ၾၢႆႇၵူတ်ႇထတ်းၵူၼ်းၶဝ်ႈမိူင်း မိူင်းထႆး ဢွၵ်ႇပိူင်မႂ်ႇထႅင်ႈ တႃႇၵုမ်းၵူၼ်းၸိူဝ်းတေၶဝ်ႈမိူင်းထႆး။ ပဵၼ်ၽႂ်ယူႇတီႈလႂ်သေဢမ်ႇဝႃႈ သင်ဝႃႈ တေၶဝ်ႈမိူင်းထႆး တၵ်းလူဝ်ႇယိုၼ်ႈလိၵ်ႈတၢင်းဢွၼ်ႊလၢႆႊ လူင်ႈၼႃႈ 3 ဝၼ်း ၸင်ႇတေမီးၶႂၢင်ႉၶၢမ်ႈၶဝ်ႈမိူင်း။

ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုတ်းဢႃႇၼႃႇၸိုင်ႈမိူင်းမႃးၶၢဝ်းတၢင်း 4 ပီၼႆႉ ၵူၼ်းမိူင်းမၢၼ်ႈ မိူင်းတႆး ဢမ်ႇလႆႈယူႇလီၸႂ်၊ ႁႃတၢင်းပၢႆႈဢွၵ်ႇမိူင်းယူႇၵူႈဝၼ်း။ ၵူၼ်းမိူင်းလႆႈပၢႆႈမႃး ၸဵမ်မိူဝ်ႈပၢၼ် တႅပ်း 4 တႅပ်း 1996 – 97 တေႃႇထိုင်ယၢမ်းလဵဝ် ဢမ်ႇမီးၸုမ်းလႂ်ၵႅတ်ႇၶႄႁႄႉၵင်ႈ ပၼ်လႆႈ။

မိူဝ်ႈတိုၵ်ႉလႆႈပၢႆႈလႆႈၼီယူႇၼၼ်ႉ ၾၢႆႇမိူင်းမၢၼ်ႈၵေႃႈပိူင်ၼိုင် ၾၢႆႇမိူင်းထႆးၵေႃႈပိူင်ၼိုင်ႈ ဢွၵ်ႇပိူင်ၵုမ်း ၵူၼ်းၶဝ်ႈဢွၵ်ႇမိူင်း ဢၼ်ၼိုင်ႈယဝ်ႉဢၼ်ၼိုင်ႈ။ ဢၼ်တုမ်ႉတိူဝ်ႉယၢပ်ႇၽိုတ်ႇၵိၼ်းၸႂ်ၼႆႉ ၵုမ်ႇပဵၼ် ၵူၼ်းမိူင်းၵူၺ်း။

မိူဝ်ႈလဵဝ်ၵေႃႈ ၾၢႆႇၵူတ်ႇထတ်းၵူၼ်းၶဝ်ႈမိူင်း မိူင်းထႆး ဢဝ်ၶေႃႈဢၢင်ႈဝႃႈ တႃႇၵုမ်းလႆႈ ၵူၼ်းၶဝ်ႈမိူင်း ငၢႆႈၼႆသေ ဢွၵ်ႇပိူင်မႂ်ႇထႅင်ႈ။ ၼၼ်ႉၵေႃႈ ႁႂ်ႈၵူၼ်းၸိူဝ်းတေၶဝ်ႈမိူင်းထႆး ထႅမ် ၸိုဝ်ႈထႅမ်ႈသဵင် ၼႂ်းဝႂ်ဢွၼ်ႊလၢႆႊ လူင်ႈၼႃႈ 3 ဝၼ်း။

