သိုၵ်းမၢၼ်ႈပိုၼ်ၽၢဝ်ႇၵိုတ်းတိုၵ်းဝႆႉ 10 ဝၼ်းဝႃႈၼႆသေတႃႉ သိုပ်ႇဢဝ်ၶိူင်ႈမိၼ်ပိုတ်းယိုဝ်းၼႂ်းဢိူင်ႇ ၼႂ်းဝၢၼ်ႈယူႇၵူႈဝၼ်း။
တင်ႈတႄႇပိုၼ်ၽၢဝ်ႇၵိုတ်းတိုၵ်း ဝၼ်းတီႈ 2/4/2025 မႃးတေႃႇထိုင်ဝၼ်းတီႈ 15/4/2025 ၶၢဝ်းတၢင်း 13 ဝၼ်းၼႆႉ သိုၵ်းမၢၼ်ႈဢဝ်ၶိူင်ႈမိၼ် ပိုတ်းယိုဝ်း 68 ၵမ်းယဝ်ႉ ၼႆ လူမ်းႁွင်ႈၵၢၼ်ၽွင်းလူင်မိူင်းႁူမ်ႈတုမ် NUG ပိုၼ်ၽၢဝ်ႇၼင်ႇၼႆ။
ၽွင်းၵူၼ်းမိူင်းထူပ်းၽေးၽႅၼ်ႇလိၼ်ဝႆ ယူႇၼႆႉ သိုၵ်းမၢၼ်ႈဢဝ်ၶိူင်ႈမိၼ်ၵျႅတ်ႉ၊ ဢဝ်ၸွင်ႈမိၼ် (Paramotor) ၊ ဢဝ်ၶိူင်ႈမိၼ်ၻရူၼ်ႊသေ ပိုတ်းယိုဝ်း ၼႂ်းၸႄႈမိူင်းလႄႈတိူင်း 12 ဢၼ် 68 ၵမ်း။ ၵူၼ်းမိူင်းတၢႆ 64 ၵေႃႉ မၢတ်ႇၸဵပ်း 83 ၵေႃႉ ဝႃႈၼႆ။
ၼႂ်းဢၼ်မၢတ်ႇၸဵပ်းလူႉတၢႆၼႆႉ ပႃးလုၵ်ႈဢွၼ်ႇ၊ ၼၢင်းယိင်း၊ ၵူၼ်းထဝ်ႈ၊ ရႁၢၼ်းသင်ႇၶႃႇ ၸိူဝ်းၼႆႉ ဝႃႈၼႆ။
ၼႂ်းဝၼ်းသၢင်းၵျၢၼ်ႇ ဝၼ်းၼဝ်ႈၼႆႉၵူၺ်းသိုၵ်းမၢၼ်ႈ ဢဝ်ၶိူင်ႈမိၼ်ယိုဝ်းသႂ်ႇတီႈဝၢၼ်ႈၼႂ်းဝဵင်းၵေႃႇၵရဵတ်ႇ ၸႄႈမိူင်းယၢင်းၽိူၵ်ႇ ၵူၼ်းမိူင်းမၢတ်ႇၸဵပ်းလူႉတၢႆ။
သိုၵ်းမၢၼ်ႈသၢႆသိုၵ်း ဢွင်ႇၸေႇယ ထူဝ်းသိုၵ်းၶိုၼ်ႈမႃးတႃႇယိုတ်းလႆႈၶိုၼ်းသဵၼ်ႈတၢင်း ဢေႊသျႃႊ (သဵၼ်ႈတၢင်းၵၢၼ်ၵႃႉၶၢႆ) ။ လႄႈပိုတ်းယိုဝ်းၵၼ်တင်းၸုမ်းလုၵ်ႉၽိုၼ်ႉ။ သိုၵ်းမၢၼ်ႈဢဝ်ၶိူင်ႈမိၼ်ယိုဝ်းသႂ်ႇတီႈဝၢၼ်ႈ ၵေႃႉဝႃႇလႄး၊ ယေႇပူႇ၊ ၵႃးတႅင်ႇ၊ လႅင်ႇၵွႆႇ ၊ ၵျူင်ႇၻူဝ်း ၸိူဝ်းၼႆႉ ။ၵူၼ်းပိုၼ်ႉတီႈလႆႈဢွၼ်ၵၼ်ပၢႆႈၽေးသိုၵ်းဝႆႉ။
သိုၵ်းမၢၼ်ႈသမ်ႉႁၢမ်ႈၵူၼ်းဝၢၼ်ႈၶၢမ်ႈၶူဝ်ၵျၢႆးမျိတ်ႉ ထႅင်ႈလႄႈ ၵူၼ်းမိူင်းၶမ်ႈယူႇၼႂ်းဝဵင်းၵေႃႇၵရဵတ်ႇ ဢမ်ႇၸၢင်ႈပၢႆႈ။
ဢၢင်ႈဢိင်- DVB
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