ယၢမ်းလဵဝ် ၵဵတ်ႉလၢၼ်ႇသိုၵ်းမၢၼ်ႈ တီႈမိူင်းပၢတ်ႇ ၼႂ်းၸႄႈဝဵင်းတၢင်ႉယၢၼ်း ဢၼ်မီးၼိူဝ်သဵၼ်ႈတၢင်း ၵႂႃႇၸူးဝဵင်းလႃႈသဵဝ်ႈၼၼ်ႉ သိုၵ်းမၢၼ်ႈ ၵဵပ်းၶွၼ်ႇႁၢဝ်ႈႁႅင်းၼမ်မႃးလိူဝ်ၵဝ်ႇလႄႈ ႁဵတ်းႁႂ်ႈၸဝ်ႈၵႃးၶဝ် ထူပ်းတၢင်းယၢပ်ႇ။

ၸဝ်ႈၵႃး ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“မိူဝ်ႈလဵဝ် ပေႃးဢွၵ်ႇဝဵင်းတၢင်းယၢၼ်း တေၵႂႃႇဝဵင်းလႃႈသဵဝ်ႈ ၽွင်းထိုင်တီႈၵဵတ်ႉသိုၵ်းမၢၼ်ႈ တီႈမိူင်းပၢတ်ႇၼၼ်ႉ ၶဝ်ၵူတ်ႇထတ်းၸႅတ်ႈထၢမ်ႁၢဝ်ႈႁႅင်း ၶူဝ်းၵုၼ်ႇဢၼ်တေႃႉတၢင်ႇမႃးၵေႃႈ ထုၵ်ႇၸႅတ်ႈမူတ်း လိူဝ်ၼၼ်ႉ ယင်းတဵၵ်းယွၼ်းငိုၼ်းထႅင်ႈလူးၵွၼ်ႇ။ ငိုၼ်းၼႆႉ ၵမ်ႈၽွင်ႈ လႆႈပၼ်ႁူဝ်မိုၼ်ႇပျႃး မၢင်ၸိူဝ်း လႆႈပၼ်ထိုင်ႁူဝ်သႅၼ်ၵေႃႈမီးဢေႃႈ”- ဝႃႈၼႆ။

ၵဵတ်ႉသိုၵ်းမၢၼ်ႈၼႆႉ မီးဝႆႉလၢႆတီႈလႄႈ ယၢမ်းလဵဝ် ၵႃးၵူၼ်းႁိူၼ်း၊ ၵႃးသင်ၶၸဝ်ႈ ၸိူဝ်းၼႆႉၵေႃႈဢမ်ႇဝႆႉ ၵူတ်ႇထတ်းၸႅတ်ႈထၢမ် ၵူႈလမ်း ယဝ်ႉၵေႃႈ ပၢႆၵဵပ်းၶွၼ်ႇယွၼ်းငိုၼ်းပႃးထႅင်ႈ။ ၵူႈပွၵ်ႈ ၶဝ်တေၵူတ်ႇထတ်း ၸႅတ်ႈထၢမ်မွၵ်ႈၼၼ်ႉၵူၺ်း ဢၼ်ၶဝ်ယွၼ်းငိုၼ်းမႃးၼႆႉ တိုၵ်ႉမႃးပဵၼ်ဝူင်ႈၼႆႉၵူၺ်း – ၵူၼ်းပိုၼ်ႉ တီႈဝဵင်းတၢင်ႉယၢၼ်း ၵေႃႉၼိုင်ႈလၢတ်ႈ။

လုၵ်ႉဢဝ်တီႈဝဵင်းတၢင်ႉယၢၼ်းဢွၵ်ႇမႃး ၵွၼ်ႇပႆႇထိုင်ဝဵင်းလႃႈသဵဝ်ႈၼႆႉ မီးၵဵတ်ႉသိုၵ်းမၢၼ်ႈ ဢမ်ႇယွမ်းသီႇတီႈ တင်ႈဝႆႉတီႈတၢင်းဢွၵ်ႇဝဵင်း၊ ဝၢၼ်ႈၵၢတ်ႈ၊ မိူင်းပၢတ်ႇလႄႈ ႁိမ်းႁူဝ်ယ ၸိူဝ်းၼႆႉ မီးဝႆႉ 4 တီႈသေ ထုင်ႉမိူင်းပၢတ်ႇၼႆႉ ယၢၼ်ၵႆဝဵင်းမွၵ်ႈ 20 လၵ်းၼႆႉသမ်ႉ မီးပႃးတပ်ႉသိုၵ်းမၢၼ်ႈ ၶလယ 136 ပၵ်းသဝ်းဝႆႉ။

ၼွၵ်ႈလိူဝ် ၵဵတ်ႉသိုၵ်းမၢၼ်ႈယဝ်ႉ သိုၵ်းဝႃႉ UWSA ၵေႃႈ တင်ႈဝႆႉၵဵတ်ႉ ၵူတ်ႇထတ်းၵူၼ်းၵႂႃႇမႃးမိူၼ်ၵၼ်။ ၼႂ်းၸႄႈဝဵင်းတၢင်ႉယၢၼ်းၼႆႉ ၼွၵ်ႈလိူဝ် သိုၵ်းမၢၼ်ႈ၊ သိုၵ်းဝႃႉ UWSA ယဝ်ႉ မိူၼ်ၼင်ႇ – သိုၵ်းတႆး SSPP လႄႈ ၸုမ်းပျီႇတူႉၸိတ်ႉ မိူင်းႁႃႉမိူင်းႁႅင်း ၸိူဝ်းၼႆႉၵေႃႈ တူင်ႉၼိုင်ၵႂႃႇမႃးယူႇဝႆႉ မိူၼ်ၵၼ်။