅမ်လၢတ်ႈ ။

 ဝၢႆးၽႅၼ်လိၼ်ဝႆယဝ်ႉ  မိူဝ်ႈဝၼ်းတီႈ 5/4/2025 ၼၼ်ႉၵေႃႈ ယွၼ်ႉၾူၼ်လူမ်းႁႅင်းလႄႈ သုမ်ႉၵူၼ်းမိူင်း ၸွမ်းတႃႈၸွမ်းတၢင်း တီႈဝဵင်းလိူဝ်ႇ  ပိဝ်ၸွမ်းလူမ်းၼင်ႇၵဝ်ႇ၊  ၼၼ်ႉၵေႃႈ ဢွၼ်ၵၼ်ယၢပ်ႇၽိုတ်ႇလူဝ်ႇတၢင်းၸွႆႈထႅမ်တင်းၼမ် ။

မိူဝ်ႈၶမ်ႈဝၼ်းတီႈ 14/4/2025 ၾူၼ်လူမ်းတူၵ်းႁႃႇယႂ်ႇလႄႈႁိူၼ်းတိူၵ်ႈၸၼ်ႉသုင်တီႈဝဵင်းလိူဝ်ႇလင်ၼိုင်ႈ ၵူၼ်ႇပင်းလူႉၵွႆ။ ႁိူၼ်းတိူၵ်ႈလင်ၼၼ်ႉ မီးႁွႆးၸတ်ႉတႅၵ်ႇဝႆႉၸဵမ်မိူဝ်ႈၽႅၼ်ႇလိၼ်ဝႆၼၼ်ႉသေ ဢမ်ႇမီးၵူၼ်းယူႇသဝ်းယဝ်ႉၼင်ႇၵဝ်ႇ။

မိူဝ်ႈႁၢင်လိူၼ်မၢတ်ႊၶျ် ဝၼ်းတီႈ 28 ယၢမ်းၵၢင်ဝၼ်းမွၵ်ႈ 1 မူင်းၼၼ်ႉ လုၵ်ႉတၢင်းသုၼ်ၵၢင်မိူင်းမၢၼ်ႈ တိူင်းၸႄႈၵႅင်းသေ ၽႅၼ်ႇလိၼ်ဝႆ (ဢိင်ႇသၼ်ႇ) ႁႅင်း 7.7 မႅၵ်ႊၼီႊၵျုတ်ႉသေ ၽႅၼ်လိၼ်ဝႆ ႁဵတ်းႁႂ်ႈ ႁိူၼ်းယေးတိူၵ်ႈသုင်၊ ၶူဝ်တင်း တႃႈႁိူဝ်း ဢိၵ်ႇၵွင်းမူး ဝတ်းဝႃးၽႃသိူဝ်ႇ ၸိူဝ်းၼႆႉ ၵူၼ်ႇပင်းလူႉၵွႆ တဵင်ၵူၼ်းတၢႆမၢတ်ႇၸဵပ်း ၼပ်ႉႁူဝ်ႁဵင်ၵေႃႉမၼ်း ။