ဝၼ်းတီႈ 9/4/2025  ၼႆႉ လူင်ပွင်ၸိုင်ႈထႆး ပိုၼ်ၽၢဝ်ႇဝႃႈ ၼမ်ႉသၢႆလႄႈၼမ်ႉႁူၵ်းဢၼ်လႆၶႅၼ်ႈ တႃႈၶီႈလဵၵ်း – မႄႈသၢႆ လႅၼ်လိၼ်တႆး- ထႆးၼၼ်ႉ မီးသၢၼ်ၶမ်ႊမီႊၶိူဝ်ႊၼမ်ပူၼ်ႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ – “ၾၢႆႇႁဵတ်းဢွၵ်ႇၼမ်ႉၸႂ်ႉတိုဝ်းၼႂ်းၸႄႈဝဵင်းမႄႈသၢႆ ထတ်းထွင်တူၺ်းၼမ်ႉသၢႆသေ လႆႈႁၼ်မီးဝႆႉ သၢၼ်ၼူ(ဢၼ်ၸႂ်ႉတိုဝ်းၼႂ်းဢွင်ႈတီႈၶုတ်းႁႄႈၶုတ်းၶမ်း) ။ ၼႂ်းၼမ်ႉသၢႆၼၼ်ႉ ၼိုင်ႈလိတ်ႉလႂ် ပႃးဝႆႉသၢၼ်ၼူ 0.0014 မၢႆႊၶရူဝ်ႊၵရမ်ႊ ၼႆလႄႈ သင်ၵိၼ်မႅၼ်ႈၸၢင်ႈပဵၼ်ၽေးတေႃႇပၢႆးယူႇလီ” – ဝႃႈၼႆဝႆႉ။

ၵူၼ်းၼုမ်ႇတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ  – “ၼမ်ႉၼႆႉ မၼ်းတိုၼ်းဢမ်ႇလီၸဵမ်မိူဝ်ႈ ပိူၼ်ႈမႃး ၶုတ်းၶမ်းၾၢႆႇၼိူဝ်မၼ်းၼၼ်ႉယဝ်ႉ။ၼမ်ႉၵေႃႈၶုၼ်ႇယူႇသေႇသေႇ။ဝၢႆးၼမ်ႉလူၵ်ႈသေၵေႃႈ ၶႅၼ်းၼႃႇယဝ်ႉ။မိူဝ်ႈလဵဝ်သမ်ႉ မၼ်းပဵၼ်ၶၢဝ်းလဵၼ်ႈၼမ်ႉလႄႈ ၶဝ်ၸင်ႇပိုၼ်ၽၢဝ်ႇၵႂႃႈ ။ပိူင်လူင်မၼ်း ယႃႇဢဝ်ၼမ်ႉဢၼ်ၼၼ်ႉသေ ႁူတ်းၵၼ်ၼၼ်ႉၼႃႇၼေႃႈ ” – ဝႃႈၼႆ။

ၼမ်ႉသၢႆၼႆႉ လမ်ႇလွင်ႈတႃႇ ၸဝ်ႈသူၼ်ၸဝ်ႈၼႃး တႃႇႁူတ်းတူၼ်ႈၽၵ်းတူၼ်ႈမွၵ်ႇမၢၵ်ႇ ၵူႈသႅၼ်း သႅၼ်း။ မိူဝ်ႈလဵဝ်တႄႉ ယွၼ်ႉၼႂ်းၼမ်ႉမီးသၢၼ်မီးၵွင်ႉငူၼ်ႉလႄႈ ႁူတ်းၵေႃႈ တေဢမ်ႇမီးၽွၼ်းလီသင်သေဢမ်ႇၵႃး ၸၢင်ႈလူႉသုမ်းလူးၵွၼ်ႇၼႆ ၵူၼ်းတႃႈၶီႈလဵၵ်းလၢတ်ႈ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ- ၼမ်ႉသၢႆၼႆႉ ပေႃးတေဢဝ်မႃးၸႂ်ႉတႃႇလၢင်ႉဝၢၼ်ႇ လွႆးၶူဝ်းၸိူဝ်းၼႆႉတႄႉ တိုၵ်ႉလႆႈယူႇသေတႃႉ သင်ဢဝ်မႃးတူမ်ႈႁုင် ၸႂ်ႉတႃႇၵိၼ်ၼႂ်းၼႃႈႁိူၼ်းတႄႉ တေမီးၽေး။လိူဝ်ၼၼ်ႉ ဢဝ်ႁူတ်းၼမ်ႉတူၼ်ႈၽၵ်းၸိူဝ်းၼႆႉၵေႃႈ ဢမ်ႇလွတ်ႈၽေး – ဝႃႈၼႆ။