မိူဝ်ႈဝၼ်းတီႈ 08/04/2025 ယၢမ်းၵၢင်ၼႂ် 11 မူင်း ၵူၼ်းဝၢၼ်ႈပၢင်ၸူင် ၵႂႃႇယဵပ်ႇၺႃးမၢၵ်ႇၾင်လိၼ် မိူဝ်ႈၽႅၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈ တီႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။
ၵူၼ်းမိူင်းၵေႃႉယဵပ်ႇၺႃးမၢၵ်ႇၼႆႉ ပဵၼ်ၵူၼ်းၸၢႆး ဢႃယု 68 ပီ ၸိုဝ်ႈႁွင်ႉ လုင်းသၢင်ႇမၼ်ႈ လႆႈတႅပ်းပႅတ်ႈ ၶႃတင်းသွင်ၶွၼ်သေ ယူတ်းယႃတူဝ်ဝႆႉတီႈ ႁူင်းယႃလူင်ၵူၼ်းမိူင်း ဝဵင်းလႃႈသဵဝ်ႈယူႇၼႆ – ၼၢင်းသႃႇ ၵူၼ်းမိူင်းဝဵင်းသႅၼ်ဝီၵေႃႉၼိုင်ႈ လၢတ်ႈၼႄၼင်ႇၼႆ။
“လုင်းၼၼ်ႉ မၼ်းပဵၼ်ၸၢဝ်းၶိူဝ်းလွႆဢိူဝ်ႈ။ မၢၵ်ႇၼၼ်ႉ ၵႂႃႇႁဵတ်းၸိူင်ႉႁိုဝ် မီးဝႆႉၼႂ်းဝၢင်းၵေႃႈဢမ်ႇႁူႉ။ မၼ်းဢၢင်ႈၵႂႃႇ ၽဵဝ်ႈယိူဝ်ႈ တီႈႁိမ်းၼမ်ႉမေႃႇ ၼႂ်းဝၢင်းႁိူၼ်းမၼ်းၼၼ်ႉ။ မၢၵ်ႇတႅၵ်ႇယဝ်ႉၵေႃႈ ဢွၼ်ၵၼ် ဢဝ်မၼ်းၵႂႃႇတီႈႁူင်းယႃ ၼႂ်းဝဵင်းဢွၼ်တၢင်း။ ၶဝ်ဢမ်ႇပႆႇမီးၶိူင်ႈမၼ်းၸေးယူဝ်ႉ ၸႂ်ႉဢဝ်ၵႂႃႇၶိုၼ်း ႁူင်းယႃလူင် လႃႈသဵဝ်ႈၼၼ်ႉၼႃႇ” – ။
တီႈဝဵင်းသႅၼ်ဝီၼႆႉ မိူဝ်ႈႁၢင်ပီ 2023 ၼၼ်ႉ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA ၊ သိုၵ်းတဢၢင်း TNLA ၊ သိုၵ်းရၶႅင်ႇ AA ၊ ၸုမ်းၵႅတ်ႇၶႄၵူၼ်းမိူင်း PDF ၶဝ် ပဵၼ်ပၢင်တိုၵ်းၵၼ်ႁိုင်ၶၢဝ်းတၢင်း သၢမ်လိူၼ်ပၢႆ။ မၢၵ်ႇမႅင်းလၢႆလၢႆသႅၼ်း ၵိုတ်းၶမ်ဝႆႉ ၼႂ်းဝၢၼ်ႈၼႂ်းသူၼ်တင်းၼမ်။
ဝၢႆးလင် ပၢင်တိုၵ်းယဝ်ႉ ၸုမ်းသိုၵ်းၸၢဝ်းၶိူဝ်း ယိုတ်းဢဝ်လႆႈဝဵင်းသေ သိုၵ်းၵဝ်ႈၵၢင်ႉ ပိုၼ်ၽၢဝ်ႇၵုမ်းၵမ် ပဵၼ်တၢင်းၵၢၼ် ႁွင်ႉဢဝ်ၵူၼ်းမိူင်း ႁႂ်ႈပွၵ်ႈယူႇၶိုၼ်းႁိူၼ်းၽႂ်မၼ်း။ ၵူၺ်းမၢၵ်ႇမႅင်း ဢၼ်ၵိုတ်းၶမ်ဝႆႉ ၼႂ်းဝၢင်းႁိူၼ်း၊ ၸွမ်းၵိဝ်ႇဝၢၼ်ႈ၊ ၸွမ်းသူၼ်ႁႆႈၼႃး ၵူၼ်းမိူင်းၸိူဝ်းၼႆႉတႄႉ ၾၢႆႇသိုၵ်းၵဝ်ႈၵၢင်ႉ ဢမ်ႇႁပ်ႉပုၼ်ႈၽွၼ်း ၵဵပ်းၽဵဝ်ႈပၼ်ၶိုၼ်းလႄႈ ႁဵတ်း ႁႂ်ႈၵူၼ်းမိူင်းၼႂ်းပိုၼ်ႉတီႈ ဝဵင်းသႅၼ်ဝီ ၵႆႉယဵပ်ႇၺႃးမၢၵ်ႇၾင်လိၼ်မႃး ႁၢၼ်ႉတေႃႇထိုင်ယၢမ်းလဵဝ်။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