ဝႂ်ၼၼ်ႉ ၶဝ်မၵ်းၸိုဝ်ႈဝႃႈ Thailand Digital Arrival Card (TDAC) ၼႆသေ ႁႂ်ႈသမၵ်းယဝ်ႉ သူင်ႇပၼ်တၢင်းဢီႊမေလ်ႊ ၾၢႆႇၵဵဝ်ႇၶွင်ႈ။ ပိူင်ဢၼ်ၼႆႉ တေတႄႇႁဵတ်းၵႂႃႇ ဝၼ်းတီႈ 01/05/2025 ၼႆႉ ဝႃႈၼႆ။

ဢမ်ႇဝႃႈ တေၶဝ်ႈမိူင်းထႆး ၾၢႆႇတၢင်းလႂ်ၵေႃႈယဝ်ႉ မိူၼ်ၼင်ႇ မႃးတင်းသဵၼ်ႈတၢင်းၶိူင်ႈမိၼ် ၊ သဵၼ်ႈတၢင်းလိၼ် ၊ သဵၼ်ႈတၢင်းၼမ်ႉၵေႃႈယဝ်ႉ တၵ်းလႆႈႁဵတ်းၸွမ်းပိူင်။

သင်ဝႃႈ မီးၵူၼ်း တေၶႂ်ႈၶဝ်ႈမိူင်းထႆးၼႆၸိုင် လူဝ်ႇလႆႈတႅမ်ႈႁႃ ၼႂ်း Google ဝႃႈ Thailand Digital Arrival Card (TDAC) ၼႆသေ ထႅမ်ပၼ်လွၵ်းပဝ်ႇ ၸိူဝ်းၼၼ်ႉ တေမီးဝႆႉလွၵ်းလၢႆဢၼ် တႃႇထႅမ် ၸိုဝ်ႈ တီႈယူႇ မၢႆဝႂ်ၶၢမ်ႈမိူင်းပၢတ်ႉသပွတ်ႇ မၢႆဝီႊသႃႊ ၸဵမ်ၸိူဝ်းၼႆႉ။ (ၾၢင်ႉ တေလႆႈပဵၼ်ဝႅပ်ႊသၢႆႊ สำนักงานตรวจคนเข้าเมือง ၸင်ႇတေယုမ်ႇယမ်လႆႈ)။

တေလႆႈထႅမ်ပႃး လွင်ႈတၢင်းဢၼ်တေၶဝ်ႈမိူင်းထႆးလႄႈ ပၢႆးယူႇလီၸဝ်ႈၵဝ်ႇ မီးဝႆႉၸိူင်ႉႁိုဝ် ၸိူဝ်းၼႆႉၵေႃႈ တၵ်းလႆႈသႂ်ႇပႃးၼႂ်းၾွမ်ႇၼၼ်ႉ။ ပေႃးထႅမ်ယဝ်ႉ ႁႂ်ႈတဵၵ်း Submit သေ လူဝ်ႇပႂ်ႉတူၺ်း လွင်ႈတုမ်ႉတွပ်ႇမႃး။

ပိူင်ဢၼ်ၼႆႉ ဢမ်ႇတွၼ်ႉမီးမႃးသေပွၵ်ႈ ၵူၺ်းၵႃႈ ႁဵတ်းသင်လႄႈ ၸဝ်ႈၼႃႈတီႈထႆး ၸတ်းႁဵတ်းပိူင် ဢၼ်ၼႆႉမႃးၼႆၼၼ်ႉ ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation လၢတ်ႈၼႄဝႆႉၼင်ႇၼႆ –

“ပိူင်ဢၼ်ၼႆႉ ဢမ်ႇယၢမ်ႈမီးမႃး တိုၵ်ႉတေၸႂ်ႉၵႂႃႇၵူၺ်း။ တၢင်းယိူင်းဢၢၼ်းၶဝ်တႄႉ ၵူၼ်းတေဢမ်ႇ လႆႈၵႂႃႇၶွၼ်ႈၵၼ် တီႈၽၵ်းတူၶဝ်ႈမိူင်းၼမ် တေဢမ်ႇလႆႈပႂ်ႉၶိဝ်း။ ယဝ်ႉၵေႃႈ တေၵူတ်ႇထတ်းငၢႆႈ ၼႆဢေႃႈ။ တေလႆႈသူင်ႇလိၵ်ႈဢၼ်ၼၼ်ႉဝႆႉ လူင်ႈၼႃႈ 3 ဝၼ်း။ ပေႃးၶဝ်ပွင်ႇၶၢဝ်ႇပၼ်ၶိုၼ်းယဝ်ႉ ၸင်ႇတေၶဝ်ႈမႃးလႆႈ”- ။

