ပီၼႆႉ ပီႈၼွင်ႉၵူၼ်းၵဵင်းတုင် တေႁဵတ်းပွႆးသွၼ်းၼမ်ႉယူႇသေတႃႉ တေဢမ်ႇၵႅၼ်ၵွင် တေဢဝ်ၵွင်တၢင်ႇရူတ်ႉၵႃးသေ ၵႂႃႇသူင်ႇၵူပ်းၵူၺ်း ဝႃႈၼႆ။
ပေႃးထိုင်မႃး ဝၼ်းတီႈ 12/04/2020 ၼႆႉ ပဵၼ်ဝၼ်းၵႅၼ်ၵွင်ၸႆး ၸွမ်းၼင်ႇ ၾိင်ႈမိူင်းၵဵင်းတုင်၊ ၵူႈပီတႄႉ ဢွၼ်ၵၼ်ၸတ်းႁဵတ်းပွႆးၵႅၼ်ၵွင်ၸႆး ယွၼ်းၼမ်ႉယွၼ်းၾူၼ် ယွၼ်းယူႇလီၵိၼ်ဝၢၼ် ယွၼ်းသူးယွၼ်းလၢပ်ႈ ႁဵတ်းပွႆးယႂ်ႇလၢမ်းလူင် တွႆႇၵွင်ၸႆး မူၼ်ႈမူၼ်ႈသိူဝ်းသိူဝ်း။
ပီၼႆႉတႄႉ ယွၼ်ႉပိူဝ်ႈၽႅၼ်ႇလိၼ်ဝႆသေ ႁဵတ်းႁႂ်ႈၵူၼ်းမိူင်းမၢၼ်ႈမိူင်းတႆး လူႉသုမ်းတၢႆႁၢႆၼပ်ႉႁူဝ်ႁဵင်လႄႈ ပဵၼ်ဢၼ်ၸႂ်ဢမ်ႇလီၸွမ်း၊ ၸင်ႇဝႃႈ ပီႈၼွင်ႉၵဵင်းတုင် တေၵိုတ်းပွႆးမူၼ်ႈသိူဝ်းၵူၼ်းၵိုၼ်းသေ တေႁဵတ်းၵႂႃႇၸွမ်းၾိင်ႈထုင်း လူၺ်ႈလၢႆးၵတ်းၵတ်းယဵၼ်ယဵၼ်ၵူၺ်းယဝ်ႉၼႆ ၵူၼ်းမိူင်းဝဵင်းၵဵင်းတုင် ၵေႃႉၼိုင်ႈ လၢတ်ႈၼင်ႇၼႆ။
“ပီၼႆႉ ၼႂ်းဝၼ်းတီႈ 13 တႄႉ ဢမ်ႇၸတ်းပွႆးယႂ်ႇလူင်ယဝ်ႉ၊ ၵွင်ၵေႃႈ ပိူၼ်ႈဢမ်ႇၵႅၼ်ယဝ်ႉ၊ တေတၢင်ႇၵႃး ၵႂႃႇလူႇၵူပ်းလွင်ႈၼမ်ႉ ၸိူင်ႉၼၼ်ၵူၺ်းယဝ်ႉ၊ ဢမ်ႇႁဵတ်းပွႆးယဝ်ႉ၊ ပေႃးႁဵတ်းပွႆးၵႅၼ်ၵွင်ၼႆႉ ၵူၼ်းတေၵိုၼ်းၼႃႇ၊ ယွၼ်ႉပိူဝ်ႈယၢမ်းလဵဝ် မိူင်းႁဝ်းထူပ်းၽေးၽႅၼ်လိၼ်ဝႆ တိုၵ်ႉပဵၼ်ငဝ်းလၢႆးတူၵ်းၸႂ်ၵူဝ်ႁႄယူႇ။ ၵွပ်ႈၼႆ ပီၼႆႉႁဝ်းၶႃႈ တေဢမ်ႇမီးပွႆးမူၼ်ႈပွႆးသိူဝ်းယဝ်ႉ”- ဝႃႈၼႆ။
