သိုၵ်းမၢၼ်ႈ ပလိၵ်ႈမၢၼ်ႈ တီႈတူဝ်ႊလ်ၵဵတ်ႉ ဝဵင်းလွႆလႅမ် ဢမ်ႇပိုၼ်ၽၢဝ်ႇဝႆႉလူင်ႈၼႃႈသင်သေ ႁၢမ်ႈရူတ်ႉၵႃးယႂ်ႇ ၵႃးတၢင်ႈၶူဝ်းၵုၼ်ႇ ၵႂႃႇမႃးၶိုၼ်ႈလူင်း ဝဵင်းတူၼ်ႈတီး ယွၼ်ႉဝႃႈ တေမီးပွႆးတၢင်ႇထီးထၢတ်ႈ သူၺ်ႇၽူင်းပုၼ်ႉ ဝႃႈၼႆ။

သိုၵ်းမၢၼ်ႈ ပလိၵ်ႈမၢၼ်ႈ တီႈတူဝ်ႊလ်ၵဵတ်ႉ ဝဵင်းလွႆလႅမ်ၼႆႉ ႁၢမ်ႈရူတ်ႉၵႃးယႂ်ႇ 10 လေႃႉ – 12 လေႃႉ ဢၼ်တေၶိုၼ်ႈဝဵင်းတူၼ်ႈတီးတင်းသဵင်ႈ တေဢမ်ႇလႆႈလတ်းၵဵတ်ႉ တင်ႈတႄႇဝၼ်းတီႈ 09-12/04/2025 ၼႆႉလႄႈ ႁဵတ်းႁႂ်ႈၸဝ်ႈၵုၼ်ႇၸဝ်ႈၵႃး ယၢပ်ႇၵိၼ်းၸႂ်။  

ၸဝ်ႈၵႃးလူင်တၢင်ႇၵုၼ်ႇ ဢၼ်လႅၼ်ႈတူၼ်ႈတီး – ၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ – “တီႈတူဝ်ႊလ်ၵဵတ်ႉ ဢၼ်လုၵ်ႉလွႆလႅမ် တေဢွၵ်ႇၵႂႃႇမိူင်းပွၼ်ၼၼ်ႉ ပလိၵ်ႈမၢၼ်ႈႁၢမ်ႈ ၵႃးလူင်တၢင်ႇၵုၼ်ႇ ၸိူဝ်းတေ ၶိုၼ်ႈၵႂႃႇတူၼ်ႈတီး။ ႁၢမ်ႈၶိုၼ်ႈလူင်းတေႃႇထိုင်ဝၼ်းတီႈ12/04/2025 ၼႆႉဝႃႇ။ လွင်ႈတေႁၢမ်ႈၼႆႉ ၶဝ်ဢမ်ႇလၢတ်ႈဝႆႉ လူင်ႈၼႃႈလူင်၊ ၵႃးဢၼ်လုၵ်ႉတင်း တူၼ်ႈတီးမႃးၵေႃႈ ၶဝ်ဢမ်ႇပၼ်လတ်း။ ပေႃးၵႃးတေၵႂႃႇ တၢင်းမိူင်းမၢၼ်ႈတႄႉ မီးတၢင်းလဵပ်ႈဝဵင်းယူႇ တၢင်းၼိုင်ႈၼႆသေတႃႉ ၼၼ်ႉၵေႃႈပိၵ်ႉဝႆႉၼင်ႇၵဝ်ႇ”- ဝႃႈၼႆ။

သိုၵ်းမၢၼ်ႈ ပလိၵ်ႈမၢၼ်ႈ ဢမ်ႇပၼ်ရူတ်ႉၵႃးယႂ်ႇၶိုၼ်ႈလူင်းလႄႈ ၶမ်ဝႆႉတီႈတူဝ်ႊလ်ၵဵတ်ႉၼၼ်ႉ မီးမွၵ်ႈ 50 လမ်း။ ၵမ်ႈၼမ် တေပဵၼ်ၵႃးတၢင်ႇမၢၵ်ႇမႆႉမၢၵ်ႇတွၵ်ႇလႄႈ ၶဝ်ႈၵၢပ်ႇ တႅင် ဢၼ်တေဢဝ်ၵႂႃႇၶၢႆ မိူင်းမၢၼ်ႈ –  ဝႃႈၼႆ။

