မိူဝ်ႈဝၼ်းတီႈ 09/04/2025 ၶၢဝ်းယၢမ်းၵၢင်ဝၼ်းမွၵ်ႈ 1 မူင်း သိုၵ်းမၢၼ်ႈၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇ တီႈဝၢၼ်ႈၼမ်ႉသွင်ႁူး ဢၼ်မီးၸဵင်ႇႁွင်ႇဝၼ်းတူၵ်း ဝဵင်းၼွင်ၶဵဝ် ယၢၼ်ၵႆ ၵၼ်တင်း ဝၢၼ်ႈတွင်းၶမ်း 40 လၵ်းပၢႆ ၼႂ်းၸိုင်ႈတႆးပွတ်းႁွင်ႇ။

ၼႂ်းၸႄႈဝဵင်းၼွင်ၶဵဝ်ၼႆႉ သိုၵ်းမၢၼ်ႈတင်း သိုၵ်းတဢၢင်း တိုၵ်ႉပဵၼ်ပၢင်တိုၵ်းၵၼ်ယူႇၵူႈဝၼ်း။ ၾၢႆႇသိုၵ်းမၢၼ်ႈၵေႃႈ ဢဝ်ၶိူင်ႈမိၼ် ပွႆႇမၢၵ်ႇသႂ်ႇ ၸွမ်းသၢပ်ႇဝဵင်းၼွင်ၶဵဝ်လႄႈ ႁိမ်းႁွမ်း ဝၢၼ်ႈတွင်းၶမ်းယူႇ ဢမ်ႇထၢတ်ႇၼႆ ၵူၼ်းၸမ်ၸႂ် ၼႂ်းတပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပၢင်တိုၵ်းၼႂ်းၸႄႈဝဵင်းၼွင်ၶဵဝ် ၸွမ်းႁိမ်းႁွမ်း ဝၢၼ်ႈတွင်းၶမ်းၼႆႉ သဵင်ၵွင်ႈဢမ်ႇထၢတ်ႇႁႄဝၼ်း ယင်းတိုၵ်ႉယိုဝ်းၵၼ် ယူႇတိၵ်းတိၵ်း။ မိူဝ်ႈဝႃးၵေႃႈ သိုၵ်းမၢၼ်ႈဢဝ်မၢၵ်ႇမႃးပွႆႇထႅင်ႈယူႇ-”။

ၼႂ်းဝူင်ႈၼႆႉ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်းသေ ပွႆႇမၢၵ်ႇသႂ်ႇ ၼႂ်းၸႄႈဝဵင်းၼွင်ၶဵဝ် ၼမ်မႃးလိူဝ်ၵဝ်ႇ။ လိူဝ်ၼၼ်ႉ ယင်းတိုၵ်ႉသိုပ်ႇၽိူမ်ႉထႅမ်ႁႅင်းသိုၵ်းယူႇ ဝႃႈၼႆ။

ဝၢႆးလင် ၵူၼ်းမိူင်းႁူမ်ႈတုမ် ႁူပ်ႉၽေးၽႅၼ်ႇလိၼ်ဝႆ (ဢိင်ႇသၼ်ႇ) ႁၢဝ်ႈႁႅင်းယဝ်ႉ တႄႇဝၼ်းတီႈ 02/04/2025 တႃႇဝၼ်းတီႈ 22/04/2025 သိုၵ်းမၢၼ်ႈ ပိုၼ်ၽၢဝ်ႇ ၵိုတ်းတိုၵ်းၵၼ်တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵူႈၸုမ်း ႁိုင်ၶၢဝ်းတၢင်း 20 ဝၼ်းၼႆသေတႃႉ တင်ႈတႄႇဝၼ်းပိုၼ်ၽၢဝ်ႇ ႁၢၼ်ႉတေႃႇထိုင်ဝၼ်းမိူဝ်ႈၼႆႉ 10/04/2025 သိုၵ်းမၢၼ်ႈ တိုၵ်ႉၸႂ်ႉၶိူင်ႈမိၼ် ပွႆႇမၢၵ်ႇသႂ်ႇ၊ ထႅမ်ႁႅင်းသိုၵ်းၽိုတ်ႉ ၶဝ်ႈၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသေ ပဵၼ်ပၢင်တိုၵ်းၵၼ်ယူႇ ဢမ်ႇထၢတ်ႇ ဝႃႈၼႆ။