ပွႆးၵႅၼ်ၵွင် ဝဵင်းၵဵင်းတုင်ၼႆႉ ႁဵတ်းမႃးၸဵမ်ပၢၼ်ပူႇမွၼ်ႇ တေၵႅၼ်ၵွင်တွႆႇၵွင်ၸႆး ၵူၼ်းမိူင်းတေမႃးၵႃႈမႃးသိူဝ်း၊ ဢွၼ်ၵၼ်ယွၼ်းယူႇလီၵိၼ်ဝၢၼ် ယွၼ်းၾူၼ်ယွၼ်းၼမ်ႉပႃး။ ပေႃးၵႅၼ်ၵွင်ယဝ်ႉ တေဢွၼ်ၵၼ်ၵႂႃႇသူင်ႇႁၢင်ႈၵူပ်းလူင်းၼမ်ႉ။ ပဵၼ်ၾိင်ႈထုင်း ၵူၼ်းမိူင်းၵဵင်းတုင်ႁဵတ်းမႃး 614 ပီယဝ်ႉ – ၵူၼ်းပိုၼ်ႉတီႈလၢတ်ႈၼင်ႇၼႆ။
“ပွႆးၵႅၼ်ၵွင်ႇတီႈၵဵင်းတုင်ၼႆႉ ၵူၼ်းၵိုၼ်းၶွၼ်ႈၵူႈပီၵူႈပီ တေမီးပီ 2020 ပဵၼ် Covid လႄႈ ပီၼႆႉၵူၺ်း ဢၼ်တေဢမ်ႇႁဵတ်းၵိုၼ်းယႂ်ႇၵိုၼ်းလူင်ၼႆႉ ၵူႈပီတႄႉ ၵူၼ်းမႃးၶဝ်ႈပွႆးမီးၸမ်ႁဵင်ၼႆႉဢေႃႈ။ ပီၼႆႉ တီႈၵဵင်းတုင် ၾူၼ်ၵေႃႈဢမ်ႇတူၵ်းၶႃႈ မႆႈႁႅင်းဝႆႉၶႃႈဢေႃႈ ၸွမ်းၼင်ႇ ၾိင်ႈၵဵင်းတုင်မီးတႄႉ ပေႃးသူင်ႇယဝ်ႉ ယွၼ်းၾူၼ်ပႃးၸွမ်းၶႃႈဢေႃႈ”- ဝႃႈၼႆ။
လိူဝ်ၼၼ်ႉ ၽွင်းပွႆးသွၼ်းၼမ်ႉ ၶႂ်ႈႁႂ်ႈၾၢင်ႉၵႂႃႇမႃး၊ ၵူဝ်ပဵၼ်ၽေးၵိုင်ႉၵၢင်ႉ။ ယႃႇၵိၼ်လဝ်ႈမဝ်းပႅင်ႈသေ ႁေႃႈရူတ်ႉႁေႃႈၵႃးဝႆး ၵူၼ်းပိုၼ်ႉတီႈ ပၼ်ၾၢင်ႉဝႆႉၼင်ႇၼႆ။
မိူဝ်ႈဝၼ်းတီႈ 07/04/2025 သိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇပဵၼ်တၢင်းၵၢၼ်ဝႃႈ ၵူၼ်းမိူင်းႁူမ်ႈတုမ်ပတ်းပိုၼ်ႉ ၸိူဝ်းၺႃးၽေးၽႅၼ်ႇလိၼ်ဝႆသေ လူႉတၢႆၵႂႃႇ မီး 3,600 ၵေႃႉ မၢတ်ႇၸဵပ်း 5,017 ၵေႃႉလႄႈ ၵူၼ်းၸိူဝ်းႁၢႆဝႆႉၼၼ်ႉ မီး 160 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