မိူဝ်ႈဝၼ်းတီႈ 08/04/2025 ၽူႈၼမ်းၼႂ်း ၾၢႆႇၵၢၼ်ဢုပ်ႉပိူင်ႇသိုၵ်းမၢၼ်ႈ ၸွမ်သိုၵ်းလူင် ဢွင်ႇလိၼ်းတူၺ်း (အောင်လင်းဒွေး) ပိုၼ်ၽၢဝ်ႇ လူင်းလၢႆးမိုဝ်း မွပ်ႈပုၼ်ႈၽွၼ်းပၼ် ဢူးတၢၼ်းၸူဝ်း (ဦးသန်းစိုး) ၽူႈၶဝ်ႈၸုမ်း ၶွမ်ႊမသျိၼ်ႊ ၵၢၼ်လိူၵ်ႈတင်ႈ မိူင်းႁူမ်ႈတုမ် ၶိုၼ်ႈပဵၼ်ၵႅမ်ႁူဝ်ပဝ်ႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈမိူင်းႁူမ်ႈတုမ်ၵႂႃႇ ၸွမ်းၼင်ႇ ပိူင်ငဝ်ႈပိုင်းမိူင်း 2008 တွၼ်ႈ 419 မီးဝႆႉၼၼ်ႉ။
သိုၵ်းမၢၼ်ႈ ပိုၼ်ၽၢဝ်ႇၵႂႃႇဝႃႈ -“တႃႇၸတ်းႁဵတ်းပၢင်လိူၵ်ႈတင်ႈၵေႃႈ ၸမ်မႃးတိၵ်းတိၵ်းယဝ်ႉလႄႈ ၼင်ႇႁိုဝ် ၵၢၼ်ငၢၼ်းၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းႁူမ်ႈတုမ် ပေႃးတေၶိုပ်ႈၼႃႈမႃး၊ ၼင်ႇႁိုဝ် တေပဵၼ်တၢင်းၵမ်ႉထႅမ် တႃႇႁူဝ်ပဝ်ႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈမိူင်းႁူမ်ႈတုမ်ပႃးလႄႈ ၸင်ႇလႆႈမွပ်ႈမၢႆပၼ် ဢူးတၢၼ်းၸူဝ်း ၶိုၼ်ႈၸၼ်ႉပဵၼ် ၵႅမ်ႁူဝ်ပဝ်ႈ”- ဝႃႈၼႆ။
ၼင်ႇႁိုဝ် တေၸတ်းႁဵတ်းလႆႈပၢင်လိူၵ်ႈတင်ႈ ဢၼ်မီးလွင်ႈလွတ်ႈလႅဝ်းလႄႈ ၽဵင်ႇပဵင်းသေ ပဵၼ်မႃးပၢင်လိူၵ်ႈတင်ႈ ၸုမ်ႇၵူႈ (ပါတီစုံဒီမိုကရေစီ) ၼၼ်ႉ ၾၢႆႇသိုၵ်းမၢၼ်ႈ ၶႂ်ႈႁႂ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ ႁဵတ်းၵႂႃႇၸွမ်း ၾိင်ႈမိူင်းၶွင် ၶွမ်ႊမသျိၼ်ႊၵၢၼ်လိူၵ်ႈတင်ႈ ၸွမ်းၼင်ႇမၵ်းတတ်းဝႆႉပၼ် ၼႂ်းပိူင်ငဝ်ႈပိုင်းမိူင်း (လၵ်းမိူင်း) 2008 ၼၼ်ႉ ဝႃႈၼႆ။
တွၼ်ႈတႃႇတေပဵၼ်မႃး ပၢင်လိူၵ်ႈတင်ႈ ၼႂ်းမိူင်းႁူမ်ႈတုမ်ၼႆႉ ၾၢႆႇသိုၵ်းမၢၼ်ႈ ၸွမ်ၸိၵ်းသိုၵ်း မိၼ်းဢွင်ႇလၢႆႇ ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉ ၼႂ်းၵၢင်လိူၼ်မၢတ်ႊၶျ်ပူၼ်ႉမႃးၼႆႉဝႃႈ တေဢၢၼ်းၸတ်းႁဵတ်းပၢင် လိူၵ်ႈတင်ႈၵႂႃႇႁႂ်ႈလႆႈၼႂ်းႁၢင်ပီ 2025 ဢမ်ႇၼၼ် ႁူဝ်ပီ 2026 လႄႈ ႁႂ်ႈပႃႇတီႇၵၢၼ်မိူင်း ၸိူဝ်းတေလူင်း လိူၵ်ႈတင်ႈၼၼ်ႉ ႁၢင်ႈႁႅၼ်းတူဝ်ႈတၼ်းဝႆႉ ဝႃႈၼႆ။
ယၢမ်းလဵဝ် ၽွင်းၵူၼ်းမိူင်းႁူပ်ႉၽေးသၽႃႇဝ ဢိင်ႇသၼ်ႇလႄႈ ၽေးသိုၵ်းယူႇၼႆႉ ၾၢႆႇသိုၵ်းမၢၼ်ႈ ယင်းတိုၵ်ႉသိုပ်ႇယိုၼ်ယၼ် တေၸတ်းပၢင်လိူၵ်ႈတင်ႈထႅင်ႈယူႇ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