ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ – ႁိူၼ်းယေး၊ ႁိူၼ်းတိူၵ်ႈ၊ ႁူင်းႁႅမ်း လူႉၵွႆၼမ် ၽွင်းၽႅၼ်ႇလိၼ်ဝႆ (ဢိင်ႇသၼ်ႇ) ၼႆႉ ပဵၼ်ယွၼ်ႉၵၢၼ်ၵေႃႇသၢင်ႈ ဢမ်ႇႁဵတ်းၸွမ်းၼင်ႇမၵ်းမၼ်ႈဝႆႉ ဝႃႈၼႆ။

ဝၼ်းတီႈ 08/04/2025 ၼႆႉ ယူႇတီႈ ႁူဝ်ၼႃႈ သိုၵ်းမၢၼ်ႈယိုတ်းမိူင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လူင်းပိုၼ်ႉတီႈ ၵႂႃႇၵူတ်ႇထတ်းႁူင်းယႃလူင် ဢၼ်ၶဝ်ႈၵူႇ 300 တီႈဝဵင်းလူင်ၼေႇပျီႇတေႃႇ ဢၼ်လူႉၵွႆၵႂႃႇ ယွၼ်ႉၽေးၽႅၼ်ႇလိၼ်ဝႆ မိူဝ်ႈႁၢင်လိူၼ်ပူၼ်ႉမႃးၼၼ်ႉ။   

ဢဝ်တွၼ်ႈသွၼ်ၼႆႉသေ ၽွင်းၵေႃႇသၢင်ႈမႂ်ႇၼႆႉ ထုၵ်ႇလီၼပ်ႉပႃး တႃႇၶၢမ်ႇတၢမ်ႇ ၽေးၽႅၼ်ႇလိၼ်ဝႆလႆႈ၊ ယူႇတီႈ ၽူႈမီးပုၼ်ႈၽွၼ်းၶဝ်ၵေႃႈ ထုၵ်ႇလီပႂ်ႉထတ်းၸွမ်းပိူင်လီငၢမ်း၊ ႁိူၼ်းတိူၵ်ႈ၊ ႁူင်းယႃ ၸိူဝ်းလူႉ ၵွႆၵႂႃႇလႂ်ၸိူဝ်းၼႆႉ။ ၸိူဝ်းမီးၽေး တႃႇၵူၼ်းတေယူႇသဝ်းၼၼ်ႉ ထုၵ်ႇလီၵူၼ်ႇယႃႉပႅတ်ႈတင်းသဵင်ႈၼႆ တိုၵ်းသူၼ်းလၢတ်ႈပႃးဝႆႉၼင်ႇၼႆ။

ၼႂ်းဝၼ်းတီႈ 8 ယၢမ်းၵၢင်ၶမ်ႈၼႆႉ သိုၵ်းမၢၼ်ႈ ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ ၵူၼ်းလူႉတၢႆ ယွၼ်ႉၽႅၼ်ႇလိၼ်ဝႆ မီးၼမ်မႃးထိုင် 3,600 ပၢႆ ၊ မၢတ်ႇၸဵပ်းထႅင်ႈ မွၵ်ႈ 5,000 ၊ ႁၢႆဝႆႉ မွၵ်ႈ 160 ၵေႃႉ။ ႁိူၼ်းယေး ၵူၼ်းမိူင်းလူႉၵွႆ မွၵ်ႈ 5 မိုၼ်ႇ၊ ဝတ်ႉဝႃးၽႃသိူဝ်ႇလူႉၵွႆ 3,000 ပၢႆ၊ ႁူင်းႁဵၼ်း 2,000 ပၢႆ၊ ႁွင်ႈၵၢၼ်လူင်ပွင်ၸိုင်ႈ 2,000 ပၢႆ၊ ၶူဝ်လႄႈ သဵၼ်ႈတၢင်းၵေႃႈ လူႉ ၵွႆၸွမ်း ၼပ်ႉႁူဝ်ပၢၵ်ႇ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။