ၼမ်ႉၼွင်းလုပ်ႇထူမ်ႈ တီႈဝဵင်းလူင်ၼႂ်းမိူင်းၵုၼ်ႊၵူဝ်ႊ (Congo) ႁၢႆႉႁႅင်းသုတ်း ၼႂ်းၶၢဝ်းတၢင်း 60 ပီ မီး ၵူၼ်းမိူင်းလူႉတၢႆ 33 ၵေႃႉလႄႈ ဢၼ်လႆႈငိူင်ႉပၢႆႈၽေးၼမ်ႉထူမ်ႈထႅင်ႈ တင်းၼမ်။

ဝဵင်းၵိၼ်ႊသျႃႊသႃႊၼႆႉ မီးႁူဝ်ၼပ်ႉၵူၼ်းယူႇသဝ်း မွၵ်ႈ 17 လၢၼ်ႉ၊ ပဵၼ်ငဝ်ႈဝဵင်း ၼႂ်းမိူင်းၵုၼ်ႊၵူဝ်ႊ ၵုၼ်လိၼ် ဢႃႊၾရိၵ။

ၼႂ်းဝူင်ႈဝၢင်ႈပူၼ်ႉမႃးၼႆႉ ၼမ်ႉၵုၼ်ႊၵူဝ်ႊ ၵိုင်ႉၵၢင်ႉၼွင်းမႃးသေ လႆႈထူမ်ႈသႂ်ႇ ၼႂ်းဝၢၼ်ႈဢိူင်ႇႁိူၼ်းယေး ၵူၼ်းမိူင်း ၼႂ်းဝဵင်းလူင်ၵိၼ်ႊသျႃႊသႃႊ၊ ယွၼ်ႉၽေးၼမ်ႉၼွင်းလုပ်ႇထူမ်ႈသေ ၵူၼ်းမိူင်းလူႉတၢႆ ဢမ်ႇယွမ်း 33 ၵေႃႉၼႆ – ၸဝ်ႈၼႃႈတီႈ ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉၼင်ႇၼႆ။

တီႈမိူင်းၵုၼ်ႊၵူဝ်ႊၼၼ်ႉ လွင်ႈၼမ်ႉၼွင်းလုပ်ႇထူမ်ႈၼႆႉ ပဵၼ်ၵူႈပီသေတႃႉ လွင်ႈၼမ်ႉၼွင်းထူမ်ႈ ပွၵ်ႈၼႆႉ ၼႂ်းၶၢဝ်းတၢင်း 60 ပီပၢႆ ပဵၼ်ဢၼ်ႁၢႆႉႁႅင်းသုတ်းယဝ်ႉ။

ဢိင်ၼိူဝ်လွင်ႈၼႆႉ ၸွမ်ၸိုင် မိူင်းၵုၼ်ႊၵူဝ်ႊတႄႉ လၢတ်ႈဝႃႈ ပဵၼ်ယွၼ်ႉၾိင်ႈၾႃႉလႅၵ်ႈလၢႆႈသေ ၸင်ႇတုမ်ႇယွၼ်ႈႁၢဝ်ႈႁႅင်း၊ ၵဵဝ်ႇၵပ်းၵၢၼ်ၵွပ်ႇၵူႈ ၸွႆႈထႅမ်ၵူၼ်းထူပ်းၽေးၼမ်ႉၵေႃႈ ၸီႉသင်ႇဝႆႉဝႃႈ ႁႂ်ႈၶတ်းႁႅင်းႁဵတ်းသၢင်ႈ ၸွႆႈထႅမ်ပၼ်ၵႂႃႇ ဝႃႈၼႆ။

ၼႂ်းၸႄႈတွၼ်ႈ 26 ဢၼ်ၼၼ်ႉ ၼမ်ႉၼွင်းလုပ်ႇထူမ်ႈၵႂႃႇ ၶိုင်ႈပၢႆ၊ ႁိူၼ်းယေးၵူၼ်းမိူင်း ၺႃးၼမ်ႉၼွင်းထူမ်ႈလူႉၵွႆ တင်းၼမ်။ မၢင်တီႈ ၼမ်ႉၼွင်းထူမ်ႈဝႆႉ တၢင်းသုင် မွၵ်ႈ 5 ထတ်း – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။