မိူၼ်ၼၼ်ၼင်ႇၵဝ်ႇ မိူဝ်ႈဝူင်ႈပူၼ်ႉမႃး ဝၼ်းတီႈ 05/04/2025 ယၢမ်းၵၢင်ၶမ်ႈ 10 မူင်းပၢႆၼၼ်ႉၵေႃႈ သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇသႂ်ႇ တီႈဝၢၼ်ႈၼွင်လႅင်တင်း ဝၢၼ်ႈၼမ်ႉသွင်ႁူး ၼႂ်းၸႄႈဝဵင်းၼွင်ၶဵဝ် ႁဵတ်းႁႂ်ႈတိူဝ်ႉၺႃးၵူၼ်းမိူင်း လူႉၵွႆၵႂႃႇ 4 လင် ၼႆယဝ်ႉ။

တီႈၼႂ်းၸႄႈဝဵင်းၼွင်ၶဵဝ်ၼႆႉ တပ်ႉသိုၵ်းတဢၢင်းတင်း ၸုမ်းဢူၺ်းလီၶဝ် ႁူမ်ႈၵၼ် ႁႅၼ်းသိုၵ်းၶဝ်ႈလေႃႇတိုၵ်း တပ်ႉပၢင်သဝ်း သိုၵ်းမၢၼ်ႈ ဢၼ်မီးတီႈဝၢၼ်ႈတွင်းၶမ်း ယၢၼ်ၵႆၵၼ်တင်း ဝဵင်းၼွင်ၶဵဝ် မွၵ်ႈ 20 လၵ်းၼၼ်ႉမႃး တင်ႈတႄႇလိူၼ်ဢေႃႊၵတ်ႊသ် ပီ 2024။

တီႈဝၢၼ်ႈတွင်းၶမ်းၼႆႉ မီးတပ်ႉပၢင်သဝ်းၶွင် တပ်ႉသိုၵ်းမၢၼ်ႈ တပ်ႉမၢႆ 345 – 206 – 406 တႂ်ႈငဝ်ႈၵုမ်းၵမ်ၽႅၼ်ယၼ်ႇသိုၵ်း တပ်ႉဢမျွၵ်ႈ 902။ သိုၵ်းတဢၢင်းတင်း ၸုမ်းဢူၺ်းလီ ၶဝ်ႈလေႃႇတိုၵ်းသိုၵ်းမၢၼ်ႈ ၶၢဝ်းတၢင်းႁိုင်မွၵ်ႈၼိုင်ႈလိူၼ် ၵုမ်းၵမ်လႆႈ တပ်ႉပၢင်သဝ်းၶိူင်ႈၵွင်ႈလူင် ၶွင်သိုၵ်းမၢၼ်ႈ တပ်ႉမၢႆ 206 လႄႈ 406 ။

ၵူၺ်းၵႃႈ တႄႇၼႂ်းႁူဝ်ပီ 2025 မႃးၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ်၊ ၻရူၼ်ႊ ပွႆႇမၢၵ်ႇသႂ်ႇႁၢဝ်ႈႁႅင်းၵူၺ်းဢမ်ႇၵႃး ပိၼ်ႇလၢႆႈပႃး ၽႅၼ်ၵၢၼ်သဵၼ်ႈတၢင်းၶဝ်ႈလူမ်ႇတိုၵ်းသိုၵ်းတဢၢင်းလႄႈ ႁဵတ်းႁႂ်ႈၾၢႆႇသိုၵ်းမၢၼ်ႈ ၶဝ်ႈၵုမ်းၵမ်ၵႂႃႇလႆႈၶိုၼ်း တပ်ႉပၢင်သဝ်း တပ်ႉမၢႆ 206 တင်း 406 ။ ၼႂ်းၶၢဝ်းတၢင်း ၽႅၼ်ယၼ်ႇသိုၵ်း 1027 တင်းသွင်လွပ်ႈၼႆႉ သိုၵ်းတဢၢင်း TNLA ၵုမ်းၵမ်လႆႈ ဝဵင်းမိူင်းၵုတ်ႈ ဢၼ်ၶဝ်ႈပႃးဝႆႉ ၾၢႆႇတႂ်ႈတိူင်းဝဵင်းလိူဝ်ႇ(မၼ်းတလေး)။ ၼႂ်းမိူင်းတႆးပွတ်းႁွင်ႇသမ်ႉ ၵုမ်းၵမ်လႆႈဝႆႉ မိူင်းမိတ်ႈ၊ မိူင်းလူင်၊ မိူင်းငေႃႉ၊ ၼွင်ၶဵဝ်၊ ၵျွၵ်ႉမႄး၊ မၢၼ်ႈတူင်ႈ၊ ၼမ်ႉတူႈ၊ ၼမ်ႉၶမ်း၊ ၼမ်ႉသၼ်ႇ၊ သီႇပေႃႉ၊ ၵူတ်ႉၶၢႆ ၸဵမ်ၸိူဝ်းၼႆႉ။

တႅမ်ႈ – ၽူၺ်းၼုမ်ႇ