တႃႇသူင်ႇလိၵ်ႈယိုၼ်ႈထိုင်ၼၼ်ႉ တၵ်းလႆႈမီး ဢႅၵ်ႉၶွင်ႉဢီႊမေလ်ႊ သုၼ်ႇတူဝ်။ ၵူၺ်းၵႃႈ ၵမ်ႈၼမ် ၵူၼ်းၼုမ်ႇ လုၵ်ႈဢွၼ်ႇၵူၺ်း တေမီးဢႅၵ်ႉၶွင်ႉဢီႊမေလ်ႊ။ ပေႃးပဵၼ်ၵူၼ်းထဝ်ႈၵူၼ်းလူင် တေဢမ်ႇ သူင်ၸႂ်ႉဢီႊမေလ်ႊ၊ သမ်ႉတေလႆႈၸၢင်ႈပိူၼ်ႈႁဵတ်းပၼ်ထႅင်ႈလႄႈ လွင်ႈၼႆႉၵေႃႈ တေႁဵတ်းႁႂ်ႈၵူၼ်း မိူင်းယၢပ်ႇၽိုတ်ႇၵိၼ်းၸႂ်ထႅင်ႈ ၵူၺ်းၼင်ႇၵဝ်ႇ ၽူႈၸွႆႈထႅမ်ႁႅင်းၵၢၼ် တီႈဝဵင်းၵဵင်းမႂ်ႇ ၵေႃႉၼိုင်ႈလၢတ်ႈ။

ၵူၺ်းၵႃႈ ပေႃးမီးဢႅၵ်ႉၶွင်ႉ ဢီႊမေလ်ႊတႄႉ ႁဵတ်းငၢႆႈ၊ ပေႃးမီးဢိၼ်ႊထိူဝ်ႊၼႅတ်ႊ – ယူႇႁိူၼ်းသေ တႅမ်ႈတၢင်ႇသူင်ႇၵူၺ်းၵေႃႈယင်းလႆႈ။ မိူၼ်ဢဝ်ဝႂ်ၶဝ်ႈထႅဝ် ဝႆႉၵူၺ်း။ ပေႃးထိုင် ၽၵ်းတူလႅၼ်လိၼ် ဢမ်ႇတၢပ်ႇလူဝ်ႇၶဝ်ႈထႅဝ်ပႂ်ႉမိူၼ်ၵူႈပွၵ်ႈ။ ပေႃးၼႄလၵ်းထၢၼ် လိၵ်ႈတွပ်ႇပွၵ်ႈၶိုၼ်းတၢင်းဢီႊမေလ်ႊ ၵေႃႈလႆႈယဝ်ႉၼႆ – ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation လၢတ်ႈဝႆႉၼင်ႇၼႆ –

