တီႈၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်းၼၼ်ႉ ပႃႇတီႇၵၢၼ်မိူင်း ဢၼ်သိုၵ်းမၢၼ်ႈ ၵမ်ႉယၼ်ပၼ်ႁႅင်းဝႆႉၼၼ်ႉ လူင်းၸွႆႈထႅမ်ၵူၼ်းမိူင်း ထူပ်းၽေးၽႅၼ်ႇလိၼ်ဝႆသေ ႁူၺ်းသူၼ်းၵူၼ်းမိူင်း တႃႇပၢင်လိူၵ်ႈတင်ႈပႃး။

တီႈၼႂ်းၼွင်ႁၢႆးယႃႈၼႆႉ ယွၼ်ႉၽႅၼ်ႇလိၼ်ဝႆသေ ႁိူၼ်းယေးလူႉၵွႆၼပ်ႉႁူဝ်ႁဵင်လင်။ ၵူၼ်းမိူင်းလူႉတၢႆ 100 ပၢႆ။ လူဝ်ႇတၢင်းၸွႆႈထႅမ် ႁၢဝ်ႈႁႅင်း။

ၵူၺ်းၵႃႈ သိုၵ်းမၢၼ်ႈႁၢမ်ႈႁႄႉ ၸုမ်းၸွႆႈထႅမ်တၢင်းၼွၵ်ႈ ဢမ်ႇပၼ်ၶဝ်ႈၸွႆႈ။ ၸုမ်းဢၼ်သိုၵ်းမၢၼ်ႈ ယုမ်ႇၸႂ်ၼၼ်ႉၵူၺ်း လႆႈၶႂၢင်ႉၶဝ်ႈၸွႆႈထႅမ်။

ဝၼ်းတီႈ 13 မိူဝ်ႈဝႃးၼႆႉ ၸုမ်းၼၢင်းယိင်းၼႂ်းၼွင်လၢတ်ႈဝႃႈ မီးၸုမ်းၸွႆႈထႅမ်ၸုမ်းၼိုင်ႈ လူင်းပိုၼ်ႉတီႈ ၸွႆႈထႅမ်ၵူၼ်းထူပ်းၽေးသေ မီးလွင်ႈႁူၺ်းသူၼ်းၵူၼ်းမိူင်းႁႂ်ႈသႂ်ႇၶႅပ်းမႄးပၼ်ၶဝ် ၽွင်းပၢင်လိူၵ်ႈတင်ႈ ဢၼ်တေၸတ်းၼႂ်းႁၢင်ပီၼႆႉ – ဝႃႈၼႆ။

လွင်ႈၼႆႉ ၽွင်းၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁွတ်ႈထိုင်ၼႂ်းၼွင်ႁၢႆးယႃႈၼၼ်ႉၵေႃႈ မီးၵူၼ်းတႅမ်ႈလိၵ်ႈသႂ်ႇၸေႈသေ ပိုၼ်ဝႆႉတီႈၵူၼ်းၵႂႃႇမႃးၼမ်။ တႅမ်ႈဝႆႉဝႃႈ – “ဢီးလူ ၵူၼ်းမိူင်း ၸိူဝ်းထူပ်းၽေးၽႅၼ်ႇလိၼ်ဝႆၽွင်ႈ ယႃႇမႃးႁူၺ်းသူၼ်း လွင်ႈလိူၵ်ႈတင်ႈၽွင်းလူင်းၸွႆႈထႅမ်”- ဝႃႈၼႆ။

ၼွၵ်ႈလိူဝ်ၼၼ်ႉ တႅမ်ႈသႂ်ႇပႃးၼိူဝ်ၽႃႇမိုဝ်းသေ ထၢႆႇၶႅပ်းႁၢင်ႈ တၢင်ႇၾဵတ်ႉသ်ပုၵ်ႉပႃး။

ၸုမ်းၼၢင်းယိင်း ၼႂ်းၼွင်လၢတ်ႈဝႃႈ ဢၼ်လူင်းၸွႆႈထႅမ်လူဝ်လူဝ်သေ ႁူၺ်းသူၼ်းတႃႇပၢင်လိူၵ်ႈတင်ႈၼႆႉ ပဵၼ်ပႃႇတီႇသၢင်ႇသီႈ၊ ပႃႇတီႇၼႂ်းၼွင်၊ ပႃႇတီႇ PPP လႄႈ ၸုမ်းမုၼ်ၸဝ်ႈ မပတ ႁၵ်ႉၸိူဝ်ႉၸၢတ်ႈ သႃသၼႃ ၸိူဝ်းၼၼ်ႉ ဝႃႈၼႆ။

ၼႂ်းၸႄႈဝဵင်းယွင်ႁူၺ်ႈၼႆႉ ၼွၵ်ႈလိူဝ် လႆႈထူပ်းၽေးၽႅၼ်ႇလိၼ်ဝႆသေ လူႉတၢႆၵၼ်ယဝ်ႉ သိုၵ်းမၢၼ်ႈလႄႈ ၸုမ်းပျီႇတူႉၸိတ်ႉပဢူဝ်း ဢဝ်ၶိူင်ႈမိၼ်သိုၵ်း ပိုတ်းယိုဝ်း၊ ဢဝ်ၶိူင်ႈၵွင်ႈလူင် ပိုတ်းယိုဝ်း ႁဵတ်းႁႂ်ႈၵူၼ်းမိူင်းလူႉတၢႆထႅင်ႈ။