လုၵ်ႈႁဵၼ်း ၼႂ်းတိူင်းတႃႈလိူဝ်ႇ၊ ၸႄႈၵႅင်း၊ ၼေႇပျီႇတေႃႇလႄႈမိူင်းၶၢင် ၸိူဝ်းတွပ်ႇလိၵ်ႈဝႆႉၸၼ်ႉ 12 (G- 12) တႃႇၶဝ်ႈၸၼ်ႉၸွမ်ဝႆႉ တႃႇ 60000 ၵေႃႉၼၼ်ႉ ဢိင်ၼိူဝ်ၽေးၽႅၼ်ႇလိၼ်ဝႆသေ ဝႂ်ၶေႃႈတွပ်ႇလူႉႁၢႆၵႂႃႇလႄႈ တေၶိုၼ်းလႆႈတွပ်ႇလိၵ်ႈ ထႅင်ႈၵမ်းၼိုင်ႈ ၼႂ်းဝၼ်းတီႈ 5 လိူၼ်မေႊတေမႃးၼႆႉဝႃႈၼႆ။

ၵူၼ်းၸမ်ၸႂ်ၾၢႆႇပၢႆးပၺ်ၺႃတိူင်းတႃႈလိူဝ်ႇလၢတ်ႈတီႈၶၢဝ်ႇ DVB ဝႃႈ “ယွၼ်ႉၽႅၼ်ႇလိၼ်ဝႆသေ ၾႆးမႆႈၵႂႃႇတီႈတိူင်းတႃႈလိူဝ်ႇၼၼ်ႉ ဝႂ်ၶေႃႈတွပ်ႇလိၵ်ႈလုၵ်ႈႁဵၼ်းၵေႃႈပႃးၵႂႃႇၸွမ်း။ၵွပ်ႈၼႆ ႁွင်ႈၵၢၼ်ၾၢႆႇပၢႆးပၺ်ၺႃတိူင်းတႃႈလိူဝ်ႇ ၸင်ႇလႆႈသူင်ႇလိၵ်ႈၸူး ႁွင်ႈၵၢၼ်ၾၢႆႇပၢႆးပၺ်ၺႃၸႄႈဝဵင်း ၼႂ်းတိူင်းတႃႈလိူဝ်ႇဝႆႉမိူဝ်ႈဝၼ်းတီႈ 11 ဢေႊပရိူဝ်ႊလ် ဝႃႈ တေႁႂ်ႈလုၵ်ႈႁဵၼ်းၸၼ်ႉ 12 ၶဝ်တွပ်ႇလိၵ်ႈထႅင်ႈၵမ်းၼိုင်ႈ” ဝႃႈၼႆ။

 ၼႂ်းလိၵ်ႈဢၼ်သူင်ႇၸူး လုမ်းပၢႆးပၺ်ၺႃၸႄႈဝဵင်းၼၼ်ႉတႄႉပႃးဝႆႉဝႃႈ – ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇႁွတ်ႈထိုင်းမၼ်းတလေးမိူဝ်ႈဝၼ်းတီႈ 29 ၼၼ်ႉသေ သင်ႇလၢတ်ႈၵႂႃႇႁႂ်ႈတွပ်ႇလိၵ်ႈၶိုၼ်း ဝႃႈၼႆ။

 ၵူၺ်းၵႃႈ တေႃႇထိုင်ဝၼ်းမိူဝ်ႈၼႆႉ ယူႇတီႈႁွင်ႈၵၢၼ်ပၢႆးပၺ်ၺႃ သေ ပႆႇၵပ်းသိုပ်ႇၸူးလုၵ်ႈႁဵၼ်း -ၼႆ ပေႃႈမႄႈလုၵ်ႈႁဵၼ်းၵေႃႉၼိုင်ႈၼႂ်းဝဵင်းတႃႈလိူဝ်ႇ ၵေႃႈလၢတ်ႈဝႆႉၼင်ႇၼႆ။

 လွင်ႈၼႆႉၾၢႆႇၶွင်ႇသီႇသိုၵ်းမၢၼ်ႈတႄႉ ပိုၼ်ၽၢဝ်ႇဝႆႉဝႃႈ ယွၼ်ႉပိူဝ်ႈၽႅၼ်ႇလိၼ်ဝႆသေ ၾႆးမႆႈပႃးႁွင်ႈလုမ်းတီႈၸၼ်ႉၸွမ်ဝဵင်းလိူဝ်ႇ။ ပႃးၵႂႃႇၽိုၼ်လိၵ်ႈၶေႃႈတွပ်ႇလုၵ်ႈႁဵၼ်း ဝဵင်းလိူဝ်ႇ ၊ၸႄႈၵႅင်း၊ ၼေႇပျီႇတေႃႇ၊ မိူင်းၶၢင် တႃႇ 62000 ၵေႃႉ။ ၽိုၼ်လိၵ်ႈၶေႃႈတွပ်ႇတင်းမူတ်း 4 သႅၼ်ၽိုၼ် ပႃးၵႂႃႇၸွမ်းၾႆးမူတ်း ဝႃႈၼႆ။

ဢၢင်ႈဢိင်- DVB