ၶၢဝ်ႇဢမ်ႇပႆႇယိုၼ်ယၼ်လႆႈ ဢၼ်ၼိုင်ႈတႄႉဝႃႈ – ပွႆးတၢင်ႇထီးထၢတ်ႈ သူၺ်ႇၽူင်းပုၼ်ႉ ဝဵင်းတူၼ်ႈတီးၼၼ်ႉ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ တေမႃးၶဝ်ႈႁူမ်ႈလႄႈ သိုၵ်းမၢၼ်ႈ ၸင်ႇႁၢမ်ႈရူတ်ႉၵႃးယႂ်ႇၶိုၼ်ႈလူင်း – ဝႃႈၼႆ။ 

ၼၢင်းယိင်း သႅၼ်းပၢၼ်ဢႃယု မွၵ်ႈ 40 ပီ ယူႇဝဵင်းတူၼ်ႈတီး လၢတ်ႈၽူႈတွႆႇႁွၵ်ႈဝႃႈ -“ငိၼ်းဝႃႈ မိၼ်းဢွင်ႇလၢႆႇ တေမႃးပွႆးတၢင်ႇထီးထၢတ်ႇဝႃႇ။ ၵွပ်ႈၼႆ တီႈတူၼ်ႈတီးၼႆႉ ၸဵမ်ၼႂ်းဝဵင်းၼွၵ်ႈဝဵင်း သိုၵ်းမၢၼ်ႈ ပလိၵ်ႈမၢၼ်ႈ ပႂ်ႉၵူတ်ႇထတ်းရူတ်ႉယႂ်ႇရူတ်ႉဢွၼ်ႇ သမ်ႉပေႃးတဵမ်ၵႂႃႇမူတ်း”- ဝႃႈၼႆ။

ရူတ်ႉၵႃးယႂ်ႇဢၼ်ၶမ်ဝႆႉ တီႈတူဝ်ႊလ်ၵဵတ်ႉ မၢင်ၸိူဝ်း ပဵၼ်ရူတ်ႉၵႃးပဝ်ႇ ဢၼ်လုၵ်ႉတၢင်း ဝဵင်းတူၼ်ႈတီး လူင်းမႃး တႃႇတေၵႂႃႇတၢင်ႇထၢၼ်ႇႁိၼ် ၼႂ်းမိူင်းတႆးပွတ်းၸၢၼ်း ပွတ်းႁွင်ႇ။ မၢင်ၸိူဝ်းသမ်ႉ ပဵၼ်ဢၼ်တၢင်ႇထၢၼ်ႇႁိၼ်မိူင်းတႆးၶိုၼ်ႈမႃး ဢၢၼ်းတေၵႂႃႇသူင်ႇတၢင်းမိူင်းမၢၼ်ႈ တူင်ႈပဵင်း။ မၢင်ၸိူဝ်း ပဵၼ်ရူတ်ႉၵႃး တၢင်ႇၶူဝ်းၵုၼ်ႇ ဢၼ်လုၵ်ႉတၢင်းမိူင်းလႃး – ၵဵင်းတုင် – တႃႈၶီႈလဵၵ်းမႃး ဢၢၼ်းတေၵႂႃႇတၢင်းမိူင်းမၢၼ်ႈ ဝႃႈၼႆ။

ပွႆးတၢင်ႇထီးထၢတ်ႈ သူၺ်ႇၽူင်းပုၼ်ႉၼႆႉ တေၸတ်းၼႂ်းဝၼ်းတီႈ 11/04/2025 လႆႈႁူႉၼင်ႇၼႆ။