“ႁႂ်ႈမၼ်းငၢႆႈငႅမ်ႈၼႆၵေႃႈ တေဢမ်ႇမီးၼင်ႇၵဝ်ႇ မၼ်းၵေႃႈ တေမီးလွင်ႈယၢပ်ႇလၢႆၸိူဝ်ႉလၢႆပိူင် သင်ဝႃႈ ပဵၼ်ၵူၼ်းဢမ်ႇပွင်ႇၸႂ်ပိူင်ၼႆႉ။ ၵူၺ်းၵႃႈ ႁဝ်းၵေႃႈ တိုၵ်ႉပႂ်ႉတူၺ်းငဝ်းလၢႆး မၼ်းယူႇ။ ပႂ်ႉတူၺ်းၵူၼ်း ၸိူဝ်းတေပွၵ်ႈမိူဝ်း မိူင်းတႆးၵေႃႈမီးယူႇ ပေႃးၶဝ်ၶဝ်ႈမႃးၶိုၼ်း ၸွင်ႇၶဝ် တေလႆႈၸွမ်းပိူင် ဢၼ်ၼႆႉ တႄႉႁႃႉၼႆ လူဝ်ႇပႂ်ႉတူၺ်းထႅင်ႈ။ ဢၼ်ၼႆႉ တေႃႊမေႃႊၶဝ် တိုၵ်ႉႁႃဢွၵ်ႇပိူင်ၵူၺ်းၼႃႇၼေႃႈ တူဝ်ထူပ်းသမ်ႉ ပႆႇမီးၽႂ် ပႆႇၸၢင်ႈလၢတ်ႈလႆႈတဵမ်ပၢၵ်ႇဝႃႈ ယၢပ်ႇႁႃႉငၢႆႈၼႆတႄႉတႄႉ”- ။

မိူဝ်ႈဢွၼ်တၢင်းတႄႉ ပေႃးတေၶဝ်ႈမိူင်းထႆးၼႆ ၸဝ်ႈၼႃႈတီႈၶဝ် တေၸႂ်ႉတႅမ်ႈၸိုဝ်ႈ တီႈယူႇ သႂ်ႇၼႂ်းမၢင်ၸေႈၶၢဝ်ၶၢဝ် ဢၼ်ႁွင်ႉဝႃႈ TM 6 ၼၼ်ႉၵူၺ်း။

ၸွမ်းၼင်ႇ တဵၵ်းတူၺ်းလိင်ႉၶ် ဢၼ်ၸဝ်ႈၼႃႈတီႈၶဝ် ဝၢင်းဝႆႉပၼ်ၼႂ်းဝႅပ်ႉသၢႆႉတႄႉ ပေႃးတေထႅမ် ၵူႈလွင်ႈလွင်ႈၸိုင် တေၸႅၵ်ႇဝႆႉ 3 သုၼ်ႇ – 1) ပဵၼ်ပိုၼ်းၵႅပ်ႈတူဝ်ၵဝ်ႇ(ယူႇလႂ် ပဵၼ်ၽႂ် မၢႆၾူၼ်း မၢႆဝႂ်ၶၢမ်ႈမိူင်း ၸိူဝ်းၼႆႉတႄႇၵႂႃႇ။  2) မႃးၸွမ်းတၢင်းလႂ် ၶိူင်ႈမိၼ်ႁႃႉ ရူတ်ႉၵႃးႁႃႉ သဵၼ်ႈတၢင်းၼမ်ႉႁႃႉ ၸိူဝ်းၼႆႉ။ 3) တေမႃးယူႇပွၵ်ႉလႂ်ဢိူင်ႇလႂ်ဝဵင်းလႂ် ၼႂ်းမိူင်းထႆး။ ထႅင်ႈဢၼ်ၼိုင်ႈသမ်ႉ ႁႂ်ႈသႂ်ႇပႃး ပၢႆးယူႇလီၸဝ်ႈၵဝ်ႇ မိူဝ်ႈပူၼ်ႉမႃးသွင်ဝူင်ႈၼၼ်ႉ ပဵၼ်ၶႆႈပဵၼ်ၼၢဝ်သင်ၽွင်ႈၸဵမ်ၸိူဝ်းၼႆႉ။

လိင်ၶ်ႉတႃႇၶဝ်ႈထႅမ်ၸိုဝ်ႈ ၼႂ်းဝႂ် Thailand Digital Arrival Card (TDAC) မီးဝႆႉၼင်ႇပႃႈတႂ်ႈၼႆႉ – https://tdac.immigration.go.th